Swi Tsariwile Leswaku Ndzi Ta N’wi Vona

Hi ku vula ka Rosalía Phillips

“Swi ta ku fambela kahle swinene! U ni nyiko leyi nga ta ku pfuna leswaku swi ku fambela kahle!” Mukongomisi wa hina loyi a a tshame ekusuhi ni piyano yakwe u vule marito lawa endzhakunyana ka loko nguvu ya le xitejini yi pfulekile. Swirho swin’wana swa mune swa ntlawa wolowo swi ndzi amukerile. A ndzi tiambalele rhoko ya mina yo tshwuka, naswona a ku ri mina lontshwa eka ntlawa lowu. A ndzi chuhe ngopfu. Kwalaho, endzeni ka yin’wana ya tiyindlu ta mintlango ta nkoka eDorobeni ra Mexico, a ndzi humelela ro sungula eka ntirho wa mina wo hungasa vanhu! A ku ri hi March 1976 naswona a ndzi salele hi n’hweti leswaku ndzi hlanganisa lembe ra vu-18.

TATANA a a ri ni malembe manharhu a file naswona a ndza ha n’wi tsundzuka swinene. Hambi ku ri vanhu a va ha n’wi tsundzuka kahle. A a rhandziwa ni ku tsakeriwa tanihi leswi a a ri mutlangi wa switori la dumeke etikweni, naswona u humelele eka tifilimi leti tlulaka 120 hi nkarhi lowu mintlango ya le sinema a yi dumile le Mexico. Vito ra yena, ku nga Germán Valdés, “Tin-Tán,” a ri kombisiwile etindlwini ta mintlango eAmerika Xikarhi ni le Dzongeni swin’we ni le tindhawini leti ku vulavuriwaka Xipaniya le United States ni le Yuropa. Ninamuntlha, endzhaku ka malembe ya 30 a file, tifilimi ta yena ta ha kombisiwa hi ku phindha-phindha eka thelevhixini.

Ku sukela loko ndza ha ri xinhwanyatana, vanhu lava dumeke a va tala ku hlangana ekaya ka hina. Manana ni vasesi wakwe vanharhu va sungule ntlawa wo yimbelela lowu a wu vuriwa Las Hermanitas Julián (The Julián Sisters). Makwavo wakwe wa xinuna ku nga Julio Julián a a ri xiyimbeleri lexi dumeke xa tenor eYuropa, kasi nsati wakwe loyi a a huma eSpaniya la vuriwaka Conchita Domínguez, a a yimbelela soprano. Tlhandlakambirhi, tintsongwana ta tatana, Manuel “Loco” (lowa misavu) Valdés na Ramón Valdés, loyi a a tiveka hi vito ra Don Ramón, a va ri vaendli va mafenya lava dumeke eka thelevhixini.

Mina na buti Carlos a hi ti toloverile tindhawu to rhekhodela eka tona ni tindlu ta mintlango hikuva tatana hakanyingi a a famba na hina loko a ya kwalaho; hi swona leswi endleke leswaku ndyangu wa ka hina wu tshama wu ri ni vun’we. Hakunene a ku ri ni ku hambana lokukulu exikarhi ka ndhawu ya vuhungaselo ni le kaya, ekaya a ku ri ni ku twanana ni rirhandzu ra xiviri! Ndzi tsundzuka tatana tanihi wanuna wa migingiriko naswona a a rhandza vutomi. A a hanana swinene, hambileswi minkarhi yin’wana a a swi hundzeleta. U ndzi dyondzise leswaku ntsako u wu kuma hi ku hanana, ku nga ri eka swilo leswi u nga na swona.

Ku Cinca Loku Vavaka Swinene

Eku heleni ka lembe ra 1971, manana u byele mina na buti mahungu yo vava ya leswaku tatana u ni vuvabyi lebyi nga tshungulekiki. Ku hele lembe ni hafu, ndzi vona tatana a ri karhi a xaniseka, a ri karhi a tirhisa mirhi leyi nga ni matimba swinene leyi na yona a yi n’wi twisa ku vava.

