Langutelo Ra Bibele

Xana Swi Vula Yini Ku Va Nhloko Ya Ndyangu?

HI KU ya hi Bibele, “nhloko ya wansati i wanuna.” (1 Vakorinto 11:3; Vaefesa 5:23) Kambe vo tala lava vulaka leswaku va xixima Bibele va anakanya leswaku nsinya lowu wa nawu wa leswaku wanuna i nhloko a wu lo hundzeriwa hi nkarhi ntsena kambe wu ni khombo. Mpatswa wun’wana wu vule leswi: “Dyondzo ya leswaku vavasati va fanele va ‘titsongahata’ [eka vavanuna va vona], loko yi tekeriwa ehenhla, yi nga endla leswaku vavasati va xanisiwa ni ku karhatiwa emintlhavekweni.” Lexi vavisaka, ku tirhisiwa ka vunhloko hi ndlela yo biha swi andzile. Mutsari un’wana u vula leswaku “ku biwa ka vavasati swi tekiwa swi ri nchumu wa ntolovelo ematikweni yo tala—ku va wa nuna swi ndhundhuzeriwa hi ndlela yo hlawuleka eka tinsimu, swivuriso ni le micatweni.”

Van’wana va ringanyeta leswaku nsinya wa nawu wa Bibele wa vunhloko hi wona wu endleke leswaku vavasati va khomiwa hi tihanyi. Xana dyondzo ya Bibele ya vunhloko yi tsongahata vavasati ni ku khutaza madzolonga endyangwini? Kahle-kahle swi vula yini ku va nhloko ya ndyangu?a

Ku Va Nhloko A Swi Vuli Ku Tshikilela Van’wana

Hi ku ya hi Bibele, ku va nhloko i lunghiselelo ra rirhandzu naswona a ri fambisani ni ku va ni tihanyi nikatsongo. Ku xanisiwa ka vavasati hi ndlela ya tihanyi swi vangiwe hileswi munhu a honiseke nawu wa Xikwembu. (Genesa 3:16) Ku sukela entangeni wa Edeni, hakanyingi vavanuna va tirhise matimba ya vona hi ndlela yo biha, va xanisa van’wana hi ndlela ya tihanyi, ku katsa ni vavasati ni vana.

Hambiswiritano, lexi a ku nga ri xona xikongomelo xa Xikwembu. Yehovha wa va venga lava tirhisaka vunhloko hi ndlela yo biha. U sole vavanuna va Vaisrayele lava “xengeke” vasati va vona. (Malakiya 2:13-16) Ku tlula kwalaho, Xikwembu xi ri ‘moya-xiviri wa xona wa n’wi venga un’wana ni un’wana la rhandzaka madzolonga.’ (Pisalema 11:5) Kutani lava baka vavasati va vona ni ku xanisa van’wana a va nge yi tirhisi Bibele ku yimelela swiendlo swa vona swa madzolonga.

Xana Ku Va Nhloko Leyinene Swi Katsa Yini?

Vunhloko i lunghiselelo lerikulu leri Xikwembu xi ri tirhisaka leswaku ku va ni ku hleleka emisaveni. Hinkwerhu hi le hansi ka van’wana, i Xikwembu ntsena lexi nga riki ehansi ka un’wana. Vavanuna va le hansi ka Kreste, vana va le hansi ka vatswari va vona naswona Vakreste hinkwavo va le hansi ka tihulumendhe. Hambi ku ri Yesu u le hansi ka Xikwembu.—Varhoma 13:1; 1 Vakorinto 11:3; 15:28; Vaefesa 6:1.

Leswaku tiko ri hleleka kahle, vanhu va fanele va yingisa varhangeri. Hilaha ku fanaka, ku titsongahatela nhloko ya ndyangu i swa nkoka leswaku mi aka ndyangu lowu tiyeke, lowu tsakeke ni lowu nga ni ku rhula. A swi vuli leswaku nawu lowu a wu tirhi loko ku nga ri na wanuna kumbe tatana endyangwini. Emindyangwini yo tano manana hi yena a vaka nhloko. Loko vatswari havambirhi va nga ri kona, n’wana lonkulu kumbe xaka rin’wana, ri nga va nhloko endyangwini. Eswiyin’weni hinkwaswo, swirho swa ndyangu swa vuyeriwa loko swi kombisa xichavo lexi faneleke eka loyi a rhangelaka.

