Ku Landzelela Minkondzo Ya Vatswari Va Mina

HI KU VULA KA HILDA PADGETT

“Vutomi bya mina ndzi byi nyiketele ku tirhela La-nge-henhla-henhla, naswona a ndzi nge ti tirheli tihosi timbirhi,” xi hlayekisa xisweswo xiviko xa phepha-hungu. Marito wolawo ya mina lawa a ma ya eka valawuri va British Ministry of Labour and National Service hi 1941 ma nyikele xivangelo xa mina xo ala ku tirha exibedlhele hi nkarhi wa Nyimpi ya Vumbirhi ya Misava. Endzhakunyana ka kwalaho ndzi voniwe nandzu ivi ndzi gweviwa tin’hweti tinharhu ekhotsweni hikwalaho ka leswi ndzi aleke.

I YINI lexi ndzi ngheniseke ekhombyeni leri? E-e, a ku nga ri ku anakanya ka vun’wana kumbe mahanyelo ya ku xandzuka. Ematshan’weni ya sweswo, swivangelo swa kona i swa khale, loko ndza ha ri n’wana.

Ku Hisekela Ka Tatana Mfumo

Ndzi velekiwe hi June 5, 1914, eHorsforth ekusuhi ni le Leeds, le n’walungwini wa Nghilandi. Vatswari va mina, Atkinson na Pattie Padgett, a va ri vadyondzisi va Xikolo xa Sonto tlhelo swirho swa khwayere eKerekeni ya Primitive Methodist laha Tatana a a tlanga timbila kona. Loko ndza ha ri xihlangi, kaya ra hina a ri ri kaya ro tsakisa handle ka nchumu wun’we. Swiyimo swa misava a swi vilerisa Tatana. A a venga nyimpi ni madzolonga naswona a tshemba xileriso xa Bibele lexi nge: “U nga ṭhuki u dlaya.”—Eksoda 20:13.

Hi 1915 hulumendhe yi khutaze majaha hinkwawo leswaku ma nghenela vusocha hi ku tirhandzela leswaku ma papalata ku sindzisiwa. A ri karhi a kanakananyana Tatana u yime siku hinkwaro empfuleni a rindzele ku tsarisela ku va socha. Hi siku leri tlhandlamaka, vutomi byakwe hinkwabyo byi cincile!

Loko a ha tirha ku nghenisa tiphayiphi endlwini yin’wana leyikulu, u vulavule ni vatirhi-kulobye malunghana ni swiendlakalo swa misava. Mutirhi wa le xirhapeni u n’wi nyike xiphephana lexi nge, Gathering the Lord’s Jewels. Tatana u fambe na xona ekaya, a xi hlaya, a tlhela a xi hlayisisa. U te: “Loko ku ri ntiyiso, kutani leswin’wana hinkwaswo swi hoxile.” Siku leri tlhandlamaka, u kombele rungula leri engetelekeke, naswona u dyondze Bibele vusiku hinkwabyo ku ringana mavhiki manharhu. U swi tivile leswaku u kume ntiyiso! Eka Sonto, ya January 2, 1916, buku yakwe ya siku yi hlayekisa xileswi: “Ndzi ta ya eKerekeni ni mixo, ivi ndzi ya eI.B.S.A. [International Bible Students Association, hi laha Timbhoni ta Yehovha a ti tiviwa ha kona eNghilandi enkarhini wolowo] ni vusiku—ndzi dyondza Vaheveru 6:9-20—ndzi endzela vamakwerhu ro sungula.”

Hi ku hatlisa ku pfuke ku kanetiwa. Maxaka ni vanghana va hina va le kerekeni a va ehleketa leswaku Tatana a a penga. Kambe xiboho xona a a xi endlile. Xilo xa nkoka evuton’wini bya yena a ku ri minhlangano ni ku dyondza, naswona hi March u kombise ku tinyiketela kakwe eka Yehovha hi nkhuvulo wa mati. Endzhaku ka mavhiki ma nga ri mangani Tatana a tifambela a ri swakwe eminhlanganweni, Manana a nga ha alangi ku ya eminhlanganweni. U ndzi khandziyise phuremi ya mina ivi a famba nhungu wa tikhilomitara a ya eLeeds, loko a fika minhlangano a ya ha ku hela. Tatana a nga tikoti hi ku tsaka. Ku sukela kwalaho, ndyangu wa ka hina wu hlanganile entirhweni wa Yehovha.