Ndza ha ri tsundzuka siku leri ndzi nga vona ambulense yi ta ekaya yi ta n’wi teka yi n’wi yisa exibedlhele. A ndzi swi tiva leswaku a nge he vuyi. Ku vava loku ndzi ku tweke a ku hlamuseleki. Ndzi anakanye leswaku leswi tatana a a xaniseka, na mina a ndzi ta xaniseka. Ndzi time fole hi voko ra mina kutani ndzi rila hi xiviti lexikulu. Hi June 29, 1973, tatana u file. Ndzi sungule ku tivutisa: ‘Ha yini munhu lonene swonghasi, loyi a a endla leswaku hi tsaka, a fanele a hi siya? U kwihi sweswi? Xana a nga ndzi twa loko ndzi vulavula na yena? Xana ndza ha hanyela yini loko a nga ha ri kona?’

Ntirho-vutomi Lowu Nga Riki Na Xikongomelo

Endzhaku ka loko ndzi hlakarherile, ndzi sungule ku dyondzela ku khavisa tiyindlu. Minkarhi yin’wana a ndzi rhandza ku kokela etlhelo, xisweswo ndzi tshike xikolo. Mina na manana hi tinyike nkarhi wa ku va swin’we nkarhi wo tala. A hi ya eswinkhubyanini swa xiyimo xa le henhla swa vuhungasi. Hakanyingi, n’wini wa xinkhubyana xa kona a a tala ku gimeta hi marito lawa, “Rosalía, sweswi ndzi ta kombela u hi yimbelelela rin’wana ra tinsimu ta wena.” A va rhandza rito ra mina ni ndlela leyi a ndzi yimbelela ha yona, va vula leswaku ndzi swi teke eka tatana.

Eka xin’wana xa swinkhubyana sweswo, muqambhi ni mukongomisi wa ntlawa wa Arturo Castro and His Castros 76, u ndzi twe ndzi yimbelela kutani a ndzi kombela leswaku ndzi ya yimbelela ni ntlawa wa yena. Eku sunguleni, a ndzi nga swi tsakeli. Hambileswi a ndzi rhandza vuyimbeleri naswona a ndzi chaya katara ni ku qambha tinsimu ku sukela loko ndzi ri na 14 wa malembe, a ndzi nga swi lavi ku va xiyimbeleri. Kambe manana u ndzi khutazile, naswona a ndzi fanele ndzi pfuna ndyangu wa ka hina hi timali, kutani ndzi hetelele ndzi pfumerile. Sweswo swi endle leswaku ndzi endla leswi ndzi swi hlamuseleke eku sunguleni.

Loko ndza ha ku sungula, ntirho wa mina a wu famba kahle. Ntlawa wa hina wu endzele eMexico, wu ya tlanga vuyimbeleri kambirhi hi vusiku byin’we. A hi yimbelela eGuatemala, eVenezuela, eNew York ni le Las Vegas. Ndzi yimbelele ni ntlawa lowu ku ringana malembe mambirhi. Kutani ndzi nyikiwe ntirho wa ku tlanga eka tifilimi. Ndzi nyikiwe xiphemu xa ku va mutlangi-nkulu wa vumbirhi eka tifilimi timbirhi, eka leyin’wana, a ndzi nyikiwe xiphemu xa nkoka swinene, laha ndzi kumeke masagwadi mambirhi ya nkoka.

