Ku Kuma Xihlovo Xa Eneji Hinkwayo

DYAMBU hi rona xihlovo lexikulu xa eneji leyi nga kona emisaveni. Van’wasayense vo tala va kholwa leswaku malahla ni oyili swi endliwe hi mirhi ni swimilana leswi boleke leswi kumeke eneji ya swona edyambyini.a Mati lama khulukelaka emichinini yo endla gezi leyi vekiweke emadan’wini, ma hisiwe hi dyambu elwandle kutani ma tlakuka ma ri mapapa. Miseve ya dyambu leyi kufumelaka yi tlhela yi fambisa moya lowu ndzulukisaka tinjhini leti tirhaka hi xipelupelu. Kambe, ku vuriwa leswaku i yitsongo swinene eneji leyi humaka edyambyini leyi fikaka laha misaveni.

Hambileswi yi nga ni matimba lamakulu ngopfu, nyeleti leyi hi yi tivaka tanihi dyambu yo va xin’wana xa swihlovo swa tibiliyoni swa eneji leswi kumekaka evuakweni. Xana matimba lawa hinkwawo ma huma kwihi? Loko a vulavula hi tinyeleti, mutsari wa Bibele Esaya u ri: “Tlakuselani mahlo ehenhla mi vona. I mani loyi a tumbuluxeke swilo leswi? Hi Loyi a humesaka vuthu ra swona hi nhlayo ya swona, hinkwaswo u swi vitana hi vito. Hikwalaho ka ku tala ka matimba lamakulu, nileswi a nga ni ntamu lowukulu, ku hava ni xin’we xa swona lexi pfumalekaka.”—Esaya 40:26.

Loko hi anakanyisisa hi matimba lamakulu ya tinyeleti, hi nga ha sala hi ahlamise nomu—a ha ha vuli loko hi ehleketa hi Muvumbi wa tona. Hambiswiritano, Bibele ya hi khutaza, yi ri: “Tshinelani eka Xikwembu, kutani xi ta tshinela eka n’wina.” (Yakobo 4:8) Ina, Muvumbi wa misava ni swihlovo swa yona swo tala swa eneji, yena la hi nyikeke vutomi, hi nga n’wi kuma loko hi n’wi lava.—Genesa 2:7; Pisalema 36:9.

Loko va vona misava ni rifuwo ra yona swi thyakisiwile ni ku aviwa hi ndlela yo biha, van’wana swi nga ha va tikela ku ehleketa leswaku Xikwembu xa khathala hi misava ni vanhu lava tshamaka eka yona. Nilokoswiritano, Bibele ya hi tiyisekisa leswaku ku nga ri khale ku ta va ni ku cinca, yi tshembisa ku cinca lokukulu ka ndlela leyi rifuwo ra misava ri aviwaka ha yona ni ndlela leyi misava yi fumiwaka ha yona. (Daniyele 2:44; Matewu 6:9, 10) Hi ku simeka mfumo wun’we wa le tilweni, lowu nga ta kongomisiwa hi N’wana wakwe, Kreste Yesu, Yehovha Xikwembu u ta tiyiseka leswaku munhu un’wana ni un’wana la hanyaka u ta kuma mpimo lowu ringaneke wa rifuwo ra misava. (Mikiya 4:2-4) U ta tlhela a “lovisa lava onhaka misava,” hileswaku, vanhu lava onhaka mbango, ku nga khathariseki leswaku hi tlhelo ra moya kumbe ra nyama.—Nhlavutelo 11:18.

Enkarhini wolowo xitshembiso lexi kumekaka eka Esaya 40:29-31 xi ta hetiseka hi tlhelo ra moya ni ra nyama, xona xi ri: “Loyi a karhaleke u n’wi nyika matimba; kasi loyi a nga riki na wona matimba lamakulu u n’wi engetelela matimba. Vafana va ta karhala, va hela matimba, ni majaha ma ta khunguvanyeka hakunene, kambe lava tshembaka Yehovha va ta tlhela va kuma matimba. Va ta tlakuka hi timpapa ku fana ni magama. Va ta tsutsuma va nga heli matimba; va ta famba va nga karhali.” Na wena u nga dyondza swo tala hi ta Xihlovo xa eneji hinkwayo naswona u nga kuma ndlela leyi nga yona ntsena yo tlhantlha swiphiqo swa eneji ya misava loko wo tinyika nkarhi wo dyondza Bibele.

[Nhlamuselo ya le hansi]