Ku Basuluka—Ku Cinca Ka Langutelo Hi Nhlonge

I YINI lexi u xi tekaka tanihi xikombiso xa leswaku munhu u hanye kahle? Xana i miri lowa buraweni, lowa van’wambhuri? Vanhu vo tala va le Yuropa ni va le Amerika N’walungu va swi tekisa xisweswo. Kambe a swi nga ri tano enkarhini lowu hundzeke. Emalembeni lama hundzeke, vavasati va le Yuropa a va ambala swihuku leswi a swi kota ku va endlela ndzhuti lowukulu naswona a va tamela swambhulele leswaku va tisirhelela edyambyini. Munhu wa nhlonge yo basulukanyana a a tekiwa a ri wa le vuhosini. Munhu la hisiweke hi dyambu a a tekiwa a ri mafukuzana.

Khale ka khaleni, swilo leswi sweswi swi tekiwaka swi ri ni chefu a swi tirhisiwa ku endla nhlonge leswaku yi va yo basa. Hi xikombiso, ku sukela le ndzhaku hi 400 B.C.E., Magriki a ma endla xikandza xa wona xi basa hi ku tirhisa mapa lama nga ni munyu wa ntsopfu. Poppaea Sabina, nsati wa Nero Mufumi wa Murhoma, u ma tirhisile mapa lawa ma nga ni chefu ku endla leswaku xikandza xakwe xi va xo basa. Eka lembe-xidzana ra vu-16, vavasati van’wana va le Italiya a va tirhisa khemikhali leyi vuriwaka arsenic ku tisasekisa. Kambe ku sukela loko muendli wa swiambalo wa le Furwa la vuriwaka Coco Chanel a endle leswaku ku rhandziwa nhlonge ya buraweni leyi hisiweke hi dyambu eku sunguleni ka va-1920, vanhu a va swi teka swi ri efexenini ku va ni nhlonge ya buraweni. Vanhu a va heta nkarhi wo tala va orhele dyambu.

Kambe, a hi vanhu hinkwavo lava rhandzaka ku va ehandle lava lavaka ku va ni nhlonge ya buraweni. A va swi rhandzi ku orhela dyambu. Va tsakela ku mbuweteriwa hi dyambu ni rimoyana leri va ri kumaka loko va ri elwandle ku ri ni ku hisiwa hi dyambu va va va buraweni. Ha yini nhlonge ya vona yi fanele yi sirheleriwa edyambyini?

[Xifaniso lexi nga eka tluka 3]

Eribuweni ku sukela eku sunguleni ka lembe-xidzana ra vu-20

[Xihlovo Xa Kona]

Majaha ya ka Brown