Siku rin’wana ndzi kume riqingho leri humaka eka vakongomisi va khampani ya thelevhixini ya nkoka swinene eMexico. Va ndzi tshembise kontraka yo hlawuleka ya “vatlangi-nkulu” va vona ni ku va murhangeri eka ntlango wa thelevhixini lowu a wu ta thyiwa vito ra mina. A ndzi ta va eka xiyimo xa le henhla eka swa vuhungasi. Mali a ndzi to yi nusa kunene hi xihuku, hambiloko ndzi nga tirhi nkarhi hinkwawo. Loko ndzi ehleketa leswaku sweswo hinkwaswo a swi nga ndzi faneli nileswi a ndzi chava ku lahlekeriwa hi ntshunxeko wa mina, a ndzi yi amukelanga kontraka yoleyo. Ndzi wu amukerile ntirho wo tlanga eka switori swa thelevhixini, leswaku ndzi ta hambeta ndzi dyondzela ku va mutlangi wa tifilimi eyunivhesiti. Hambiswiritano, a ndzi nga tsakanga. A swi ndzi karhata ku vona vatlangi va kayakaya malembe yo tala leswaku va ta va vatlangi-nkulu, kambe mina a ndzi nyikiwe leswaku ndzi rhangela—ntsena hileswi a ndzi ri n’wana wa Tin-Tán.

Kutani ndzi sungule ku rhekhoda. Ndzi sungule hi ku rhekhoda risimu leri a ri tlangiwa eka switori swa thelevhixini, leri ri qambhiweke hi mina. Endzhaku, ndzi rhekhodele endhawini leyi dumeke yo rhekhodela eka yona le London. Ndzi tlange tifilimi to tala ni switori swo tala swa thelevhixini. Ku sungule ku humesiwa swihloko leswi vulavulaka hi mina eka tluka ro sungula ra xiyenge xa vuhungasi eka maphepha-hungu, hikwalaho a wu ta ehleketa leswaku a swi ndzi fambela kahle ngopfu. Hambiswiritano, xin’wana a xa ha kayivela. Ndzi xiye ndlela leyi swiyimbeleri a swi titlakusa ni ku phikizana ha yona, naswona a swi tala ku tikhoma hi ndlela yo biha swi tlhela swi nga tshembeki. A ndzi nga ha va tshembi vanhu.

Kutani hi xixikana xa lembe ra 1980, ndzi vone Malume Julio exinkhubyanini xa ndyangu. U endle xiboho xo tshika vuyimbeleri, kutani ndzi n’wi twe a vulavula hi paradeyisi leyi Xikwembu xi yi tshembiseke. Malume Julio u vule leswaku vuhomboloki ni nhlomulo a swi nge he vi kona emisaveni naswona emisaveni hinkwayo ku ta va ni rirhandzu. U tlhele a vula leswaku vito ra Xikwembu xa ntiyiso i Yehovha. Lexi ndzi tsakiseke ngopfu a ku ri ku twa leswaku eParadeyisini, varhandziwa va hina lava feke va ta pfuxiwa. Ntshembo wa ku tlhela ndzi vona tatana wu ndzi tsakisile. Nkarhi hinkwawo a ndzi tshama ndzi ri karhi ndzi n’wi tsundzuka ni ku navela nseketelo ni rirhandzu ra yena. Hakunene swi ta tsakisa ku tlhela hi va na yena! Kambe a ndzi nga swi tshembi hilaha ku heleleke. Malume Julio u ndzi nyike Bibele a tlhela a rhamba mina na manana leswaku hi va kona entsombanweni wa Timbhoni ta Yehovha lowu a wu ta va kona endzhaku ka mavhiki ma nga ri mangani. Hi n’wi byele leswaku swi nga endleka hi va kona.

Ndzi Kunguhata Ku Cinca Vutomi Bya Mina

Siku rin’wana nivusiku a ndzi ri karhi ndzi dzaha, ndzi etlele emubedweni naswona ndzi ri eku hlayeni ka Bibele leyi malume a ndzi nyikeke yona. Leswi ndzi swi hlayeke eka buku ya Swivuriso swi endle leswaku ndzi gimeta hi ku vula leswaku ku vonakala, ku twisisa ni vutomi swi huma eka Xikwembu, kasi munyama, ku pfilunganyeka ni rifu swi huma kun’wana. Vusiku byebyo ndzi time fole ro hetelela kutani ndzi yimela manana. Ndzi ririle ndzi kombela manana leswaku a ndzi seketela eka swiboho leswikulu leswi ndzi swi endlaka. Endzhaku ka sweswo, ndzi ye endlwini ya mintlango laha a ndzi praktisa xiphemu xa Cordelia eka buku ya Shakespeare leyi vuriwaka King Lear. Ndzi tshike ntlango wolowo ndzi tlhela ndzi hambana ni xigangu xa mina, lexi a ku ri xona a xi rhangela vatlangi.