Hikwalaho nchumu wa nkoka, hileswaku a hi fanelanga hi honisa nsinya wa nawu wa vunhloko, kambe hi fanele hi dyondza ku languta vunhloko hi ndlela leyi faneleke. Muapostola Pawulo u khutaze vavanuna lava nga Vakreste leswaku va va tinhloko ta mindyangu ya vona “tanihi leswi Kreste na yena a nga nhloko ya vandlha.” (Vaefesa 5:21-23) Xisweswo Pawulo u tlhele a kombisa ndlela leyi Kreste a tirhisaneke ha yona ni vandlha tanihi ndlela leyinene yo rhangela. Hi xihi xikombiso lexi Kreste a xi vekeke?

Hambileswi a a ri Mesiya ni Hosi ya nkarhi lowu taka, Yesu a a nyikiwe vulawuri hi Xikwembu naswona a tlharihe ngopfu a tlhela a va ni ntokoto ku tlula vadyondzisiwa vakwe, kambe a a ri ni rirhandzu ni ntwela-vusiwana. A a nga karihi, a sihalala kumbe ku rindzela leswaku vanhu va endla leswi nga ehenhla ka matimba ya vona. A a nga va tshikileli ni ku tshamela ku tsundzuxa un’wana ni un’wana leswaku yena a a ri N’wana wa Xikwembu. Yesu a a titsongahata. Hikwalaho ‘joko ra yena a ri olova ni ndzhwalo wa yena a wu vevuka.’ (Matewu 11:28-30) Xisweswo, a a ngheneka ni ku anakanyela. Entiyisweni, Pawulo u vula leswaku Yesu u rhandze vandlha swinene lerova a “tinyiketa hikwalaho ka rona.”—Vaefesa 5:25.

Xana Hi Nga Byi Tekelela Njhani Vunhloko Bya Yesu?

Xana tinhloko ta mindyangu ti nga ti tekelela njhani timfanelo ta Kreste? Nhloko leyi nga ni vutihlamuleri yi khathalela ndyangu hi tlhelo ra nyama ni ra moya. Yi kombisa leswaku ya khathala hi ku tinyika nkarhi wa xirho ha xin’we xa ndyangu ni ku khathalela swilaveko swa wona hinkwaswo. Yi rhangisa swilaveko swa munghana wa yona wa vukati swin’we ni swa vana.b (1 Vakorinto 10:24; Vafilipiya 2:4) Loko a tirhisa misinya ya milawu ya Bibele ni tidyondzo ta yona evuton’wini byakwe bya siku ni siku, wanuna wa xiximiwa ni ku seketeriwa hi nsati wakwe ni vana. Ehansi ka vunhloko bya yena bya rirhandzu, ndyangu wu ta humelela eka matshalatshala lawa a ma endlaka ya ku langutana ni swiphiqo hambi swi ri swihi. Xisweswo loko a tirhisa vunhloko bya yena hi ndlela ya Matsalwa, wanuna u aka ndyangu lowu tsakeke, lowu dzunisaka Xikwembu.

Nhloko leyi anakanyelaka na yona ya titsongahata. Loko swi fanerile, yi kombela ku rivaleriwa yi ntshunxekile, hambiloko swi nga ha endleka yi swi kuma swi tika ku pfumela leswaku yi hoxile. Bibele yi vula leswaku ku pona ku laha “ku nga ni vatsundzuxi vo tala.” (Swivuriso 24:6) Ina, ku titsongahata swi ta endla leswaku nhloko ya ndyangu yi yingisela ni ku amukela vonelo ra nsati wa yona ni vana loko swi fanerile. Hi ku tekelela Yesu, nhloko leyi nga Mukreste yi ta tiyiseka leswaku vunhloko bya yona a byi tisi ntsako ni vuhlayiseki ntsena endyangwini kambe byi tlhela byi yisa ku dzuneka eka Yehovha Xikwembu, Musunguri wa mindyangu.—Vaefesa 3:14, 15.

[Tinhlamuselo ta le hansi]

[Xifaniso lexi nga eka tluka 26]

Wanuna la anakanyelaka u amukela vonelo ra nsati ni vana