Ku Titsongahata Eka Vulawuri Bya Xikwembu Swa Pfuna

LOKO hi lava ku hleleriwa ku endla ku rhandza ka Yehovha, Hosi ya Vuako Hinkwabyo, i swa nkoka leswaku hi titsongahata eka yena. Ha titsongahata eka vunhloko bya N’wana wakwe lebyi a byi tirhisaka evandlheni ra Vukreste naswona hi yingisa nawu wa vunhloko eka swiyimo swin’wana swa vutomi. Ku titsongahatela vulawuri bya Xikwembu hi ndlela yoleyo, swi vuyerisa un’wana ni un’wana la endlaka tano.

² Mhaka ya leswaku munhu a titsongahata eka loyi a nga ni mfanelo yo lawula yi sungule entangeni wa Edeni. Yi katsiwe eka swileriso swa Xikwembu leswi kumekaka eka Genesa 1:28 na 2:16, 17. Swiharhi a swi fanele swi lawuriwa hi vanhu, kasi Adamu na Evha a va fanele va endla ku rhandza ka Xikwembu ni ku tiveka ehansi ka vulawuri bya xona. Ku titsongahatela vulawuri lebyi bya Xikwembu a swi ta tisa ku rhula ni ku hleleka lokunene. Nawu wa vunhloko wu tlhele wu kandziyisiwa eka 1 Vakorinto 11:3. Muapostola Pawulo u tsale a ku: “Ndzi lava mi tiva leswaku nhloko ya wanuna un’wana ni un’wana i Kreste; kasi nhloko ya wansati i wanuna; kasi nhloko ya Kreste i Xikwembu.” Kutani leswi swi kombisa leswaku un’wana ni un’wana handle ka Yehovha, u fanele a titsongahatela vunhloko byo karhi.

³ Vanhu vo tala namuntlha a va na mhaka ni nawu lowu wa vunhloko. Ha yini? Timhaka ti onhake aEdeni loko vatswari va hina va hlawule ku ka va nga tiveki ehansi ka vunhloko lebyi tlakukeke bya Xikwembu hi vomu. (Gen. 3:4, 5) Hambiswiritano, a va kumanga ntshunxeko hilaha ku heleleke. Ematshan’weni ya sweswo, va yingise xivumbiwa xa moya xo homboloka, ku nga Sathana Diyavulosi. Ku xandzuka loku ko sungula ku hambanise vanhu ni Xikwembu. (Kol. 1:21) Hi yona mhaka leyi vanhu vo tala namuntlha va phasiweke hi matimba ya lowo homboloka.—1 Yoh. 5:19.

⁴ Hi ku dyondza ntiyiso wa Rito ra Xikwembu ni ku endla leswi ri hi byelaka swona, hi humile eka nkucetelo wa Sathana. Leswi se hi nga Timbhoni leti tinyiketeleke ti tlhela ti khuvuriwa, hi amukela Yehovha tanihi Hosi leyi Lawulaka evuton’wini bya hina. Hi pfumelelana na Hosi Davhida, loyi a pfumeleke leswaku Yehovha i “murhangeri wa hinkwavo.” (1 Tikr. 29:11) Hi ku titsongahata hi ri: “Yehovha i Xikwembu. Hi yena la hi endleke, a hi tiendlanga. Hi vanhu vakwe ni tinyimpfu ta madyelo yakwe.” (Ps. 100:3) Ha swi vona leswaku Yehovha u tlakukile ni leswaku hi fanele hi titsongahata eka yena hilaha ku heleleke, tanihi leswi a tumbuluxeke swilo hinkwaswo. (Nhlav. 4:11) Tanihi vatirheli va Xikwembu xa ntiyiso, hi landzela Yesu Kreste, loyi a hi vekeleke xikombiso lexi hetisekeke xa ku titsongahata eka Xikwembu.

⁵ I yini leswi Yesu a swi dyondzeke eka nxaniso lowu a langutaneke na wona loko a ha ri emisaveni? Vaheveru 5:8 yi hlamula yi ku: “Hambileswi a a ri n’wana, u dyondze ku yingisa eka swilo leswi a xanisekeke ha swona.” Ina, Yesu u tshame a tshembekile, a titsongahata eka Tata wakwe wa le tilweni hambiloko a langutane ni maxangu. Ku tlula kwalaho, Yesu a nga endlanga nchumu hi ku tisungulela. A a nga vulavuli nchumu lowu a ngo tisungulela kumbe a tilavela ku dzunisiwa. (Yoh. 5:19, 30; 6:38; 7:16-18) Loko a ri karhi a endla ntirho wakwe, u tsakisiwe hi ku endla ku rhandza ka Tata wakwe, hambileswi sweswo swi endleke leswaku a kanetiwa ni ku xanisiwa. (Yoh. 15:20) Nilokoswiritano, Yesu u titsongahatile eka Xikwembu. Yesu u “titsongahatile” ku ya fikela loko a ‘fa emhandzini ya nxaniso.’ Ku titsongahata kakwe hilaha ku heleleke eka Yehovha ku ve ni vuyelo lebyinene hi tindlela to tala, kutani sweswo swi ta endla leswaku vanhu va ponisiwa hilaha ku nga heriki, yena a tlakusiwa kutani Tata wakwe a dzunisiwa.—Filp. 2:5-11; Hev. 5:9.

