Nchumu Wa Nkoka Ku Tlula Ndhuma

HI KU VULA KA CHARLES SINUTKO

Hi 1957, ndzi nyikiwe kontraka ya ku yimbelela ya mavhiki ya 13 le Las Vegas, eNevada, le U.S.A., ndzi tshembisiwe gidi ra tidolara, ndzi tshembisiwe ku nyikiwa mavhiki man’wana ya 50 loko ndzo yimbelela kahle. Sweswo a swi ta endla leswaku ku engeteriwa mali leyi ringanaka $50,000—mali leyi a yi tele ngopfu hi nkarhi wa kona. Inge ndzi hlamusela leswi endleke leswaku ndzi tshembisiwa mali yo tala swonghasi ni leswi endleke leswaku swi ndzi tikela ku endla xiboho emhakeni leyi.

TATANA, i wa le Ukraine naswona u velekiwe evuxeni bya Yuropa hi 1910. Hi 1913 mana wakwe u n’wi yise eUnited States, laha a hlanganeke ni nuna wakwe kona. Tatana u teke nsati hi 1935, naswona mina ndzi tswariwe eAmbridge, le Pennsylvania loko manana na tatana se va ri ni lembe va tekanile. Hi nkarhi wolowo Vabava-nkulu vambirhi va ve Timbhoni ta Yehovha.

Loko mina ni tindzisana ta mina tinharhu ta majaha ha ha ri vatsongo naswona ndyangu wa ka hina wa ha tshama ekusuhi ni le New Castle, ePennsylvania, manana u dyondzenyana Bibele ni Timbhoni. Hi nkarhi wolowo vatswari va hina a va vanga Timbhoni, kambe Tatana a a kholwa leswaku vabuti wakwe va ni lunghelo ro kholwa leswi va swi lavaka. Hambileswi Tatana a hi kuriseke hi ndlela ya leswaku hi rhandza tiko ra ka hina, nkarhi hinkwawo a a lava leswaku un’wana ni un’wana a a landzela vukhongeri lebyi a byi rhandzaka.

Ntirho Wo Yimbelela

Vatswari va mina a va kholwa leswaku ndzi ni nyiko yo yimbelela, kutani va tikarhatile leswaku ndzi antswisa nyiko leyi. Loko ndzi ri ni tsevu kumbe nkombo wa malembe, Tatana a hamba a ndzi yimisa eholweni leyi ku hungasiwaka eka yona nivusiku leswaku ndzi yimbelela ni ku tlanga katara ya mina. Ndzi yimbelele risimu leri nge “Manana.” Marito yo sungula a ma ri ni maletere ya rito leri nge “manana.” Letere ha rin’we a ri kandziyisa mfanelo ya rirhandzu ya manana. Risimu ra kona a ri gimeta hi rito ra le henhla laha a ndzi “Peleta maletere ya rito M-A-N-A-N-A, rito leri a ri ri ra risima swinene eka mina.” Vavanuna lava a va ri ebarheni, lava hakanyingi a va tshama va byi kapile swinene, a va huwelela va tlhela va hoxa mali endzeni ka xihuku xa Tatana.

Eka nongonoko wa mina wo sungula eka xiya-ni-moya eNew Castle eka xitichi xa WKST, hi 1945, a ndzi yimbelela vuyimbeleri bya country. Hi ku famba ka nkarhi ndzi cincele eka vuyimbeleri lebyi dumeke bya Hit Parade, lebyi a byi haxiwa vhiki ni vhiki eka xiya-ni-moya eka tinsimu ta khume leti dumeke ngopfu. Ndzi vonake ro sungula eka thelevhixini hi 1950 eka nkombiso wa Paul Whiteman. Lunghiselelo rakwe leri vuriwaka George Gershwin’s “Rhapsody in Blue” ra ha ri ni ndhuma. Endzhaku ka sweswo Tatana u xavise yindlu ya ka hina ePennsylvania, kutani hi rhurhele eLos Angeles le California, laha a hi lava ku ndlandlamuxa ntirho wa mina.