Xiyimo xa Tatana a xi tika swinene—mutirhi wo tirhandzela evusocheni, kutani mavhiki ma nga ri mangani se wa ala hikwalaho ka vukhongeri. Loko a vitaniwa, u ale ku khoma xibalesa, xisweswo hi July 1916 u tengisiwe ro sungula eka ku tengisiwa ka ntlhanu ka le hubyeni ya timhaka ta vusocha, a gweviwa masiku ya 90 ekhotsweni. Endzhaku ka ku tirhela xigwevo xakwe xo sungula, Tatana u kume livhi ya mavhiki mambirhi, ivi a tlhela a gweviwa ehubyeni ya timhaka ta vusocha ku tshama masiku man’wana lama engetelekeke ya 90 ekhotsweni. Endzhaku ka xigwevo xakwe xa vumbirhi, u hundziseriwe eka Royal Army Medical Corps, naswona hi February 12, 1917, u fambisiwe hi xikepe lexi rhwalaka masocha a ya eRouen, le Furwa. Buku yakwe ya siku yi hlamusela leswaku kwalaho u nyenyetsiwe ngopfu hi xiyimo xakwe siku rin’wana ni rin’wana. U xiye leswaku a a ongola masocha leswaku ma ta tlhelela eku lweni.

Nakambe u arile ku tirha sweswo. Sweswi huvo leyi nga ni valanguteri va masocha yi n’wi gweve malembe ya ntlhanu ekhotsweni ra masocha ya Manghezi, eRouen. Loko Tatana a tshamela ku kombela leswaku a rhurhiseriwa ekhotsweni ra muti tanihi loyi a alaka ku nghenela vusocha hikwalaho ka vukhongeri, u nyikiwe xinkwa ni mati ku ringana tin’hweti tinharhu, endzhaku ka swona a tlhela a phameriwa kahle swakudya swa le khotsweni ku kondza a nyuhela nakambe; kutani a tlhela a nyikiwa xinkwa ni mati. Ni nhlekanhi a a tshama a bohiwe mavoko ma yisiwe endzhaku ivi ni vusiku ni hi minkarhi ya ku dya ma yisiwa emahlweni. Vutomi bya yena hinkwabyo, a a ri ni swivati emahlakaleni ya mavoko yakwe laha tinghomondo leti a ti ri titsongo a ti manyiwa kona ti tshikilela nyama yakwe, leti a ti vanga swilondza leswi mpfempfaka. Nakambe a a ri ni tinsimbhi ta milenge leti a ti boheleriwe ni xisuti xakwe.

Masocha lama lawulaka ma endle hinkwaswo leswi ma nga swi kotaka ku n’wi heta ntamu kambe ma tsandzeka. Ma n’wi tekele Bibele ni tibuku takwe. A a nga ma kumi mapapila lama humaka ekaya, na yena a a nga ta posa nchumu. Endzhaku ka malembe mambirhi u ringete ku kombisa ku nga hundzuki kakwe hi ku lan’wa swakudya. U endle tano ku ringana masiku ya nkombo, a nga dyi hambi ku ri kunwa, leswi vangeleke leswaku a rhurhiseriwa ekhotsweni ra le xibedlhele, a vabyela ku fa. U kombise ku nga hundzuki kakwe, hambi leswi a ku sale katsongo a file hikwalaho ka sweswo. Endzhakunyana ka malembe u pfumerile leswaku a a hoxisile hi ku veka vutomi byakwe ekhombyeni hi ndlela leyi, ni leswaku a nge he engeti nakambe.

