Xisibi—“Murhi Lowu Sivelaka Mavabyi”

“NCHUMU wa vumbirhi hi vukulu lowu dlayaka vana emisaveni a hi malariya kumbe vuvabyi bya rifuva kumbe AIDS. I . . . nchuluko,” ku vika magazini lowu nge The Economist. Kambe, va tele vana lava a va ta va va ha byi phema loko vona ni mindyangu ya vona a vo lo hlamba mavoko hi xisibi nkarhi ni nkarhi.

Valavisisi va le London School of Hygiene and Tropical Medicine va kume leswaku, hi ku vula ka The Economist, “ku hlamba mavoko hi mfanelo swi nga hunguta mavabyi ya nchuluko hi 43 wa tiphesente. Swi nga ha tlhela swi pfuna ku hunguta mavabyi lama kavanyetaka ku hefemula, ku nga wona ma talaka ku dlaya vana ku tlula mavabyi laman’wana hinkwawo. Nkambisiso lowukulu lowu endliweke evuthwini ra le Amerika wu kume leswaku ku entshemula ni ku khohlola swi ehle hi 45 wa tiphesente loko masocha ma hlamba mavoko ka ntlhanu hi siku.” Ematikweni lama ha hluvukaka, mindyangu yo tala ya swi kota ku xava xisibi. Xisweswo, swi fanerile leswi xi hlamuseriwaka tanihi “murhi lowu sivelaka mavabyi.” Naswona a swi vavi ku tirhisa murhi lowu!

Bibele na yona yi khutaza ku basa. Vakorinto va Vumbirhi 7:1 yi ri: “A hi . . . tibasiseni eka hinkwaswo leswi nga thyakisaka nyama kumbe moya.” (The New English Bible) Hambileswi Xikwembu xi karhatekaka ngopfu hi ku tenga ka hina ka moya, kambe xi teka ku basa ka hina emirini ku ri ka nkoka na kona. (Levhitika, tindzima 12-15) Ina, a xi langutelanga leswaku hi swi hundzeleta. Hambiswiritano, loko hi huma exihambukelweni kumbe loko hi heta ku hlambisa n’wana kumbe ku n’wi cinca napukeni, nkarhi ni nkarhi hi fanele hi hlamba mavoko hi nga si khoma kumbe ku lunghiselela swakudya, niloko hi xiya leswaku hi nga ha hundzisela switsongwatsongwana kumbe tibakteriya leti nga ni khombo eka van’wana. Loko hi hlamba mavoko nkarhi ni nkarhi, hi va hi kombisa rirhandzu ra Vukreste eka ndyangu wa hina ni le ka hinkwavo lava hi nga ha hlanganaka na vona.—Marka 12:31.