Huvo Ya Le Yuropa Yi Seketela Timfanelo Ta Manana

Hi mutsari wa Xalamuka! eFurwa

HI December 16, 2003, Huvo ya le Yuropa ya Timfanelo ta Vanhu, leyi nga eStrasbourg, le Furwa yi vone huvo ya le Furwa nandzu wo kombisa xihlawuhlawu xa vukhongeri eka Séraphine Palau-Martínez, loyi a nga Mbhoni ya Yehovha.

Hi 1996, nuna wa Séraphine loyi a a n’wi siyile ku ringana malembe mambirhi u dlaye vukati. Naswona vana va vona vambirhi va nyikiwe Séraphine. Kambe hi 1997 hi nkarhi lowu vana a va tshama ni mana wa vona ku lava ku va malembe manharhu ni hafu, tata wa vona u ale ku va tlherisela eka mana wa vona endzhaku ka loko va n’wi endzerile. Séraphine wa hlamusela: “Loko ndzi landze vana exikolweni, nhloko ya xikolo yi vitane maphorisa. A ndzi fanele ndzi vona vana va mina ndzi rindziwe hi maphorisa ku tiyisekisa leswaku a ndzi vulavuli na vona hi ta vukhongeri bya mina. A ndzi tekiwa tanihi xigevenga. Ndzi byeriwe leswaku ndzi nga muka na vona ntsena loko ndzo tsala xihlambanyo lexi tiyisekisaka leswaku a ndzi nge he vulavuli na vona hi Xikwembu kumbe hi Bibele kumbe ku famba na vona eminhlanganweni ya Vukreste.”

Séraphine u kombele mpfuno eka huvo. Hambiswiritano, hi 1998, Huvo yo Endla Xikombelo ya le Nîmes yi nyike nuna wa yena mpfumelelo wo tshama ni vana. Yi seketele xiboho xa yona eka swisolo swo hambana-hambana leswi kombisaka leswaku tidyondzo leti Timbhoni ta Yehovha ti ti dyondzisaka vana va tona a hi tinene. Séraphine u ri: “Swa vavisa swinene ku hehliwa hileswaku ndzi onha vana va mina, kasi mina ndzi ringeta ku va dyondzisa leswi ndzi anakanyaka leswaku i swinene eka vona—ku va kurisa hi ndlela ya Vukreste.”

Loko Cour de Cassation, ku nga huvo-nkulu ya swivilelo ya le Furwa yi pfumelelane ni huvo leyi pfuxetaka milandzu, Séraphine u endle xiboho xo yisa mhaka leyi eka Huvo ya le Yuropa ya Timfanelo ta Vanhu. Loko ku endliwa xiboho, i munhu un’we ntsena la kokeleke etlhelo, lava tsevu va pfumelelane ni xiboho xa leswaku “a swi kanakanisi leswaku Huvo ya xivilelo ya le [Furwa] yi dyise manana loyi nandzu hikwalaho ka vukhongeri. . . . Ku khoma vanhu hi ndlela leyi i ku kombisa xihlawuhlawu.” Yi fikelele xiboho xa leswaku huvo ya le Furwa a yi endlanga xiboho xa yona hi ku ya hileswaku Séraphine a nga swi kota ku kurisa vana kumbe e-e—a yi swi kambisisanga sweswo—naswona a yi xi seketelanga eka tinhla leti twalaka, kambe yi xi seketele eka ndlela leyi “vanhu va ti langutaka ha yona Timbhoni ta Yehovha.” Huvo yi lerise tiko ra Furwa leswaku ri riha mali leyi tirhisiweke loko ku tengiwa nandzu lowu ni ku rilisa manana loyi hikwalaho ka xihlawuhlawu xa vukhongeri ni ku lwisana ni timfanelo ta Séraphine.

Xiboho lexi xi pfumelelana ni xiboho lexi endliweke hi Huvo ya le Yuropa ya Timfanelo ta Vanhu hi June 1993 emhakeni leyi fanaka ni leyi, laha Huvo yi hlamuseleke leswaku Austria ri kombise xihlawuhlawu eka Ingrid Hoffmann, loyi a nga Mbhoni ya Yehovha hikwalaho ka vukhongeri bya yena.a Phepha-hungu ra le nawini ra La Semaine juridique ra le Furwa ri te: “Hi ku pfumelelana ni xiboho lexi endleriweke Hoffmann, xiboho lexi xi tiyisekisa leswaku nandzu wa munhu wu nge avanyisiwi ntsena hileswaku i wa vukhongeri byihi.” Gqweta ra Séraphine ri te: “Xiboho lexi i xa nkoka swinene, tanihi leswi nawu lowu simekiweke hi Huvo wu hambetaka wu seketela timfanelo ta vatswari lava nga Timbhoni ta Yehovha leswaku na vona va avanyisiwa hi vululami.”

Loko a vutisiwa ndlela leyi a titwaka ha yona malunghana ni xiboho lexi endliweke, Séraphine, loyi sweswi a tshamaka eSpaniya, u ri: “Ndzi tsake swinene naswona ndzi ntshunxekile. Ku tekeriwa vana hikwalaho ka vukhongeri bya mina naswona ndzi nga va voni ku ringana ntlhanu wa malembe a swi ta ndzi dyisa mbitsi, kambe Yehovha u ndzi seketerile nkarhi hinkwawo. Ndzi tshemba leswaku nawu lowu wu ta pfuna ni van’wana lava nga exiyin’weni yo fana ni xa mina.”

[Nhlamuselo ya le hansi]

[Xifaniso lexi nga eka tluka 18]

Séraphine