Va Pone Ndhambhi!

Hi mutsari wa Xalamuka! eSwitzerland

HI October 2000, ku fike swiviko swa tindhambhi swi huma ematikweni yo hambana-hambana ya misava. Timpfula letikulu ti endle leswaku tindhawu ta le tintshaveni ti tsakama swinene, leswi endleke leswaku mati ma hirimuxa misava, ma kukula swilo swo tala—ni mirhi yinene!

Xifundzha xa Valais lexi kumekaka edzongeni wa Switzerland, hi xin’wana xa tindhawu leti hlaseriweke hi mhangu leyi. Ndhawu leyi yi pandziwa hi nambu wa Rhône, lowu khulukaka wu kongoma evupela-dyambu ku suka eRhône le Central Alps ku ya eTiveni ra Geneva—ku nga mpfhuka wa kwalomu ka 170 wa tikhilomitara. Tintshava leti nga ematlhelo ka nambu lowu ti ni swinkombyana-nkombyana swa mimpimo yo hambana-hambana leswi cheletaka mati enambyeni lowu. Hi ntolovelo, ndlela leyi yo susa mati etintshaveni yi tirha kahle. Kambe loko mpfula yina ku tlula mpimo kutani mati ma tala ngopfu, hakanyingi ku va ni khombo.

Leswi swi ve tano eGondo, ku nga endzilakaneni wa Italiya. Ximutana lexi xi kumekaka ehansi ka ntshava, lexi nga ni vaaki va 150, xi hlaseriwe hi ndzhope wo tala ni maribye lama onheke ngopfu eximutanini lexi. Ku nga ri kungani swiphemu swin’wana swa Valais swi hlaseriwe hi timpfula letikulu. Magondzo ni swiporo swi pfalekile, naswona tindlu ti sungula ku tala hi ndzhope ni maribye. Etindhawini tin’wana ndzhope a wu endla timitara ta mune ku ya ehenhla. Wansati un’wana u vone ndzhope lowu a wu tlakuke hi timitara ta kwalomu ka 30, wu rhwele maribye lamakulu ni mirhi wu ta na swona wu kongome eximutanini xa ka vona!

Markus na Tabitha, mpatswa lowu tekaneke, a wu tshama edorobeni ra Mörel hi nkarhi wa khombo leri. Markus u ri: “Hi pfuxiwe hi pongo ni ku tsekatseka loko ka ha ku ba awara ya tsevu nimixo. Hiloko ndzi humela ehandle, leswaku ndzi ya vona lexi humelelaka, naswona leswi ndzi swi voneke swi ndzi tseme nhlana. Tindlu ni mabuloho a swi onhakile swi biwe hi maribye lamakulu, naswona movha wun’wana a wu tlumbe yindlu ya muakelani wanga. Le hansi le, muakelani wa hina ni nkatakwe va pfaleleke endlwini. Ndzi va pfunile leswaku va huma hi fesitere. Loko ndzi tlhelela ekaya, mina na Tabitha hi lo kuma ntsena nkarhi wa ku teka swilo swi nga ri swingani endlwini.”

Markus na Tabitha i Timbhoni ta Yehovha, naswona va fike va tumbeta nhloko eka vapfumeri-kulobye ekule ni ndhawu leyi nga ni khombo. Markus u ri: “Hambileswi hi poneke, ku hundze masiku yo hlayanyana Tabitha a ha tsemeke nhlana.” I yini lexi n’wi pfuneke ku tiyiselela xiendlakalo lexi xo chavisa? Tabitha wa hlamula: “I vuxaka ni nseketelo wa vamakwerhu lava hi nga eripfumelweni rin’we,” naswona wa engetela: “Nakambe ndzi pfuniwe hi nseketelo wa vaakelani va hina vo tala.”

Markus na Tabitha va tsundzuke Swivuriso 18:24, leyi vulaka leswaku ku ni “munghana la namarhelaka ku tlula makwavo.” Hi nkarhi wa mhangu, mawaku ndlela leyi vanghana vo tano va nga va risima ha yona!

[Mepe lowu nga eka tluka 18]

(Leswaku u vona rungula leri hleriweke hi ku helela, vona nkandziyiso wa kona)

Tindhawu leti hlaseriweke

Gondo

[Xifaniso lexi nga eka tluka 18]

Markus na Tabitha

[Laha Xifaniso Xi Humaka Kona eka tluka 18]

Mise à disposition par www.crealp.ch