Hambiswiritano, a ndzi nga si dyondza ku tirhela Xikwembu, hikwalaho a ku nga ri na nchumu lowu ndzi tiyisaka. Ndzi ve ni ntshikilelo lowukulu. Ndzi khongele eka Xikwembu leswaku xi ndzi pfuna ndzi vona leswaku ndzi nga va nchumu wo karhi hi ku rhandza ka mina ku nga ri hileswaku ndzi tekelele nyiko yo karhi kumbe ku va munhu la dumeke. Ndzi tshike vanghana va mina hinkwavo ni mintirho leyi a ndzi yi endla.

Ndlela Leyi Yisaka Eku Humeleleni Ka Xiviri

Loko ndza ha pfilunganyekile, ndzi tsundzuke leswaku malume u hi rhambile leswaku hi ya entsombanweni. Ndzi n’wi bele riqingho, hiloko a ta a ta ndzi teka hi ya entsombanweni. Leswi ndzi swi voneke kwalaho swi ndzi tsakisile. Ndzi vone vanhu lava hlelekeke lava nga rhukaniki kumbe ku dzaha naswona a va nga ringeti ku tsakisa van’wana. Leswi ndzi swi tweke eBibeleni swi ndzi tsundzuxe leswi ndzi swi hlayeke exibukwanini lexi nge Is the Bible Really the Word of God?a lexi ndzi xi kumeke ekaya endzhakunyana ka ku fa ka tatana.

Hi nkarhi wolowo a ndzi byeriwe leswaku ndzi ta tlhela ndzi va mutlangi-nkulu eka xitori xin’wana. A ndzi xi tsakela xiphemu xexo, tanihi leswi a xi vonaka xi seketela misinya ya milawu leyi ndzi yi dyondzeke entsombanweni. Hikwalaho ka sweswo, ndzi pfumerile. Hi hala tlhelo, a ndzi tshama ndzi ri karhi ndzi anakanya hi leswi Bibele yi swi vulaka: “Mi nga paniwi ni lava va nga riki vapfumeri. Hikuva . . . ku vonakala ni munyama swi hlangana kwihi?”—2 Vakorinto 6:14.

Ku navela ku tsakisa Xikwembu a ku ya ku kula embilwini ya mina. A ndzi lava ku famba na malume ni nsati wakwe eminhlanganweni eHolweni ya Mfumo. A wu famba awara ku suka ekaya ku ya evandlheni ra ka vona, kambe eka Tisonto tinharhu leti landzeleke ndzi swi kotile ku ya. Malume u kunguhate ku ndzi yisa evandlheni leri nga endhawini ya ka hina. Hi fike loko nhlangano wu hela, naswona ndzi fike ndzi hlangana na Isabel, nhwanyana loyi a hi ri tintangha. A a titsongahata naswona a a ri ni musa. Loko malume a n’wi byele leswaku hi mina Rosalía Valdés, a nga kalanga a ri tekela enhlokweni vito ra mina. Sweswo swi ndzi tsakisile swinene. U kombele ku dyondza na mina Bibele ekaya ka hina.

Hi sungule ku dyondza buku leyi nge Ntiyiso Lowu Yisaka eVuton’wini Lebyi Nga Heriki.b Isabel u swi tsakerile ku cinca xiyimiso xa yena a xi twananisa ni xa mina. Nkarhi wun’wana a a boheka ku ndzi rindza ku kala ku va vusiku, endzhaku ka loko ndzi hete ku tlanga xitori xa mina. A swi ndzi tsakisa ku tiva leswaku ku ni munhu la ndzi rhandzaka hileswi ntsena ndzi lavaka ku dyondza ntiyiso lowu nga eBibeleni! A a ri munhu wo tshembeka naswona a a titsongahata, ku nga timfanelo leti a ndzi anakanya leswaku u nga tikuma ntsena hi ku dyondza filosofi ni vutshila byo karhi. Hi kunguhate ku dyondza nkarhi wo leha, minkarhi yin’wana ko hlayanyana hi vhiki.