LAHA HI FANELEKE HI TITSONGAHATELA VULAWURI BYA XIKWEMBU

⁶ Loko hi titsongahata eka Xikwembu hi ku endla ku rhandza ka xona, hi papalata maxangu ni ku pfilunganyeka ko tala loku hlaselaka lava alaka ku titsongahatela vulawuri bya Yehovha. Nala wa hina Diyavulosi u tshama a ri karhi a lava tindlela to hi phasa. Hi ta kota ku pona eka lowo homboloka ntsena loko hi kanetana na yena naswona hi titsongahata eka Yehovha hi ku swi rhandza.—Mat. 6:10, 13; 1 Pet. 5:6-9.

⁷ Evandlheni ra Vukreste, hi xixima vunhloko bya Kreste ni vulawuri lebyi a byi nyikeke “hlonga ro tshembeka ni ro tlhariha.” Leswi swi khumba langutelo ra hina ni ndlela leyi hi khomaka van’wana ha yona. Ku titsongahata evandlheni ku ta hi susumetela leswaku hi yingisa Rito ra Xikwembu eka swiyenge hinkwaswo swa vugandzeri bya hina. Leswi swi katsa ntirho wa nsimu, ku va kona etinhlengeletanweni ta vandlha ni ku hlamula, vuxaka bya hina ni vakulu ni ku fambisana ni nhlangano wa Xikwembu.—Mat. 24:45-47; 28:19, 20; Hev. 10:24, 25; 13:7, 17.

⁸ Ku titsongahata ka hina eka Xikwembu ku endla leswaku ku va ni ku rhula naswona swa hi sirhelela leswaku ku va ni ku hleleka evandlheni ra Vukreste. Ndlela ley vanhu va Yehovha va endlaka swilo hayona yi kombisa leswaku va tekelele yena. (1 Kor. 14:33, 40) Mintokoto leyi hi veke na yona enhlanganweni wa Yehovha, yi hi susumetela ku vula marito lama fanaka ni lama vuriweke hi Hosi Davhida. Endzhaku ka loko Davhida a xiye ku hambana loku nga kona exikarhi ka malandza ya Yehovha ni vanhu vo homboloka, u huwelele hi ntsako a ku: “Va tsaka vanhu lava Xikwembu xa vona ku nga Yehovha!”—Ps. 144:15.

⁹ Evukatini ni le ndyangwini “nhloko ya wansati i wanuna.” Hi nkarhi lowu fanaka, vavanuna va fanele va titsongahata eka Kreste, kasi nhloko ya Kreste i Xikwembu. (1 Kor. 11:3) Vavasati lava tekiweke va fanele va titsongahata eka vanuna va vona kasi vana va fanele va titsongahata eka vatswari va vona. (Efe. 5:22-24; 6:1) Ku va ni ku rhula loko xirho xin’wana ni xin’wana xa ndyangu xi landzela nawu lowu wa vunhloko.

¹⁰ Wanuna loyi a tekeke u fanele a tirhisa vunhloko byakwe hi ndlela ya rirhandzu, a tekelela Kreste. (Efe. 5:25-29) Loko a nga byi tirhisi hi ndlela yo biha vunhloko byakwe naswona a nga tshiki ku khathalela ndyangu, nsati ni vana vakwe va ta titsongahata eka yena hi ntsako. Wansati i mupfuni kumbe muhetisisi. (Gen. 2:18) Loko a seketela nuna wakwe handle ko hela mbilu naswona a n’wi xixima, u endla leswaku nuna wakwe a n’wi rhandza ni ku yisa ku dzuneka eka Xikwembu. (1 Pet. 3:1-4) Loko vavanuna ni vavasati va landzela ndzayo ya Bibele emhakeni ya vunhloko, va vekela vana va vona xikombiso lexinene leswaku na vona va titsongahata eka Xikwembu.

¹¹ Ku titsongahata ka hina eka Xikwembu ku tlhela ku khumba langutelo ra hina hi “valawuri lava tlakukeke” lava va ‘vekiweke hi Xikwembu eswiyin’weni swa vona leswi hikiweke.’ (Rhom. 13:1-7) Leswi Vakreste va yingisaka nawu, va hakela swibalo naswona va tlherisela ‘swilo swa Khezari eka Khezari, kambe swilo swa Xikwembu va swi tlherisela eka Xikwembu.’ (Mat. 22:21) Ku engetela kwalaho, loko hi tirha nsimu hi yingisa milawu ya tiko leyi sirhelelaka rungula ra vanhu. Hi ku titsongahata ni ku yingisa valawuri hi ndlela leyi faneleke eka swilo hinkwaswo leswi nga lwisaniki ni nawu wo lulama wa Yehovha, hi kota ku dzikisa mianakanyo ya hina hi tlhela hi tirhisa matimba ya hina entirhweni wo chumayela.—Mar. 13:10; Mint. 5:29.

¹² Ku titsongahata eka nhlangano wa Xikwembu swi khumba xin’wana ni xin’wana lexi hi xi endlaka evuton’wini. Hi ripfumelo, hi vona siku leri ha rona vanhu hinkwavo va nga ta titsongahata eka Yehovha Xikwembu. (1 Kor. 15:27, 28) Mawaku ndlela leyi vanhu lava hi ntsako va amukelaka vuhosi bya Yehovha va nga ta kateka ni ku tsakeriwa ha yona kutani va tshama va titsongahate eka yena hilaha ku nga heriki!