Madokodela eMisaveni Leyi Cinca-cincaka

Hi 1174, Maimonides u ve dokodela wa tihosi ta le Egipta naswona a a heta nkarhi wo tala a ri exigodlhweni. Loko a hlamusela leswaku loko a fika ekaya siku rin’wana ni rin’wana a ri njhani, u tsale a ku: “A ndzi fika ndzi khomisa endzeni, ku va ku ri swona swakudya swa siku hinkwaro. Endzhaku ka sweswo ndza famba ndzi ya kambela vavabyi va mina ni ku va tsalela mirhi leyi va faneleke va yi tirhisa ni leswi va faneleke va swi endla. Vavabyi va nghena va tlhela va huma ri kondza ri pela naswona minkarhi yin’wana . . . ndzi fika ekaya ndzi karhele ndzi nga swi koti ni ku vulavula.”

KU VA dokodela swi lava ku tinyiketela nkarhi hinkwawo. Kambe misava leyi madokodela ma tirhaka eka yona namuntlha yi cinca hi ku hatlisa ku tlula hambi ku ri rini eku sunguleni. Xiyimiso xa ntirho wa vona xa karharisa ku fana ni lexiya xa Maimonides. Kambe, xana madokodela ma ha xiximiwa ku fana ni le ku sunguleni? Xana swiyimo leswintshwa swi yi khumbe njhani ndlela leyi madokodela ma hanyaka ha yona? Xana minhluvuko ya sweswinyana yi byi cince njhani vuxaka exikarhi ka dokodela ni muvabyi?

Ku Cinca Ka Vuxaka

Van’wana va nga ha tsundzuka nkarhi lowu dokodela a a rhwala mirhi hinkwayo hi bege yakwe ya ntima. Eminkarhini yoleyo madokodela a ma xiximiwa tlhelo a ma sandziwa, ku fana ni namuntlha. Vo tala a va xiximiwa hikwalaho ka vuswikoti, xikhundlha ni hi mahanyelo ya vona. Hambiswiritano, va nga ha tlhela va soriwa hikwalaho ko durha, va nga ha tekeriwa ehansi hikwalaho ko tsandzeka ni hikwalaho ka leswi va vonakaka onge a va na ntwela-vusiwana.

Nilokoswiritano, madokodela yo tala ma eneriseka hi ku pfuna ndyangu wun’we, ku nga vatswari, vana ni vatukulu va kona. Madokodela a ma hamba ma endzela emakaya ko hlayanyana, naswona etindhawini ta le makaya, minkarhi yin’wana a ma dya emakaya wolawo kumbe ma etlela kwalaho loko ku velekiwa n’wana. Madokodela yo tala a ku ri wona ma tekaka mirhi leyi lavekaka ma nyika vavabyi. Madokodela lama nga ni malwandla a ma tshungula swisiwana mahala naswona a ma kumeka nkarhi hinkwawo.

Ina, madokodela man’wana ma ha tirha hi ndlela yoleyo, kambe etindhawini to tala vuxaka exikarhi ka dokodela ni muvabyi byi cincile eka makume ya malembe lama hundzeke, a bya ha ri leswi a byi ri xiswona eka malembe-xidzana yo tala lama hundzeke. Xana ku cinca loku ku tise ku yini? A hi rhangeni hi vona mhaka yo endzela vanhu emakaya.

Ku Humelele Yini Hi Ku Endzela Vanhu eMakaya?

Ku endzela vavabyi emakaya ya vona a ku ri ndlela ya kahle yo va tshungula, naswona ematikweni man’wana swa ha ri tano. Kambe endlelo rero a ra ha tirhisiwi ngopfu ematikweni man’wana ya misava. The Times of India yi te: “Dokodela wa ndyangu a a swi kota ku tirhisana ni muvabyi, a a tiva ndyangu wa ka vona ni ku endzela muvabyi ekaya loko ku ri ni xilaveko, sweswi madokodela yo tala a ma ha swi koti hambileswi ma dyondzekeke ngopfu naswona ma nga ni vutshila.”