Eku sunguleni a swi nga ndzi oloveli ku tshika miehleketo ya mina leyi hoxeke, kambe hakatsongo-tsongo ntiyiso wa Bibele wu yi hlurile. Ndzi tsundzuka ndlela leyi xitshembiso xa Xikwembu xi ndzi khutazeke ha yona: “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:10, 11) Nakambe, hi nkarhi wolowo ntshembo wa ku tlhela ndzi vona tatana eParadeyisini wu sungule ku va wa xiviri eka mina. A ndzi tshama ndzi anakanya marito ya Yesu lama nge: “Mi nga hlamaleni ha swona, hikuva nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma, lava endleke swilo leswinene va pfukela evuton’wini.”—Yohane 5:28, 29.

Ndzi hete ntirho wa mina wo tlanga xitori lexi, naswona a ku ri ni vanhu vo tala lava a va lava ku ndzi thola. Hambileswi ntirho wolowo a wu ta endla leswaku ndzi duma swinene, loko ndzi wu nghenela a swi ta vula leswaku ndzi amukela mahanyelo yo biha, vugandzeri bya swikwembu swa hava ni mianakanyo yin’wana ya mavunwa. Ndzi dyondze leswaku Sathana i wa xiviri nileswaku a nga swi lavi leswaku hi tirhela Yehovha. Kutani ndzi wu arile ntirho wolowo ivi ndzi sungula ku va kona eminhlanganweni hinkwayo. Manana ni makwerhu a va swi twisisanga leswaku ha yini ndzi tshika mintirho ni mali yo tarisa xileswi. Hambiswiritano, a va swi vona leswaku ndza cinca. Sweswi a ndzi tshama ndzi tsakile. Eku heteleleni, ndzi ve ni xikongomelo evuton’wini!

Ndzi navele ku byela van’wana hileswi a ndzi swi dyondza kutani ku nga ri kungani ndzi ve muhuweleri wa rungula lerinene ra Mfumo wa Xikwembu. Loko ndzi ri karhi ndzi chumayela, minkarhi yin’wana a swi tika leswaku n’wini wa muti a rhiya ndleve loko ndzi vulavula; vo tala a va ndzi teka tanihi munhu la endlaka swa vuhungasi. Minkarhi yo tala, mina ni munhu loyi ndzi fambaka na yena a hi fika emitini ya vanhu hi nkarhi lowu xitori lexi ndzi tlangeke eka xona xi tlangiwaka eka ti-TV ta vona. Vini va miti a va nga tshembi leswaku hi mina loyi ndzi yimeke enyangweni ya yindlu ya vona!

Ndzi khuvuriwe hi September 11, 1982, ndzi kombisa ku tinyiketela ka mina eka Yehovha. Se vutomi bya mina a byi ri ni xikongomelo xa xiviri naswona a ndzi lava ku endla ntirho wun’wana. Ku hiseka ka Isabel evutirhelini swi ndzi khutazile. A a ri phayona ra nkarhi hinkwawo, hilaha vatirheli va nkarhi hinkwawo lava nga Timbhoni ta Yehovha va vitaniwaka hakona. Ku nga ri kungani, a ndzi famba na yena loko a ya dyondza Bibele ni van’wana. Isabel u ve munghana wa mina lonkulu.