Hikwalaho ko phikelela ka Tatana, ku nga ri kungani ndzi ve ni nongonoko wa mina eka xiya-ni-moya ePasadena naswona vhiki ni vhiki a ndzi yimbelela hafu ya awara eka TV le Hollywood. Ndzi kandziyise vuyimbeleri byo tala bya okhestra bya Ted Dale eka khampani ya Capitol Records naswona ndzi tlhele ndzi va muyimbeleri eka xiya-ni-moya xa CBS. Hi 1955, ndzi yimbelele eLake Tahoe en’walungwini wa California. Loko ndzi ri kwalaho, swilo leswi a ndzi swi teka swi ri swa nkoka ngopfu evuton’wini swi cincile swinene.

Ku Hlakulela Tipakani Letintshwa

Hi nkarhi wolowo, bava-nkulu John, loyi na yena a rhurheleke eCalifornia a huma ePennsylvania—u ndzi nyike buku leyi nge “Let God Be True.”ab Ndzi fambe na yona eLake Tahoe. Endzhaku ka nkombiso wa hina wo hetelela lowu heleke kahle exikarhi ka vusiku, ndzi sungule ku hlaya buku leyi ndzi nga si etlela. A ndzi tsake ngopfu hikwalaho ka leswi ndzi kumeke tinhlamulo ta le Bibeleni ta swivutiso leswi a ku ri khale ndzi lava tinhlamulo ta swona.

Ku nga ri kungani a ndzi tshama eholweni leyi ku hungasiwaka eka yona loko hi heta ku yimbelela, ndzi bula ni lava a ndzi yimbelela na vona, hakanyingi a hi bula kukondza ku va matakuxa. A hi vulavula hi tinhloko-mhaka to tanihi vutomi endzhaku ka rifu, ha yini Xikwembu xi pfumelela vuhomboloki ni ku kambisisa leswaku xana vanhu va ta hetelela va ti lovisa ni ku lovisa misava kumbe e-e. Endzhaku ka tin’hweti ti nga ri tingani, hi July 9, 1955, entsombanweni wa muganga wa Timbhoni ta Yehovha lowu khomeriweke eWrigley Field, le Los Angeles, ndzi kombise ku tinyiketela ka mina eka Yehovha Xikwembu hi ku khuvuriwa.

Ku nga si hela ni tsevu wa tin’hweti, hi Khisimusi nimixo wa 1955, ndzi rhambiwe hi Mbhoni yin’wana leyi vuriwaka Henry Russell, leswaku ndzi famba na yena hi endzela Jack McCoy loyi a a ri ni bindzu ra vuhungasi. Henry hi byakwe a a ri mukongomisi wa khampani ya NBC. Kutani loko hi fika, Jack u byele vana vakwe vanharhu swin’we ni nsati leswaku va tshama ehansi va hi yingisa, hambileswi a va ha ku pfula tinyiko ta vona ta Khisimusi. Ku nga ri kungani yena ni ndyangu wakwe va ve Timbhoni.

Enkarhini wolowo ndzi dyondze na Manana kutani u amukele ntiyiso wa le Bibeleni. Eku heteleleni u ve Mbhoni ya Yehovha kutani a tlhela a va phayona, ku nga muchumayeri wa evhangeli wa nkarhi hinkwawo. Hi ku famba ka nkarhi, tindzisana ta mina tinharhu na tona ti khuvuriwile kutani ti nghenela ntirho wa vuphayona swa xinkarhana. Hi September 1956, loko ndzi ri ni 20 wa malembe, ndzi ve phayona.