Hikwalaho ka ku andza lokukulu ka vutivi bya swa vutshunguri, madokodela yo tala ma dyondzele nchumu wo karhi hi vuenti naswona ma tirha ma ri ntlawa, leswi endlaka leswaku vavabyi va vonana ni madokodela yo hambana-hambana loko va vabya. Hikwalaho, madokodela yo tala a ma swi koti ku va ni vuxaka lebyikulu ni mindyangu leyi ma talaka ku yi tshungula, hilaha a swi ri hakona eku sunguleni.

Eka lembe-xidzana leri hundzeke madokodela ma sungule ku ka ma nga ha endzeli vavabyi emakaya, tanihi leswi a ma tirhisa ngopfu michini ya le laboratori ni michini yin’wana yo kambela mavabyi. Etindhawini to tala madokodela ma vone leswaku ku endzela vanhu emakaya i ku tlanga hi nkarhi wa dokodela. Namuntlha, vavabyi vo tala va swi kota ku kuma swo famba loko va ya eka dokodela. Lava xilamulela-mhangu ni vaongori va endla mintirho leyi a yi endliwa hi madokodela eku sunguleni.

Ku Cinca Ka Swiyimo

Namuntlha madokodela yo hlayanyana ma tilawula. Hakanyingi mintirho ya swa vutshunguri yi endliwa hi hulumendhe kumbe tikhampani tin’wana ta swa vutshunguri leti tholeke madokodela. Madokodela yo tala ma lava ku titirha. Hakanyingi lava va tholeke madokodela lawa va lava leswaku ma vona vanhu vo tala hi nkarhi lowutsongo. Dok. Sheila Perkins wa le Britain u ri: “Ndzi fanele ku vona muvabyi hi timinete ta nkombo ku ya eka khume. Nakambe nkarhi wo tala eka wolowo ndzi wu tirhisela ku nghenisa rungula ra muvabyi yoloye eka khompyuta. A wu kona nkarhi wo aka vuxaka ni muvabyi. A swi tsakisi sweswo.”

Misava leyi cincaka leyi madokodela ma tirhaka eka yona yi endle leswaku vavabyi va va ni rito ku tlula dokodela. Enkarhini lowu hundzeke “swileriso swa dokodela” a swi nga cinciwi. Namuntlha ematikweni yo tala, madokodela ma boheka ku byela muvabyi hi matshungulelo yo hambana-hambana lama nga kona ni makhombo lama nga ha vaka kona leswaku muvabyi a endla xiboho a ri ni vutivi. Vuxaka exikarhi ka dokodela ni muvabyi byi cincile. Eka van’wana, dokodela wo va kona hi vito, muvabyi hi yena a tiendlelaka swiboho.

Emisaveni ya hina leyi cincaka hi ku hatlisa, madokodela yo tala i vavasati. Madokodela ya xisati ma rhandziwa ngopfu hikuva ma tala ku va vayingiseri lavanene. Kutani sweswo swi endla leswaku ma va ni ntwela-vusiwana.

Vanhu vo tala va rhandza madokodela lama nga ni ntwela-vusiwana, lama twisisaka ndlela leyi vavabyi va titwaka ha yona ni ntshikilelo lowu va nga na wona. Kambe swa twala ku vutisa leswaku, I vangani vavabyi lava twisisaka ndlela leyi dokodela a titwaka ha yona ni ntshikilelo lowu a nga na wona? Ku twisisa sweswo swi nga antswisa vuxaka bya dokodela ni muvabyi. Xihloko lexi landzelaka xi nga ha pfuna emhakeni leyi.

[Xifaniso lexi nga eka tluka 17]

Maimonides

[Xihlovo Xa Kona]

Buti na ndzisana va ka Brown

[Xifaniso lexi nga eka tluka 18]

Khale madokodela a ma tala ku endzela vanhu emakaya