Leswi a ndzi tshike ntirho wa mina wa ku va mutlangi wa tifilimi hi ku helela, mina na manana a hi fanele hi hanya hi mali leyitsongo. Hi nkarhi wolowo, ndzi qambhe tinsimu ta albamu ya mina ya vumune, leyi nga ni tinsimu tin’wana leti vulavulaka hi ripfumelo ra mina lerintshwa. Ndzi tsale risimu leri vulavulaka hi ntshembo lowu tiyeke lowu ndzi nga na wona wo tlhela ndzi vona tatana. Risimu rero ndzi ri thye vito leri nge “Swi Tsariwile—Ndzi Ta N’wi Vona.” Manana a a tsake ngopfu siku leri ndzi nga n’wi yimbelelela rona ro sungula. U swi vonile leswaku ripfumelo ra mina i ra xiviri. A ndzi tsake ngopfu loko a vula leswaku u lava ku dyondza Bibele. Endzhaku ka malembe mambirhi, u ve nandza la khuvuriweke wa Yehovha. Ni sweswi wa ha hisekela ntirho wa nsimu.

Hi ku famba ka nkarhi, a swi ndzi olovela swinene ku ala mintirho leyi a ndzi nyikiwa yona. Naswona loko ndzi langutane ni ndzingo, ku anakanya hi ri na tatana eparadeyisini yo saseka a swi tiyisa ntshembo ni ku tiyimisela ka mina ku hambeta ndzi tirhela Yehovha.

Siku rin’wana ndzi komberiwe ku tlanga eka xitori xa Spaniya lexi vuriwaka Sesame Street, ku nga nongonoko wa vana. Ndzi vone leswaku a ndzi nga ta swi kota kutani ndzi byele mutsari wa xitori xexo leswaku misinya ya milawu ya Bibele a yi nge ndzi pfumeleli ku kondletela swilo swo fana ni tiholideyi ni masiku ya ku velekiwa. Mutsari u vule leswaku loko ndzo amukela ntirho lowu, u ta xixima ripfumelo ra mina naswona hi nga tsala ntwanano lowu hlamuselaka xiyimo xa mina. Hikwalaho ndzi pfumerile kutani ndzi tlange switori swa 200. Lowu a ku ri ntirho wo hetelela lowu ndzi wu tekeke tanihi mutlangi wa switori.

A ka ha ri ni ntwanano wun’we ntsena lowu a ndzi nga si wu hetisisa ni khampani yo rhekhoda; hikwalaho ndzi rhekhode tinsimu ta khume leti ndzi ti qambheke, ku katsa ni risimu leri ndzi ri qambheke leri a ri vulavula hi tatana ni ku pfuka ka vafi. Ndzi ve ni lunghelo ro humelela eka thelevhixini ndzi ri karhi ndzi yimbelela risimu rero, naswona nkarhi hinkwawo a ndzi hlamusela ripfumelo ra mina. Hambiswiritano, khampani yo rhekhoda yi sungule ku ndzi tshikilela leswaku ndzi kombisa swifaniso leswi khutazaka rimbewu. Ndzi tshike ntirho.

Mikateko eNtirhweni Wa Xikwembu

Hi December 1983, mina na Isabel hi valange miako ya Timbhoni ta Yehovha eBrooklyn, le New York. Kwalaho ndzi hlangane ni wanuna un’wana loyi endzhaku a veke nuna wa mina, Russell Phillips. Hi tsalelane mapapila ku ringana kwalomu ka malembe mambirhi. Ndza ha ri tsundzuka kahle siku leri ndzi sunguleke ntirho wa mina wa vuphayona bya nkarhi hinkwawo—Russell u ndzi rhumele swiluva ku suka le New York!

Ndzi phayone na Isabel ku ringana lembe. Kutani u komberiwe ku ya tirha erhavini ra Timbhoni ta Yehovha eMexico. Ndza swi tsundzuka leswaku bulo ra yena malunghana ni xiavelo xa yena lexintshwa ri endle leswaku ndzi navela ku ndlandlamuxa vutirheli bya mina, naswona loko Yehovha a swi rhandza, na mina a ndzi lava ku ya tirha eBethele.