Ku Endla Swiboho Malunghana Ni Ntirho

Hi nkarhi lowu, George Murphy, loyi a a ri munavetisi tlhelo munghana wa mina, a a lava ku ndzi tlakusa. George u tlange tifilimi to hlayanyana hi va-1930 na hi va-1940. Hikwalaho ka Murphy, hi December 1956, ndzi humelele enkombisweni wa Jackie Gleason eDorobeni ra New York, eka xitichi xa TV xa CBS. Sweswo swi ve mpfuno lowukulu eka mina tanihi leswi enkombisweni wolowo a ku ri ni vayingiseri va kwalomu ka 20 000 000. Loko ndzi ri eNew York, ndzi endzele yindlu-nkulu ya misava hinkwayo ya Timbhoni ta Yehovha eBrooklyn ro sungula.

Endzhaku ko humelela enkombisweni wa Gleason, ndzi sayine ntwanano wa ku tlanga tifilimi malembe ya nkombo eka tifilimi ta MGM. Ndzi nyikiwe ntirho wa ku tlanga switori swa le Vupela-dyambu eka TV. Kambe, hi ku famba ka nkarhi ripfalo ra mina ri sungule ku ndzi kingindza, tanihi leswi a ndzi ta tiendla munhu la gembulaka ni la tirhasaka xibamu—ku nga swiphemu leswi navetisaka ku tikhoma loko biha ni mahanyelo man’wana lama nga riki ya Vukreste. Kutani ndzi tshikile. Lava a va tirha eka ta vuhungasi a va ehleketa leswaku se ndza penga.

Leswi swi hi yisa eka mali yo tala leyi ndzi tshembisiweke yona eLas Vegas, leyi ndzi vulavuleke ha yona eku sunguleni. A ndzi fanele ndzi sungula ntirho hi vhiki leri ku taka mulanguteri la famba-fambaka. Loko a ndzi lo wu tshika ntirho wolowo, a ndzi nga ha ta tlhela ndzi wu kuma. A ndzi nga tivi leswaku ndzi endla yini, tanihi leswi Tatana a a langutele leswaku ndzi ta nghenisa mali yo tala! Ndzi vone swi fanerile leswaku ndzi n’wi rilisanyana hikwalaho ka leswi a ndzi pfuneke leswaku ndzi antswisa vuswikoti bya mina.

Kutani ndzi ye eka muungameri wa hina la ungameleke, Carl Park, loyi na yena a a ri xiyimbeleri naswona hi hala tlhelo a a chaya vhayolini eka xiya-ni-moya xa WBBR hi va-1920 le New York. Ndzi n’wi byele leswaku loko ndzo nghenela ntirho lowu, ndzi nga kota ku phayona vutomi bya mina hinkwabyo handle ko vilela hi ta mali. U te: “A ndzi nge ku endleli xiboho, kambe ndzi nga ku pfuna leswaku u tiendlela xiboho.” U vutisile, “Xana a wu ta famba loko muapostola Pawulo a a endzela vandlha ra hina vhiki leri?” U engeterile, “Xana u ehleketa leswaku Yesu a a ta lava leswaku u endla yini?”

Xi vhele xi bela etindleveni. Loko ndzi byela Tatana leswaku a ndzi nge wu ngheneli ntirho wa le Las Vegas, u vule leswaku ndzi onha vutomi byakwe. Vusiku byebyo u ndzi rindze a khome xibamu xakwe lexitsongo. A a lava ku ndzi dlaya, kambe u biwe hi vurhongo—kumbexana hikwalaho ka leswi a a pyopyiwe ngopfu. Kutani u ringete ku tidlaya egaraji hi chimele ya movha. Ndzi vitane va ta mphalalo, kutani va n’wi ponisile.

Leswi a va tiva ximbilwa-mbilwana xa Tatana, vo tala evandlheni ra ka hina a va n’wi chava, kambe mulanguteri wa hina wa xifundzha, Roy Dowell, a a nga n’wi chavi. Loko Roy a n’wi endzerile, Tatana u vule leswaku ku sele katsongo ndzi file loko ndzi velekiwa. Tatana u tshembise Xikwembu leswaku loko ndzo hanya u ta nyikela hi mina entirhweni wa xona. Roy u vutise tatana loko a tshame a ehleketa leswaku kumbexana Xikwembu se xa ndzi teka leswaku a hetisisa xitshembiso xa yena. Sweswo swi hlamarise Tatana. Kutani Roy u vutisile, “Loko ntirho wa nkarhi hinkwawo a wu ri kahle lerova wu nga endliwa hi N’wana wa Xikwembu, ha yini wena u nga fanelanga u wu endla?” Endzhaku ka sweswo, Tatana u vonake a xi amukela xiboho xa mina.

