Hinkwerhu Ha Va Lava Vanghana

“Munghana i munhu loyi u nga vulavulaka na yena u ntshunxekile hi nchumu wun’wana ni wun’wana, loyi u nga n’wi belaka riqingho nkarhi wun’wana ni wun’wana.” —Yaël, Furwa

“Munghana wa swi twisisa loko u ri ni gome naswona u titwa hi ndlela leyi fanaka na yena.” —Gaëlle, Furwa

“KU NI munghana la namarhelaka ku tlula makwavo.” (Swivuriso 18:24) Ku sukela hi nkarhi lowu marito lawa ma tsariweke ha wona eBibeleni kwalomu ka 3 000 wa malembe lama hundzeke, munhu a nga si cinca. Munhu wa va lava vanghana ku fana nileswi miri wu lavaka swakudya ni mati. Kambe, vo tala swa va tikela ku kuma vanghana. Xivundza se xo va tshamelo maxelo. Carin Rubenstein na Phillip Shaver, ebukwini ya vona leyi nge In Search of Intimacy va ri: “A swi tiki ku xiya leswaku swi vangiwa hi yini.” Va vula leswaku “vanhu va rhandza ku famba”—va tshamela ku rhurha—“a va na xinghana, vugevenga emadorobeni” nileswi “vanhu se va tshamaka va hlalele thelevhixini ematshan’weni yo hlangana ni vanhu van’wana va dya mabulo.”

Vutomi bya manguva lawa byi hi dyela nkarhi ni matimba ya hina. Letty Pogrebin u tsale leswi landzelaka ebukwini ya yena leyi nge Among Friends: “Namuntlha vanhu lava tshamaka emadorobeni va hlangana ni vanhu vo tala hi vhiki ku tlula lava vanhu lava a va tshama emakaya va lembe-xidzana ra vu-17 va hlanganeke na vona hi lembe hambi ku ri vutomi bya vona hinkwabyo.” Leswi hi hlanganaka ni vanhu va madzana-dzana, swi nga hi tikela leswaku hi tolovelana ni munhu nkarhi wo leha leswaku hi aka vuxaka lebyikulu na yena.

Hambi ku ri etindhawini leti tolweni wa masiku vutomi a byi nga tsutsumi eka tona, kambe sweswi swiyimo swi cince hi ndlela yo hlamarisa. Ulla, la tshamaka eYuropa Vuxa u ri: “A hi tshama hi ri swin’we ni vanghana va mina. Kambe sweswi vo tala va khomeke ngopfu hi mintirho ya vona kumbe mahanyelo ya vona. Munhu un’wana ni un’wana u tshama a khomekile nkarhi ni nkarhi naswona hi vona onge vunghana bya hina bya hela.” Leswi manguva lawa hi tshamaka hi khomekile, hi nga ha tikuma hi nga ri na mhaka ni vunghana.

Hambiswiritano, hi swi navela ngopfu ku va ni vanghana. Vantshwa hi vona va swi navelaka ngopfu ku va ni vanghana. Yaël la boxiweke laha henhla wa hlamusela, “loko wa ha ri ntsongo, u lava ku amukeriwa ni ku titwa u ri munghana wa munhu un’wana.” Vantshwa kumbe vanhu lavakulu, hinkwerhu hi lava ku va lava tsakeke ni ku va ni vanghana lavakulu. Naswona ku nga khathariseki swiphiqo swo karhi, ku ni swilo swo tala leswi nga endlaka leswaku hi va ni vanghana va xiviri. Xihloko lexi landzelaka xi ta hi hlamusela mhaka leyi.