Russell u ve nkateko evuton’wini bya mina. Hikwalaho ka leswi a a rhandza Yehovha ni nhlengeletano ya Yena, ndzi dyondze ku rhandza ntirho wa nkarhi hinkwawo. A a rhandza Bethele, naswona u tirhe eBethele ya le Brooklyn malembe manharhu. Endzhaku ka loko hi tekanile, hi phayone swin’we eColorado, le U.S.A. Endzhakunyana, hi komberiwe ku va vatirhi vo aka miako leyintshwa ya marhavi ematikweni hinkwawo. Hakunene a hi nga ha tikoti hi ku tsaka loko hi twa leswaku hi averiwe ku ya tirha eMexico! Hi April 1990, hi ve ni lunghelo ro va swirho swa ndyangu wa Bethele eMexico. Xikombiso xa Russell xi ndzi khutazile swinene. Ndzi rhandza moya wa yena wa ku tinyikela lowu n’wi susumeteleke ku siya tiko ra ka vona ni ndyangu wa ka vona leswaku a yisa timhaka ta Mfumo emahlweni laha Mexico.

Mina na Russell a hi ri rhandza swinene lunghelo ro tirha erhavini ra Mexico. Kambe swilo swi cince hi xihatla loko ndzi tika. Sweswo swi te hi nga swi langutelanga. Nilokoswiritano, a hi va rhandza vatswari lava kurisaka vana va vona entiyisweni, naswona hi xi amukele hi ntsako xiavelo xa hina lexintshwa. Hi October 1993, Evan u velekiwile naswona endzhaku ka malembe mambirhi ni hafu ku landzele Gianna. Hambileswi ku kurisa vana swi lavaka ku tshama hi ri karhi hi tikarhata, ha tsaka nkarhi hinkwawo loko n’wana wa hina wa malembe ya 11 ni wa malembe ya nhungu va bula hi ta ripfumelo ra vona loko va ri ensin’wini.

Sweswi, Russell u tirha eka Komiti yo Aka ya Xifundzha ya Tiholo ta Mfumo, kasi mina ndza ha ku tlhela ndzi nghenela vutirheli bya nkarhi hinkwawo tanihi phayona. Emalembeni ya 20 lama hundzeke, ndzi swi kotile ku pfuna mindyangu ya 12, ku katsa ni van’wana va nhungu, ku dyondza ntiyiso wa Bibele ni ku tirhela Yehovha.

Loko vana va mina va ndzi vutisa va ku: “Manana, xana a swi ku tikela ku sukela bindzu ra vuhungasi?” Ndzi tshaha marito ya muapostola Pawulo lama nge: “Hakunene . . . ndzi teka swilo hinkwaswo ku ri ku lahlekeriwa hikwalaho ka ntikelo lowu tlurisaka wa ku tiva Kreste Yesu Hosi ya mina. Hikwalaho ka yena ndzi pfumele ku lahlekeriwa hi swilo hinkwaswo naswona ndzi swi teka ku ri nhulu ya thyaka, leswaku ndzi kuma Kreste.” (Vafilipiya 3:8) Ndza n’wi tlangela swinene Yehovha hileswi a endleke leswaku ndzi tshika swilo leswi nga pfuniki nchumu kutani a ndzi pfumelela leswaku ndzi va un’wana wa vanhu vakwe lavanene! Nkarhi hinkwawo ndzi anakanya hi mikateko yo tala leyi a hi nyikeke yona hi ku tirhisa N’wana wa yena, Yesu Kreste. Hakanyingi ndzi yimbelela risimu leri ndzi ri tsaleke leri vulavulaka hi tatana. Ndza tiyiseka leswaku ndzi ta tlhela ndzi n’wi vona.

[Tinhlamuselo ta le hansi]

[Xifaniso lexi nga eka tluka 26]

Ndzi ri ni vatswari va mina na buti loko ndza ha ri ni lembe rin’we

[Xifaniso lexi nga eka tluka 28, 29]

Ndzi yimbelela ni ntlawa wa “Arturo Castro and His Castros 76”

[Xihlovo Xa Kona]

Angel Otero

[Xifaniso lexi nga eka tluka 30]

Ndzi ri ni ndyangu wa mina namuntlha

[Laha Xifaniso Xi Humaka Kona eka tluka 26]

Activa, 1979