Hi nkarhi wolowo, hi January 1957, Shirley Large u tile a huma eCanada a ri ni phayona-kulobye va endzele vanghana va vona. Mina na Shirley hi sungule ku tolovelana loko ndzi fambe na vona evutirhelini bya yindlu ni yindlu. Endzhakunyana, Shirley u fambe na mina eHollywood Bowl, laha ndzi fikeke ndzi yimbelela na Pearl Bailey.

Ku Namarhela Xiboho Xa Mina

Hi September 1957, ndzi kume xiavelo xo va phayona ro hlawuleka etikweni ra Iowa. Loko ndzi byele Tatana leswaku ndzi endle xiboho xo amukela xiavelo lexi, u lo mpfikula. A a nga ri twisisi langutelo ra mina lerintshwa leri a ri ri ra nkoka swinene. Ndzi ye eHollywood kutani ndzi sula mintwanano hinkwayo leyi ndzi yi sunguleke. Fred Waring loyi a a dume hi okhestra tlhelo murhangeri wa ta vuyimbeleri, a a ri un’wana wa lava a ndzi endle ntwanano na vona. U ndzi byele leswaku a ndzi nge he pfuki ndzi kume ntirho wo yimbelela loko ndzi nga hetisisi xitshembiso xa mina. Hiloko ndzi n’wi byela leswaku ndzi tshika ntirho wa mina wo yimbelela leswaku ndzi ndlandlamuxa vutirheli bya mina entirhweni wa Yehovha Xikwembu.

Nkul. Waring a a yingisele hi vurhon’wana loko ndzi ri karhi ndzi andlala mhaka ya mina, hiloko a ndzi hlamarisa hi nhlamulo yakwe yo olova, a ku: “N’wananga, ndzi twa ku vava hileswi u tshikaka ntirho lowunene swonghasi, kambe mina a ndzi yimbelela vutomi bya mina hinkwabyo kutani ndzi dyondze leswaku ku ni swin’wana swa nkoka leswi munhu a nga swi endlaka ematshan’weni ya vuyimbeleri. Onge Xikwembu xi nga katekisa leswi u swi endlaka.” Ndza ha tsundzuka ndzi tlhelela ekaya ndzi ri karhi ndzi khapa-khapa mihloti ya ntsako, ndzi swi vona leswaku se ndzi ntshunxekile leswaku ndzi tirhela Yehovha vutomi bya mina hinkwabyo.

“Ri Kwihi Ripfumelo Ra Wena?”

Ndzi sungule ku tirha eStrawberry Point, le Iowa, edorobeni leri a ri ri ekule hi mpfhuka wa kwalomu ka 1 200 wa tikhilomitara, ndzi ri ni mutirhi-lulorhi, Joe Triff. Shirley u ndzi endzerile, hiloko hi bula hi ta vukati. A ndzi nga ri na mali, na yena a a nga ri na yona. Mali hinkwayo leyi a ndzi ri na yona a yi lawuriwa hi Tatana. Kutani ndzi te: “Ndzi lava ku ku teka, kambe hi ta hanya njhani? Mali leyi a ndzi ri na yona a ku ri $40 leyi a ndzi yi kuma hi n’hweti entirhweni wa mina wa vuphayona byo hlawuleka.” Hi ku titsongahata ni rito ro hola, ni hi ku kongoma u te: “Kambe Charles, ri kwihi ripfumelo ra wena? Yesu u vule leswaku loko hi lava Mfumo ni ku lulama ka yena ku sungula, u ta hi engetelela hinkwaswo leswi hi swi lavaka.” (Matewu 6:33) Sweswo swi lunghise timhaka. Hi cate hi November 16, 1957.

