Nkarhi Lowu Ku Nga Ta Va Ku Nga Ri Na Munhu La Nga Ni Xivundza
RHEKHODO ya Genesa 2:18 yi vula leswaku loko munhu wo sungula a vumbiwa, “Yehovha Xikwembu a ya emahlweni a ku: ‘A hi swinene leswaku munhu a hambeta a tshama a ri yexe. Ndzi ta n’wi endlela mupfuni, a va muhetisisi wa yena.’ ” Vanhu va vumbiwe hi ndlela ya leswaku va va ni vanhu van’wana, va titshega ha vona.
Munghana lonene ku tlula hinkwavo loyi hi nga vaka na yena i Yehovha Xikwembu. Muapostola Pawulo u teka Yehovha tanihi “Tatana la nga ni tintswalo letikulu tlhelo Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Vakorinto 1:3, 4) Yehovha u twa ku vava loko un’wana wa malandza yakwe a xaniseka. I Xikwembu xa ntwela-vusiwana. “U ku tiva kahle ku vumbeka ka hina, wa tsundzuka leswaku hi ntshuri.” (Pisalema 103:14) Xana a wu titwi u rhandza Yehovha Xikwembu naswona u tsaka hi rirhandzu, musa ni ndlela leyi a ku twisisaka ha yona?
Yehovha Wa Va Pfuna Lava Nga Ni Xivundza
Khale, malandza ya Xikwembu yo tala layo tshembeka ma langutane ni swiyimo leswi a swi endla leswaku ma titwa ma ri ni xivundza. Yehovha a a ri xihlovo xa vona xa nseketelo ni nchavelelo. Hi xikombiso, ehleketa hi Yeremiya loyi a vitaniweke leswaku a va muprofeta loko a ha ri jaha. Eka vatsari va 40 va Matsalwa, kumbexana Yeremiya hi yena la yi boxeke kahle ku tlula lavan’wana ndlela leyi a a titwa ha yona. A a chuhile naswona a titwa a nga faneleki loko a amukela xiavelo xakwe xo sungula lexi humaka eka Xikwembu. (Yeremiya 1:6) A a fanele a titshega hi Yehovha leswaku a ta swi kota ku xi endla. Entiyisweni, Yehovha a a ri na yena “kukota loyi a nga ni matimba lamakulu.”—Yeremiya 1:18, 19; 20:11.
Emalembeni ya kwalomu ka 300 Yeremiya a nga si va kona, loko Yezabele, Hosi ya xisati, a twa hi ta ku fa ka vaprofeta va Bali, u hlambanye leswaku u ta dlaya Eliya. Eliya u balekele eHorebe le Nhlonhleni ya Sinayi, leyi a yi ri ekule hi 450 wa tikhilomitara. Kwalaho u nghene ebakweni a etlela kona, kutani Yehovha Xikwembu a n’wi vutisa a ku: “Eliya, xana u endla yini laha?” Eliya u hlamule hi ku vula leswaku u vona onge hi yena ntsena mugandzeri wa Yehovha eIsrayele hinkwaro, muprofeta a ri un’we la hisekelaka ntirho wa Xikwembu. Yehovha u n’wi tiyisekisile leswaku a a nga ri swakwe. Yehovha a a ri na yena, naswona Vaisrayele-kulobye va 7 000 a va yime na Eliya, hambileswi yena a a nga swi tivi. Yehovha u chavelele Eliya ivi a tiyisa ripfumelo rakwe. U khumbe mbilu ya Eliya, a khutaza muprofeta loyi leswaku a nga tshiki ntirho wakwe. (1 Tihosi 19:4, 9-12, 15-18) Loko na hina ku fana na Eliya ho tshuka hi khomiwa hi xivundza kumbe hi titwa hi ri swikamba ntsena, hi nga khongela eka Yehovha hi kombela leswaku a hi nyika matimba. Nakambe, loko vo tirhisa vutlhari, vakulu lava nga Vakreste va nga vulavula hi ndlela leyi chavelelaka eka lavo tshembeka, va va pfuna va vona xiavelo xa vona eku hetisekeni ka xikongomelo xa Xikwembu.—1 Vatesalonika 5:14.
Eka swikombiso leswi ni swin’wana, ha swi vona leswaku Yehovha u tiyimiserile ku seketela ni ku va chavelela hi rirhandzu lava nga ni xivundza. Ina, “Yehovha u ta va xisirhelelo lexi tlakukeke eka un’wana ni un’wana la pfotlosiweke, xisirhelelo lexi tlakukeke hi minkarhi ya maxangu.”—Pisalema 9:9; 46:1; Nahume 1:7.
Wanuna Loyi A A Ri Ni Ntwela-vusiwana Lowukulu
Yesu Kreste i munhu loyi hi nga n’wi xiximaka hikwalaho ka leswi a a tiva ku lawula mintlhaveko yakwe hi ndlela leyi hetisekeke, a tekelela Yehovha. Luka u hlamusela ndlela leyi Yesu a anguleke ha yona loko a hlangana ni xilahlo le mutini wa Nayini: “A ku humesiwa munhu la feke, a tlakuriwile, n’wana la tswariweke a ri swakwe eka mana wakwe. . . . Loko Hosi yi n’wi vona, yi n’wi twela vusiwana, yi ku eka yena: ‘Tshika ku rila.’ Xisweswo yi tshinela yi khumba rihlaka, kutani vatlakuri va yima, yi ku: ‘Jaha, ndzi ri eka wena, Pfuka!’ Kutani munhu loyi a feke a pfuka a tshama, a sungula ku vulavula, ivi yi n’wi nyika mana [wakwe].” (Luka 7:12-15) Yesu a a twe ku vava. A a ri ni ntwela-vusiwana. Mawaku ndlela leyi Yesu a yi tsakiseke ha yona noni leyi, loko a pfuna n’wana wa yona! Xivundza xa yona xi vuye xi hela.