Nyimpi yi hele hi November 1918 Tatana a ha ri ekhotsweni eRouen, kambe eku sunguleni ka lembe leri tlhandlameke, u yisiwe ekhotsweni ra muti eNghilandi. Hakunene a a tsakile ku kuma mapapila ni swiputsa swa Manana leswi a swi pakelanile, swin’we ni Bibele ni tibuku takwe ta risima! U yisiwe eKhotsweni ra le Winchester, laha a hlanganeke ni makwerhu lontsongo loyi a khomiweke hi ndlela leyi fanaka ni leyi na yena n’wini a khomiweke ha yona hi nkarhi wa nyimpi. Vito rakwe a ri Frank Platt, loyi endzhakunyana a tirheke eBethele ya le London malembe yo tala. Va hlele ku hlangana siku leri tlhandlamaka, kambe hi nkarhi wa kona Frank a a rhurhiseriwe kun’wana.

Hi April 12, 1919, Manana u kume thelegiramu: “Hoyohoyo! U vuya ekaya—yi huma eLondon.” Mawaku nkarhi wa ku tsaka konghasi endzhaku ka malembe manharhu ya ndzingo ni ku hambana! Xo sungula Tatana u ehlekete ku ba riqingho a hlangana ni vamakwerhu va le Bethele ya le London. U amukeriwe hi rirhandzu e-34 Craven Terrace. Endzhaku ko hlamba, ku tsemeta malepfu ni ku ambala sudu ni xihuku swo lombiwa, Tatana u tlhelele ekaya. Mawaku ndlela leyi a hi tsake ha yona! Enkarhini wolowo a ndzi ri ni malembe ya ntlhanu, naswona a ndzi nga ha n’wi tivi.

Nhlangano wo sungula lowu Tatana a yeke eka wona loko a ntshunxiwile a ku ri Xitsundzuxo. Loko a khandziya switepisi a nghena eholweni, loyi a nga hlangana na yena ro sungula i Frank Platt, loyi a yisiweke exibedlhele xa masocha eLeeds. Vona ntsako lowu va veke na wona loko va rungulelana mintokoto ya vona! Ku sukela kwalaho ku kondza a ntshunxiwa, Frank a hi endzela nkarhi na nkarhi.

Ntirho Wo Tshembeka Wa Manana

Nkarhi hinkwawo lowu Tatana a nga ri kona ha wona, Manana a a hlantswela vanhu swiambalo leswaku a engetela muholo lowu a wu nga nyawuri lowu a wu kuma eka mfumo. Vamakwerhu a va hi kombisa tintswalo. Vhiki rin’wana ni rin’wana un’wana wa vakulu a n’wi nyika mvhilopho leyitsongo leyi a yi ri ni tinyiko leti hi nga tiviki leswaku ti huma eka mani. Manana minkarhi hinkwayo a a vula leswaku i rirhandzu ra vamakwerhu leri n’wi tshineteke ekusuhi na Yehovha naswona ri n’wi pfuneke ku tiyisela eminkarhini yoleyo ya ndzingo. A a ya eminhlanganweni ya vandlha hi ku tshembeka nkarhi hinkwawo lowu Tatana a a nga ri kona ha wona. Ndzingo lowukulu lowu a langutane na wona, hi leswi hi nkarhi lowu tlulaka lembe, a nga swi tivi leswaku Tatana wa hanya kumbe u file. Lexi nyanyiseke swilo, hi loko hi 1918 havumbirhi mina na Manana hi khomiwe hi chachalaza ya le Spain. Vanhu a va fa hala ni hala. Vaakelani lava yeke ku ya pfuna vaakelani van’wana va khomiwe hi vuvabyi lebyi ivi va fa. Handle ko kanakana ku pfumaleka ka swakudya hi nkarhi wolowo ku endle leswaku vanhu va nga swi koti kahle ku hlula vuvabyi lebyi.

Marito ya muapostola Petro ma vonake ma tirha endyangwini wa ka hina: “Endzhaku ka loko mi twisiwile ku vava nkarhinyana, Xikwembu . . . xi [ta] . . . mi tiyisa, mi nga tsekatseki”! (1 Petro 5:10) Ku xaniseka ka vatswari va mina ku va pfune leswaku va va ni ripfumelo leri nga tsekatsekiki eka Yehovha, xitiyisekiso lexi heleleke xa leswaku wa hi khathalela ni leswaku ku hava lexi nga hi hambanisaka ni rirhandzu ra Xikwembu. Ndzi katekisiwe hi ndlela leyi hlawulekeke hi ku dyondzisiwa ko tano eripfumelweni.—Varhoma 8:38, 39; 1 Petro 5:7.