A ndzi dyondza Bibele ni n’wamapurasi un’wana ehandle ka doroba ra Strawberry Point loyi a a ri ni yindlu ya mapulanga leyi a yi aname ni ku leha kwalomu ka 3,7 wa timitara epurasini rakwe. Yindlu yoleyo a yi nga ri na gezi ni mati hambi ku ri swihambukelo. Kambe loko a hi swi lava, a hi ta tshama kona mahala. A ku ri tindlu letiya ta khale swinene, kambe hi xiye leswaku a hi ri evutirhelini siku hinkwaro naswona a hi lava byetlelo ntsena.

A ndzi ka mati exihlobyeni xa le kusuhi. A hi kufumeta yindlu leyi hi xitofu xa tihunyi kutani hi hlaya hi rivoni ra pharafini; Shirley a a sweka hi xitofu xa pharafini. A hi hlambela exibyeni lexikulu xa khale lexi a ku hlantsweriwa swiambalo eka xona. A hi yingisela mahlolwa nivusiku naswona hi titwe hi katekile hileswi a hi tirhela Yehovha hi ri swin’we laha ku nga ni xilaveko lexikulu xa vatirheli lava nga Vakreste. Bill Malenfant swin’we ni nsati wakwe, Sandra, lava sweswi va tirhaka eyindlu-nkulu ya misava hinkwayo eBrooklyn, a va ri maphayona yo hlawuleka laha a ku ri dzana ra tikhilomitara ku ya kona, eDecorah, le Iowa. A va tala ku hi endzela va ta tirha na hina nsimu siku hinkwaro. Hi ku famba ka nkarhi, ku ve ni vandlha leritsongo ra vahuweleri va kwalomu ka 25 eStrawberry Point.

ENtirhweni Wo Famba-famba

Hi May 1960 hi rhambiwile entirhweni wa xifundzha, ku nga vutirheli byo famba-famba. Xifundzha xa hina xo sungula a xi ri eN’walungu wa Carolina, naswona a xi katsa doroba ra Raleigh, Greensboro na Durham swin’we ni swidorobana swo tala swa le makaya. Ndlela leyi a hi hanya ha yona yi antswile hikuva se a hi tshama ni mindyangu yo tala leyi a yi tirhisa gezi swin’we ni swihambukelo swa le ndlwini. Hambiswiritano, xin’wana lexi a xi nga hi dyisi byi rhelela hileswi a hi kuma mindyangu leyi nga ni swihambukelo swa le handle. A va hi tsundzuxa leswaku hi tivonela eka tinyoka leti vuriwa ti-copperhead ni leti vuriwaka ti-rattlesnake loko hi ya eswihambukelweni swa le handle!

Eku sunguleni ka 1963 hi rhurhiseriwe exifundzheni xa le Florida, laha ndzi fikeke ndzi khomiwa hi vuvabyi bya pericarditis naswona ndzi pone ri ahlamile. A ndzi ta va ndzi file loko a ku nga ri Bob na Ginny Mackey va le Tampa lava ndzi pfuneke.c Va ndzi yise eka dokodela wa vona va tlhela va ndzi hakelela mali hinkwayo leyi a yi laveka.

Ndlela Leyi Ndzi Tirhiseke Ndzetelo Wa Mina Ha Yona

Hi ximumu xa 1963, ndzi rhambiwe ku ya tirha eNew York hikwalaho ka ntsombano lowukulu wa Timbhoni ta Yehovha lowu a wu ta khomeriwa kwalaho. Ndzi fambe na Milton Henschel, loyi a a ri muvulavuleri wa Timbhoni ta Yehovha, eka nongonoko wa xiya-ni-moya lexi a xi fambisiwa hi Larry King. Nkul. King wa ha ri ni ndhuma hi ku fambisa minongonoko ya thelevhixini. A a kombisa xichavo naswona enkarhini wa kwalomu ka awara endzhaku ko va nongonoko wu herile, u vutise swivutiso swo tala malunghana ni ntirho wa hina.

