Ku Lweriwa Ka Timbhoni Ta Yehovha eMhakeni Yo Kuma Vun’wini Bya Vana
INGRID HOFFMANN a a lwela ku kuma vun’wini bya vana vakwe vambirhi ku sukela exikarhi ka malembe ya khume lama hundzeke. Loyi i wansati wa le Austria, u velekiwile a tlhela a kuriseriwa eka Rhoma Khatoliki, u tekane ni Mukhatoliki-kulobye, naswona u veleke jaha hi 1980 ni nhwanyana hi 1982. Kambe hi 1983 mpatswa lowu wu hambanile; vatswari havambirhi va lava ku kuma vun’wini bya vana lava. Tatana u vule leswaku vukhongeri bya mana wa kona—loyi sweswi se a nga un’wana wa Timbhoni ta Yehovha—a byi ta vavisa vana, byi va sivela ku kula hi ndlela leyinene, leyi nga ni rihanyo. U boxe swilo swo tanihi ku ala ka Timbhoni ku tlangela tiholideyi to karhi leti tolovelekeke etikweni ra ka vona ni ku papalata ka vona mimpompelo ya ngati.—Mintirho 15:28, 29.
Minjhekanjhekisano leyi a yi pfunanga nchumu. Huvo ya milandzu ni huvo ya swikombelo yi ale marito ya tatana kutani yi pfumelela manana ku va n’wini wa vana lava. Hambi swi ri tano, hi September 1986, Huvo leyi Tlakukeke ya le Austria yi ale xiboho xa huvo ya le hansi. Yi vule leswaku swiboho leswi swi lwisana ni Nawu wa Dyondzo ya Vukhongeri wa le Austria, nawu lowu lavaka leswaku vana lava tswariweke hi Mukhatoliki va dyondzisiwa ku va Makhatoliki. Huvo yi tlhele yi vula leswaku ku ta va ku ri ku dyohela vana loko vo kurisiwa tanihi Timbhoni ta Yehovha!
Xana xi kona lexi Ingrid Hoffmann a ta xi endla malunghana ni xihlawuhlawu xexo xa vukhongeri? Hi February 1987 mhaka yakwe yi yisiwe eka Nhlangano wa le Yuropa wa Timfanelo ta Vanhu. Hi April 13, 1992, nhlangano lowu, lowu vumbiwaka hi magqweta lama yimelaka matiko yo hambana-hambana lama nga swirho swa Huvo ya Yuropa, wu yise mhaka leyi eka Huvo ya le Yuropa ya Timfanelo ta Vanhu leswaku yi tengiwa hi xitalo.
Huvo yi veke siku ra June 23, 1993. Yi te: “Hikwalaho ke, Huvo ya le Yuropa ya pfumela leswaku ku ve ni xihlawuhlawu xo karhi emhakeni leyi ni leswaku xihlawuhlawu lexi a xi vangiwa hi ku hambana ka vukhongeri; leswi swi seketeriwa hi marito lama tsariweke hi Huvo leyi Tlakukeke [ya le Austria], lama kombisaka mimbuyelo leyi yi nga tisiwaka hi vukhongeri bya muhehliwa. Xihlawuhlawu lexi xi kombisa rivengo.” [Xiitaliki i xerhu.] Nakambe yi kombisile leswaku Huvo leyi Tlakukeke “yi pime tinhla hi ndlela yo hambana ni tihuvo ta le hansi, leti mianakanyo ya tona a yi seketeriwa hi miehleketo ya vutlharhi bya vanhu. Loko ku ri ni mianakanyo yin’wana yo antswa leyi hambanaka ni leyi, yi nga phofuriwa, kambe xihlawuhlawu lexi vangiwaka hi ku hambana ka vukhongeri, xona a xi amukeleki.”
Ingrid Hoffmann u hlule Austria hi vanhu va ntlhanu eka mune eka vhoti leyi endliweke, naswona vaavanyisi va vule leswaku Austria ri n’wi langutele ehansi hi mhaka ya leswi a nga ni vukhongeri byakwe naswona ri lwisane ni mfanelo yakwe yo hlayisa ndyangu wakwe. Ku tlula kwalaho, eka vhoti leyi eka yona a hluleke hi vanhu va nhungu eka un’we, vaavanyisi va n’wi nyike mali ya ndziho.
Ku hlula loku lokukulu ka ntshunxeko wa vukhongeri a a ku tlhandlama kun’wana loku endlekeke n’hweti emahlweni ka loku, eka yona huvo leyi—nandzu wa Kokkinakis v. Greece, lowu kombiseke leswaku Greece ri lwisane ni mfanelo ya munhu ya ku dyondzisa Rito ra Xikwembu hi yindlu na yindlu. Varhandzi va ntshunxeko emisaveni hinkwayo va tsaka loko matshalatshala wolawo ya ku heta ntshunxeko wa vukhongeri ma siveriwa kutani ku sirheleriwa timfanelo ta vanhu ta ku gandzela Xikwembu ni ku kurisa ndyangu hi ku ya hi misinya ya milawu ya Bibele.