Ntirho Wa Vuntshwa

Endzhaku ka ku ntshunxiwa ka Tatana, ntirho wa Mfumo wu ve swakudya swa hina evuton’wini. A ndzi tsundzuki ndzi xwa eminhlanganweni, handle ka loko ndzi vabya. Hi ku hatlisa endzhaku ka ku vuya ka yena ekaya, Tatana u xavise plate camera yakwe ni sindza ra Manana ra nsuku leswaku a kuma mali yo ya entsombanweni. Hambi leswi a hi nga ri na mali ya ku endza, a hi lahlekeriwanga hi mintsombano leyi, ku katsa ni ya le London.

Malembe mambirhi kumbe manharhu endzhaku ka nyimpi ma ve nkarhi wo phyuphyisa. Tatana na Manana va yi tirhise hi ku helela minkarhi hinkwayo ku khutazana ni van’wana ni ku endla xinghana na vona. Ndza ha tsundzuka ni ndlela leyi a hi va endzela ha yona vamakwerhu, na mina, ndzi ri xinhwanyetana, ndzi ri karhi ndzi penda ni ku dirowa loko lavakulu va ri karhi va vulavula nkarhi wo leha malunghana ni matwisiselo lamantshwa ya ntiyiso. Ku vulavula swin’we, ku yimbelela hi fambisana ni timbila, ku tsakela ku va swin’we, ku va endle va tsaka swinene naswona va phyuphya.

Vatswari va mina a va tiyisa voko eku ndzi dyondziseni. Exikolweni a ndzi vonaka kahle leswaku ndzi hambanile ni van’wana, hambi loko ndza ha ri ni malembe ya ntlhanu, a ndzi famba na “Testamente Leyintshwa” ya mina leswaku ndzi ta yi hlaya loko tlilasi yi ri karhi yi dyondza ta vukhongeri. Endzhakunyana ndzi dyondzise emahlweni ka xikolo hinkwaxo ndzi ri “loyi a alaka ku nghenela vusocha hikwalaho ka vukhongeri” hikuva a ndzi nga ngheneli eku tlangeriweni ka Siku ra Xitsundzuxo.a A ndzi yi soli ndlela leyi ndzi nga dyondzisiwa ha yona. Entiyisweni, yi ve xisirhelelo naswona yi endle leswaku swi ndzi olovela ku tshama ‘endleleni yo khuma.’ Kun’wana ni kun’wana laha vatswari va mina a va ya kona, eminhlanganweni kumbe entirhweni, a ndzi nga sali.—Matewu 7:13, 14.

Ngopfu-ngopfu ndzi tsundzuka Sonto yoleyo ni mixo loko ndzi sungula ku chumayela ndzi ri ndzexe. A ndzi ri na malembe ya 12 ntsena. Ndzi tsundzuka hi Sonto yin’wana ni mixo loko ndza ha ri emalembeni ya kondlo-a-ndzi-dyi ndzi vula leswaku ndzi ta sala ekaya. Ku hava loyi a nga ndzi sola kumbe ku ndzi sindzisa leswaku ndzi huma, kutani ndzi tshame exirhapeni ndzi hlaya Bibele ya mina kambe ndzi titwa ndzi nga tsakanga nikatsongo. Endzhaku ka vhiki rin’we kumbe mambirhi ndzi endla tano, ndzi byele Tatana ndzi ku: “Ndzi ehleketa leswaku ndzi ta famba na wena mixo lowu!” Ku sukela kwalaho a ndza ha tlhelelanga endzhaku.

Hakunene lembe ra 1931 a ri ri rinene! A hi kumanga vito lerintshwa ntsena, leri nge Timbhoni ta Yehovha, kambe ndzi khuvuriwile loko hi ri entsombanweni eAlexandra Palace, le London. Ndzi nga ka ndzi nga ri rivali siku rero. Hi ambale swiambalo swo leha, swa ntima, kambe swa mina a swi tsakama hikuva ana se a swi ambariwe hi un’wana wa lava khuvuriweke!