Hi ximumu xexo Harold King, la nga murhumiwa loyi a ha ku ntshunxiwa ekhotsweni ra Makhomunisi eChayina, a a endzele eyindlu-nkulu ya misava hinkwayo ya Timbhoni. Madyambu man’wana u vulavule ni vanhu va kwalomu ka 700, a va hlamusela mintokoto yakwe a tlhela a hlamusela ndlela leyi ripfumelo rakwe ri tiyisiweke ha yona loko a pfaleriwe malembe ya mune a ri swakwe ejele. Loko a ri ekhotsweni u tsale tinsimu leti nga ni tinhloko-mhaka leti fambisanaka ni Bibele ni vutirheli bya Vukreste.

Eka vusiku byebyo lebyi nga rivalekiki ndzi fambe na Audrey Knorr, Karl Klein na Fred Franz—lava nga Timbhoni ta khale lava leteriweke ku yimbelela hi rito ro lala—va yimbelele risimu leri nge “Hi Yindlu Ni Yindlu” leri hi ku famba ka nkarhi ri hoxiweke ebukwini ya tinsimu leyi tirhisiwaka hi Timbhoni ta Yehovha. Nathan Knorr, loyi a veke murhangeri wa ntirho wa Timbhoni, u ndzi kombele ku ri yimbelela eka vhiki leri landzeleke eka Nhlengeletano leyi nge “Mahungu Lamanene Lama Nga Heriki” eYankee Stadium.

Mintokoto Ya Le Ntirhweni Wo Famba-famba

Loko ha ha tirha eChicago, le Illinois, ku humelele swiendlakalo swimbirhi leswi nga rivalekiki. Xo sungula, enhlengeletanweni ya xifundzha, Shirley u vone Vera Stewart, loyi a n’wi dyondziseke ntiyiso swin’we ni mana wakwe eCanada exikarhi ka va-1940. Shirley loyi a a ri ni 11 wa malembe hi nkarhi wolowo a a tsake ngopfu loko a twa switshembiso swa Xikwembu eBibeleni. U vutise Vera a ku, “Xana u ehleketa leswaku ndzi nga hanya emisaveni yoleyo leyintshwa?” Vera u hlamule a ku, “A ndzi tivi leswaku u nga siveriwa hi yini, Shirley.” Havumbirhi bya vona a va ma rivalanga marito wolawo hi ku pakanisa. Ku sukela enkarhini wolowo loko a hlangana na Vera, Shirley a a swi tiva leswaku ku tirhela Yehovha hi swona leswi a a swi lava.

Xa vumbirhi, Mbhoni yin’wana yi ndzi vutisile loko ndza ha ri tsundzuka saka ra mazambhana leri tikaka 22 wa tikhilogiramu leri ndzi ri kumeke evhurandhini ya yindlu ya hina hi xixika xa 1958. Hakunene, a ndza ha ri tsundzuka. Hi ri kume endzhaku ka loko swi hi tikerile ku ya ekaya hikwalaho ka gamboko siku rin’wana nimadyambu! Hambileswi a hi nga swi tivi leswaku saka leri ri huma kwihi, hi ri tekile tanihi nyiko leyi humaka eka Yehovha. Gamboko yi hi sivele ku huma endlwini ku ringana ntlhanu wa masiku kambe hi tiphinile hi mazambhana lama hi ma katingeke, lama hi ma oxeke, lama tshakatiweke ni lama edliweke murhu! A hi nga ri na swakudya swin’wana. Mbhoni leyi a yi nga hi tivi naswona a yi nga ku tivi lomu hi tshamaka kona, kambe a yi twe leswaku ku ni maphayona man’wana ya le kusuhi lama a ma koka exilogweni. U vule leswaku ku ni nchumu wun’wana wu n’wi susumeteleke ku lavisisa lomu mpatswa lowa ha ku tekanaka wu tshamaka kona. Van’wamapurasi a va va tiva kahle vaakelani va vona, ku nga ri khale u n’wi kombe yindlu leyi a hi tshama eka yona, kutani u nghene egambokweni a rhwale saka ra mazambhana.