Ha tiyiseka leswaku Yesu a nga hi “tshandzisa eku tsaneni ka hina.” Kunene u tshandzisa lavo lulama, lava nga ni xivundza. Kunene, ha yena “hi kuma tintswalo ni musa lowu nga faneriwiki hi ta pfuneka enkarhini wa kona.” (Vaheveru 4:15, 16) Hi ku tekelela Yesu, hi nga va ni ntwela-vusiwana eka lava va nga ni gome, nhlomulo ni xivundza. Loko hi pfuna van’wana, a hi nge tali ku khomiwa hi xivundza. Kambe ku ni ndlela yin’wana leyi hi nga kumaka mpfuno wo lwisana ni xivundza ha yona.
Rito Ra Xikwembu Ri Nga Hi Pfuna Ku Hlula Xivundza
Vo tala va kume leswaku “va [ve] ni ntshembo . . . hikwalaho ka nchavelelo lowu humaka eMatsalweni.” Rito ra Xikwembu ri ni ndzayo leyi nga hi pfunaka leswaku hi hlula xivundza. (Varhoma 15:4; Pisalema 32:8) Hi xikombiso, Rito ra Xikwembu ri hi khongotela leswaku hi “nga tiehleketeleli ku tlula mpimo lowu [hi] faneleke ku tiehleketelela ha wona.” (Varhoma 12:3) Leswaku hi tirhisa xitsundzuxo lexi, swi nga ha lava leswaku hi cincanyana ndlela leyi hi ehleketaka ha yona. Ku xiya kahle leswaku hi tsane kwihi swi ta hi pfuna leswaku hi va ni langutelo leri faneleke hi leswi hi swi languteleke. Nakambe Rito ra Xikwembu ri hi pfuna ku va ni vunghana bya ntiyiso ni van’wana. (Vafilipiya 2:4) Leswi swi lava leswaku u khomisana ni van’wana. Loko u khathala hi van’wana, ni van’wana va ta khathala ha wena. Ku va ni vuxaka lebyinene ni van’wana swa hi pfuna leswaku hi nga vi na xivundza naswona swi endla leswaku hi va ni xikongomelo evuton’wini.
Bibele ya hi khutaza hina Vakreste leswaku “hi nga fularheli ku hlengeletana ka hina.” (Vaheveru 10:24, 25) Hikwalaho hlanganyela eka swilo leswi akaka, ku fana ni ku va kona eminhlanganweni ya Timbhoni ta Yehovha nkarhi ni nkarhi. Handle ko kanakana, minhlangano ya Vukreste yi nga endla leswaku hi hanya kahle emoyeni, emintlhavekweni ni le mirini. Ku vulavula ni van’wana hi mahungu lamanene ya Mfumo wa Xikwembu i ndlela leyinene ngopfu yo tata vutomi bya hina hi swilo swa moya. Swi endla leswaku hi tshama hi anakanya hi swilo leswi faneleke, swi tiyisa ripfumelo ra hina ni ku sirhelela ntshembo wa hina.—Vaefesa 6:14-17.
Tshinela eka Yehovha hi xikhongelo. Davhida u khutazile: “Lahlela ndzhwalo wa wena eka Yehovha, u ta ku seketela.” (Pisalema 55:22) U ta tsaka loko u dyondza Rito ra Xikwembu. (Pisalema 1:1-3) Naswona loko u fikela hi xivundza, ehleketisisa hi rirhandzu ra Yehovha hilaha ri paluxiweke hakona eRitweni rakwe. Mupisalema u tsarile: “Moya-xiviri wa mina a wu namarhele ntshuri wunene. Ndzi londzovote ndzi hanya hi ku ya hi rito ra wena.”—Pisalema 119:25.
Nkarhi Lowu Ha Wona Ku Nga Taka Ku Nga Ri Na Loyi A Nge “Ndzi Ni Xivundza”
Yehovha Xikwembu u hi tshembise misava leyi eka yona ku nga ta va ku nga ri na mivilelo, ku pfilunganyeka ni langutelo leri hoxeke. Bibele yi ri: “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:4) Ina, swin’wana swa swilo leswi nga ta hundza i ku vava loku hi ku twaka namuntlha enyameni, emiehleketweni ni le mintlhavekweni.
Misava yi tele hi vanhu lava nga ni vunghana, lava nga ta endla leswaku vutomi bya hina byi tsakisa. Yehovha, hi ku tirhisa Mfumo wakwe wa le tilweni lowu nga emavokweni ya Yesu Kreste, u ta xi herisela makumu xivundza xa hina. U ta hi nyika swilo leswintshwa ni leswinene eparadeyisini ya laha misaveni. Ku nga ri khale ku ta fika nkarhi lowu hi nga taka hi nga ha tlheli hi ku, “Ndzi ni xivundza.”
[Xifaniso lexi nga eka tluka 9]
Hi ku seketeriwa hi Yehovha, a hi nge he tlheli hi va ni xivundza, hambiloko hi ri swerhu
[Swifaniso leswi nga eka tluka 10]
Xana rungula ra Bibele leri vulavulaka hi Yeremiya na Eliya ri hi dyondzisa yini?