Ku sukela ndza ha ri n’wana a ndzi navela ku va mukhalipotiya, hi laha vachumayeri va nkarhi hinkwawo a va tiviwa ha kona hi nkarhi wolowo. Loko ndzi ri karhi ndzi kula, ndzi vone leswaku ndzi fanele ku endla leswi engetelekeke entirhweni wa Yehovha. Xisweswo hi March 1933, loko ndzi ri ni malembe ya 18, ndzi nghene enxaxamelweni wa malandza ya nkarhi hinkwawo.

Ntsako wa hina wo hlawuleka a ku ri “Mavhiki ya Vuphayona” emadoroba-nkulu man’wana, laha a ku khitikana malandza ya nkarhi hinkwawo, a hi tshama ni vamakwerhu va kwalaho, ivi hi tirha hi ri ntlawa. A hi fambisa swibukwana eka varhangeri va vukhongeri ni le ka vanhu van’wana lava nga rhangelaka. A swi lava xivindzi ku va tshinelela. Hakanyingi a hi hlekuriwa naswona eka votala va hina, vini va miti a va hima swipfalo emahlweni ka vona. Leswi a swi nga hi vilerisi, hikuva a hi hiseka lerova a hi tsaka loko hi sandziwa hikwalaho ka vito ra Kreste.—Matewu 5:11, 12.

ELeeds hi tirhise phureme, xikanyakanya xa mavhilwa manharhu, xithuthuthu xa Tatana lexi nga ni golonyi etlhelo ka xona ku rhwala michini ya swi kurisa-pfumawulo, kutani endzhakunyana hi tirhise movha wakwe. Vamakwerhu vambirhi a va ya exitarateni ni muchini, ivi va tlanga rhekhodo ku endla leswaku vanhu va humela ehandle, ivi ku landzela nkulumo ya timinete ta ntlhanu leyi rhekhodiweke hi Makwerhu Rutherford. Kutani endzhaku ka sweswo a va hundzela exitarateni lexi landzelaka, loko hina vahuweleri hi landzela hi le ndzhaku hi fambisa tibuku ta Bibele.

Hi malembe yo tala, Sonto yin’wana ni yin’wana ni vusiku endzhaku ka nhlangano, a hi ya eTown Hall Square laha a ku ri ni Ndhawu ya Xivulavuri ivi hi seketela hi ku yingisela yin’wana ya tinkulumo to leha ku ringana awara, ta Makwerhu Rutherford, hi fambisa swiphephana ni ku vulavurisana na un’wana ni un’wana la kombiseke ku tsakela. Hi tiviwe kahle kwalaho. Hambi ku ri maphorisa a ma hi xixima. Madyambu man’wana hi hlanganile hi ntolovelo, endzhaku ka ku hlangana hi twa mpfumawulo wa vuyimbeleri ekule. Hi ku hatlisa ku te ntlawa wa Vafascist va kwalomu ka dzana va ri karhi va macha. Va mache va hi rhendzela ivi va yima va tlakulele mijeko ya vona ehenhla. Vuyimbeleri bya vona byi miyerile, ivi ku ku whii, loko rito ra Makwerhu Rutherford ri huwelela ri ku: “Va tshikeni va losa mijeko ya vona ni ku dzunisa vanhu loko va swi rhandza. Hina hi ta gandzela ni ku dzunisa Yehovha Xikwembu xa hina!” A hi nga tivi leswaku ku ta humelela yini! A ku humelelanga nchumu, handle ko va va kuma vumbhoni lebyinene, naswona maphorisa ma va miyetile leswaku hi ta kota ku twa nkulumo hinkwayo ya le rivaleni.

Sweswi gramafoni a yi tirhisiwa ku hi pfuna ku nyikela vumbhoni swinene. Emitini ya vanhu a hi honolela rhekhodo ku khutaza vanhu leswaku va yingisela dyondzo ya Bibele leyi rhekhodiweke ku ringana timinete ta ntlhanu ntsena. Hakanyingi vini va miti a va hi nghenisa endlwini naswona a va tsakela leswaku hi tlhela hi vuya hi ta tlanga tirhekhodo leti engetelekeke.