Ndzi Tsakisiwa Hi Swiboho Leswi Ndzi Swi Endleke

Hi 1993, loko ndzi hete malembe ya 33 entirhweni wo famba-famba, ndzi sungule ku vabya lerova ndzi boheke ku tshika lunghelo leri a ndzi ri na rona. Ku fikela namuntlha, mina na Shirley hi ve maphayona yo hlawuleka lama pfumeleriweke ku vika tiawara ta le hansi. Hambileswi ndzi twaka ku vava hileswi ndzi nga ha riki na matimba yo tirha entirhweni wo famba-famba, kambe ndza tsaka hileswi ndzi tirhiseke matimba ya mina entirhweni wa nkarhi hinkwawo.

Tindzisana ta mina tinharhu ti hlawule swilo swo hambana-hambana. Hinkwavo va hetelele va tiyimisele ku hlongorisa rifuwo, naswona a nga kona ni un’we la tirhelaka Yehovha ku fikela sweswi. Hi 1958, Tatana u khuvuriwile. Yena na Manana va pfune vanhu vo tala leswaku va tiva Yehovha, va tinyiketela eka Yena ni ku tlhela va khuvuriwa. Havumbirhi bya vona va fe hi 1999. Kutani xiboho xa mina xo ala ndhuma ya misava ni ku hlongorisa rifuwo xi nga ha va xi tisele tatana swin’we ni vanhu vo tala lava yena na manana va vulavuleke na vona hi ntiyiso wa le Bibeleni, vutomi lebyi nga heriki. A ndzi tshamela ku tivutisa, ‘Xana a ndzi ta hambeta ndzi tirhela Yehovha loko a ndzi nga endlaka xiboho lexi ndzi xi endleke?’

Endzhaku ka malembe ya kwalomu ka ntlhanu ndzi tshike ntirho wa ku va mulanguteri wa xifundzha, rihanyo ra mina ri sungule ku antswa naswona ndzi swi kotile ku ndlandlamuxa vutirheli bya mina. Sweswi ndzi mulanguteri la ungamelaka evandlheni ra Desert Hot Springs, le California. Nakambe ndzi ni lunghelo ro va mulanguteri wa xifundzha la khomelaka, ndzi xirho xa komiti yo hlawuleka naswona minkarhi yin’wana ndza dyondzisa eXikolweni xa Ntirho wa Vuphayona.

Ku fikela namuntlha Shirley wa ha ri munghana wa mina lonkulu. A nga kona un’wana loyi ndzi tsakelaka ku va na yena ku tlula Shirley. Minkarhi hinkwayo hi va ni mabulo lama akaka ya moya, havumbirhi bya hina hi tsakela tidyondzo ta Bibele leti hi vulavulaka ha tona. Ndza ha xi tsundzuka xivutiso lexi a ndzi vutiseke xona emalembeni lama tlulaka 47 lama hundzeke, lexi nge, “Kambe Charles, ri kwihi ripfumelo ra wena?” Loko mimpatswa leya ha ku tekanaka ya Vakreste yo vutisana xivutiso lexi, a ndzi tivi leswaku i yingani leyi nga vaka ni ntsako swin’we ni mikateko yo fana ni leyi hi veke na yona entirhweni wa nkarhi hinkwawo.

[Tinhlamuselo ta le hansi]

[Xifaniso lexi nga eka tluka 16]

Hi 1935, lembe leri bava-nkulu John a khuvuriweke ha rona

[Xifaniso lexi nga eka tluka 17]

Yindlu ya hina ya mapulanga

[Xifaniso lexi nga eka tluka 18]

Xifaniso xa 1975 xa vatswari va mina lava tshameke va tshembekile kukondza va fa

[Xifaniso lexi nga eka tluka 18]

Ndzi ri na Shirley namuntlha