Ku Va Ni Gome eMianakanyweni

NICOLE a a tshamela ku va ni swipfukela ku sukela a ha ri ni malembe ya 14. Kambe loko se a ri ni malembe ya 16, u sungule ku karhatiwa hi nchumu wun’wana lowuntshwa—a a titwa a tsake swinene naswona a ri ni matimba lama hlamarisaka. Miehleketo yakwe a yi anakanya swilo swo tala, leswi a a swi vulavula a swi nga hlangani kahle naswona a a va ni nkelunkelu, a ri karhi a ehleketa leswaku vanghana vakwe va n’wi dyelela. Endzhaku ka sweswo, Nicole a a vula leswaku a nga cinca muvala wa nchumu wun’wana ni wun’wana loko a swi lava. Leswi swi endle mana wa Nicole a vona leswaku mpfuno wa madokodela wa laveka, hiloko a teka Nicole a n’wi yisa exibedlhele. Endzhaku ka ku xiyisisa ku cinca-cinca ka ndlela leyi Nicole a titwaka ha yona, madokodela ma swi kotile ku kuma lexi n’wi karhataka: Nicole a a karhatiwa hi vuvabyi bya swipfukela.a

Ku fana na Nicole, vanhu va timiliyoni emisaveni hinkwayo va karhatiwa hi vuvabyi bya ku pfilunganyeka ka mianakanyo—ku nga ha va swipfukela kumbe ntshikilelo lowukulu. Vuvabyi lebyi bya hlakata swinene. Steven, loyi a nga ni vuvabyi bya swipfukela, u ri: “Ku hele malembe yo tala ndzi ri karhi ndzi kayakaya. Nkarhi wun’wana a ndzi tsaka ngopfu kutani ku landzela gome lerikulu. Vutshunguri ni mirhi a swi pfuna, kambe ndzi ye emahlweni ndzi koka ku tika.”

I yini lexi cinca-cincaka ndlela leyi vanhu va titwaka ha yona? Swi njhani ku karhatiwa hi ntshikilelo wa mianakanyo kumbe vuvabyi bya swipfukela? Xana vanhu lava va khomiweke hi vuvabyi lebyi—swin’we ni lava va va langutelaka—va nga seketeriwa njhani?

[Nhlamuselo ya le hansi]