Lembe ra 1939 a ri ri ra mapfhundza naswona a ri tika hi laha ku engetelekeke, ku kanetiwa ni madzolonga. Ku nga si fika ntsombano wa hina, vamakwerhu va hlaseriwilenyana hi mintshungu ni ku beriwa pongo eswitarateni. Kutani hi nkarhi wa nhlengeletano, va hlele ntlawa wo hlawuleka wa vamakwerhu ku ya chumayela etindhawini leti nga ni madzolonga hi mimovha, loko vamakwerhu va xisati ni vamakwerhu van’wana va ya laha ku hlayisekeke. Loko hi ri karhi hi tirha hi ri ntlawa exitarateni xin’we, ndzi rhelele hi xindledyana xin’wana ku ya endzela tindlu leti nga hala ndzhaku. Loko ndza ha ri enyangweni, ndzi twe ku sungula hasahasa—a ku twakala ku huwelela ni ku bongosa exitarateni. Ndzi lo ya emahlweni ndzi vulavula ni munhu loyi a a ri endlwini, ndzi lehisa bulo ku kondza ndzi twa leswaku ku rhurile. Kutani ndzi huma hi xindledyana xexo ndzi boxeketa xitarata ivi ndzi kuma leswaku vamakwerhu a va tshukile loko va nga ndzi kumi! Endzhakunyana siku rero, vapfuxi va mpfilumpfilu va ringete ku kavanyeta nhlangano wa hina, kambe vamakwerhu va va humesele ehandle.

Nyimpi Ya Vumbirhi Ya Misava Yi Fika

Sweswi munhu a sindzisiwa ku nghenela vusocha, naswona vamakwerhu vo tala a va pfaleriwa ku ringana 3 ku ya eka ta 12 wa tinhweti. Tatana a a kume lunghelo leri engetelekeke, ra ku endzela makhotso. Sonto yin’wana ni yin’wana a a fambisa Dyondzo ya Xihondzo xo Rindza ekhotsweni ra kwalaho. Hi Ravunharhu ni vusiku a a endzela vamakwerhu eswitokisini swa vona. Hi ku va a pfaleriwe nkarhi wo leha naswona a ve ni ntokoto wo nonon’hwa ekhotsweni hi nkarhi wa nyimpi yo sungula ya misava, a swi tsakela ngopfu ku pfuna lava langutaneke ni miringo leyi fanaka. Leswi u swi endle ku ringana malembe ya 20, ku kondza a fa hi 1959.

Hi 1941 se a hi ma tolovela maxangu ni rivengo leri vanhu a va ri kombisa hikwalaho ka xiyimo xa hina xa vukala-tlhelo. A swi nga olovi ku yima eswitarateni ni timagazini u langutana na swona. Hi nkarhi lowu fanaka, hi tsakele ku pfuna vahlapfa lava a va tshama endhawini ya ka hina. Vanhu va le Latvian, va le Poland, va le Estonia ni va le Jarimani—mawaku ndlela leyi a swi tsakisa ha yona ku vona mahlo ya vona ma hatima hi ntsako loko va vona Xihondzo xo Rindza kumbe Consolation (sweswi ku nga Xalamuka!) hi ririmi ra vona vini!

Kutani ku landzele ku ringiwa ka mina hi xiyimo xa mina xa vukala-tlhelo lexi ndzi xi tekeke hi nkarhi wa Nyimpi ya Vumbirhi ya Misava. A ndzi pfaleriwa exitokisini ku ringana tiawara ta 19 eka tiawara ta 24 ta siku, vutomi bya le khotsweni a byi ndzi tikela. Masiku manharhu yo sungula a ma ndzi tikela ngopfu, hikuva a ndzi ri swanga. Hi siku ra vumune, ndzi vitiwe ehofisi ya mulawuri laha ndzi nga kuma vanhwanyana van’wana vambirhi va yimile. Wun’wana wa vanhwanyana lava u ndzi huwelerile a ku: “Xana u khomeriwe yini?” Ndzi te: “U ta hlamala loko wo swi tiva.” Hi loko a ndzi vutisa hi ku hlevetela a ku: “Xana u mu-JW?” Nhwanyana lowun’wana u hi twile ivi a hi vutisa havumbirhi bya hina a ku: “Xana mi ma-JW?” ivi hi vunharhu bya hina hi vukarhana. A hi nga ha ri hexe!

Ntirho Wo Tsakisa Wa Nkarhi Hinkwawo

Loko ndzi ntshunxiwa ekhotsweni, ndzi ye emahlweni ni ntirho wa mina wa nkarhi hinkwawo, naswona nhwanyana un’wana lontsongo wa malembe ya 16 hi vukhale loyi a a ha ku tshika xikolo u ndzi joyinile. Hi ye eIlkley, doroba ro saseka entsungeni wa Yorkshire Dales. Etin’hwetini ta tsevu hi ku helela, a hi ringeta hi matimba ku kuma ndhawu leyi faneleke ya minhlangano. Eku heteleleni hi qache garaji leyitsongo, leyi hi yi hundzuleke yi va Holo ya Mfumo. Tatana u hi pfunile, a hi lunghiselela swo voninga ni swo tisa ku hisa. U tlhele a hi sasekisela muako lowu. Hi malembe yo tala vandlha ra laha kusuhi a ri hi seketela, ri avela vamakwerhu vhiki rin’wana ni rin’wana leswaku va ta nyikela tinkulumo ta le rivaleni. Hi ku katekisiwa hi Yehovha hi humelerile ni ku engeteleka, ivi eku heteleleni ku simekiwa vandlha.

Hi January 1959, Tatana u sungule ku vabya. Ndzi vitaniwile ekaya, kutani u fe hi April. Malembe lawa ma landzeleke a ma tika. Manana u sungule ku vabya naswona a lahlekeriwa hi mianakanyo, leswi nga ndzi kayakayisa swinene. Kambe moya wa Yehovha wu ndzi pfune ku ya emahlweni, naswona ndzi swi kotile ku n’wi khathalela ku kondza a fa hi 1963.

Emalembeni wolawo hinkwawo ndzi kume mikateko yo tala leyi humaka eka Yehovha. Ku hlaya yona i ku twa ku xurha. Ndzi vone vandlha ra le kaya ri kula ivi ri avanyisiwa ka mune, ri rhumela vahuweleri ni maphayona, van’wana va ri varhumiwa ematikweni ya le kule ku kota Bolivia, Laos, na Uganda. A ndzi wu kumanga nkarhi wo tekiwa kumbe ku va ni muti. A swi ndzi khomisanga gome; a ndzi khomekile swinene. Hambi leswi ndzi nga hava maxaka, kambe ndzi ni vana ni vatukulu vo tala eHosini, lava phindhiweke ka dzana.—Marka 10:29, 30.

Hakanyingi ndzi rhamba vantshwa lava nga maphayona ni vantshwa van’wana ekaya ra mina leswaku hi hlangana hi ri Vakreste. Hi yi lunghiselela swin’we Dyondzo ya Xihondzo xo Rindza. Hi tlhela hi rungulelana mintokoto ni ku yimbelela tinsimu ta Mfumo, hi laha vatswari va mina a va endla ha kona. Hi ku va ni ntlawa wa vantshwa, ndzi languteka ndza ha ri muntshwa naswona ndzi tsakile. Ku hava vutomi byo antswa eka mina ku tlula ntirho wa vuphayona. Ndza n’wi nkhensa Yehovha hi ku va ndzi swi kotile ku landzelela minkondzo ya vatswari va mina. Ndzi khongela onge ndzi nga ya emahlweni ndzi tirhela Yehovha hi laha ku nga heriki.

[Nhlamuselo ya le hansi]

[Xifaniso lexi nga eka tluka 23]

Hilda Padgett a ri ni vatswari vakwe, Atkinson na Pattie

[Xifaniso lexi nga eka tluka 23]

Xiphephana lexi endleke leswaku Tatana a tsakela ntiyiso