Ku Hanya Ni Khensa Ya Nhlonge

JEREMIAH la nga ni malembe ya 51 i muaki wa le Australia kambe la davukeke eIreland, u ni misisi yo tshwuka-xindzilo ni nhlonge yo basa bya masi, leyi van’wana va kombetelaka eka yona tanihi “ndzhukano wa Vacelt.” U ri: “Ku fana ni vanhu vo tala va le Australia, ndyangu wa ka hina a wu tala ku va ehandle, ngopfu-ngopfu hi mahelo-vhiki ni hi tiholideyi ta ximumu. Loko ndza ha ri n’wana, a ku hela tiawara to tala ndzi ri karhi ndzi hlambela edan’wini ra le kaya kumbe ndzi ya tlanga ematini kumbe ku ya tlanga khrikete etimbuweni ta Gold Coast, edzongeni wa Brisbane. Hakanyingi, a ndzo ambala xiburukwana xo hlambela ntsena.”

Jeremiah u ya emahlweni: “Kukondza ndzi nghena emalembeni ya kondlo-a-ndzi-dyi, a ku nga ri na mafurha yo tisirhelela edyambyini. Hi nkarhi wolowo vunavetisi a byi khutaza ngopfu leswaku munhu a tirhisa mafurha ya khokhonati leswaku a ta languteka ku fana ni vanhu va le Australia lava rindzaka van’wana elwandle, lava nga ni nhlonge ya buraweni. Hi nkarhi wolowo, a hi nga swi tivi leswaku dyambu ri nga onha nhlonge hi ndlela leyi. Ndzi sungule ku balekela dyambu loko nhlonge ya mina yi tshamela ku vava hikwalaho ka ku va ri ndzi hisile.” Kambe se a ri n’wi vavisile. “Leswi nhlana ni xifuva xa mina a swi hisiwe hi dyambu, ndzi sungule ku va ni mavalavala, lawa ma sunguleke ku va ya ntima naswona ma endla swilondza, ngopfu-ngopfu exifuveni.”

Ku sukela hi nkarhi wolowo, Jeremiah u tsemiwe marhumba manharhu ya khensa swin’we ni ti-basal cell carcinomas to tala. Hikwalaho ka leswi, u cince ndlela leyi a a endla swilo ha yona. U ri: “Ndzi tola mafurha ya nhlonge siku rin’wana ni rin’wana loko ndzi nga si huma endlwini. Kutani ndzi tola yo ndzi sirhelela edyambyini ehenhla ka wona. Masiku lawa ndzi tala ku vehela xihuku kumbe kepisi hi ximumu exikarhi ka awara ya 9:00 nimixo ku fika hi awara ya 4:00 nimadyambu.” Naswona u ya eka dokodela wa nhlonge leswaku a ya n’wi kambela endzhaku ka tin’hweti tin’wana ni tin’wana tinharhu.

Jeremiah u hlamusela leswaku i yini lexi n’wi pfuneke ku langutana ni xiyimo lexi: “Yehovha Xikwembu u ndzi nyike ntshembo lowu tiyeke wa leswaku ndzi nga ha langutela leswaku ndzi tshunguleka kasi vanhu vona a va ehleketa leswaku ndzi nga ha fa hambi ku ri rini. Tanihi leswi ku ehleketiwaka leswaku vanhu lava nga ni khensa leyi va hanya kwalomu ka 20 wa malembe, van’wana va vona ndzi ri ntsumbu lowu fambaka. Ndzi yi tokotile nhlamuselo ya marito ya Hosi Davhida la nga te: ‘Yehovha u ta [ndzi] seketela ehenhla ka mubedo wa vuvabyi; kunene sangu ra [mina] u ta ri cinca hi nkarhi wa ku vabya.’”—Pisalema 41:3.

Un’wana la xanisiweke hi khensa ya nhlonge i Maxine. Loko a ha ri muntshwa, Maxine la nga ni nhlonge yo vonikela, u rhumeriwe ematikweni ya Tropiki leswaku a ya va murhumiwa, u rhange hi ku rhumeriwa eRiphabliki ra Dominika kutani hi ku famba ka nkarhi a yisiwa ePuerto Rico. Ku ringana malembe ya 20, ntirho wakwe wa vurhumiwa a wu katsa ku nghena hi yindlu ni yindlu a ri karhi a chumayela naswona dyambu ri n’wi hisa siku hinkwaro. Tlhandlakambirhi, a a tsakela ku orhela dyambu hi nkarhi wa yena wo wisa. Kutani, hi 1971 ku kumiwe rhumba ra khensa enhlongeni yakwe. Va n’wi tshungule hi ku tirhisa radium kutani va n’wi endla vuhandzuri, va susa tinyama ta nhlonge leyi onhakeke va vehela letintshwa. Hambiswiritano, a ha kumeka a ri ni tisele tin’wana leti nga ni khensa.

Maxine wa hlamusela: “Xiphiqo lexi a ndzi langutane na xona hileswaku hakanyingi tisele leti nga ni khensa a ti tumbela, kutani ti ya emahlweni ti andza. Se ku hundze nkarhi wo leha ndzi ri karhi ndzi hanya ku tika—kwalomu ka 30 wa malembe ndzi endzela madokodela, titliniki ni swibedlhele. Ndzi endliwe vuhandzuri exikandzeni ka khume, ndzi tlhele ndzi ya exibedlhele xo hlawuleka leswaku ndzi ya tshunguriwa khensa leyi hi tindlela tin’wana.” Sweswi, Maxine la nga ni malembe ya 80 wa ha ku endliwa vuhandzuri bya Mohs, lebyi swi koteke ku dlaya tisele ta khensa.

Hikwalaho ka leswi khensa leyi a yi tlhela yi vuya, Maxine u boheke ku cinca nkarhi wa yena wa vutirheli, a chumayela nimadyambu leswaku a nga hisiwi hi dyambu. I yini lexi pfuneke Maxine leswaku a langutana ni vuvabyi lebyi? “A ndzi ri ni langutelo lerinene. A a ndzi swi tiva leswaku tisele ta khensa a ti ta tlhela ti vonaka nileswaku a ndzi ta boheka ku tlhelela eka dokodela. Ndza swi amukela sweswo. Ndzi ringeta leswaku ndzi nga titweli kumbe ku va ni gome hi ndzingo wa mina. Leswi a swi wu kavanyeti ntsako wa mina evutirhelini. Ndza ha ya emahlweni ndzi vulavula ni van’wana hi Mfumo wa Yehovha. Naswona ndza tshemba leswaku ndzi ta tshunguriwa hi ku helela emisaveni leyintshwa leyi nga le kusuhi. Kutani ndzi ta tlhela ndzi va ni xikandza lexintshwa, lexi hetisekeke.”

Ina, lava khomiweke hi vuvabyi bya khensa ni mavabyi man’wana va nga swi langutela hi mahlo-ngati ku hetiseka ka marito lama tsariweke ebukwini ya Yobo: “Nyama yakwe a yi ve yintshwa ku tlula evuntshweni; a a vuyele emasikwini ya matimba yakwe ya vuntshwa.” (Yobo 33:25) Loko ha ha rindze nkarhi wolowo, hinkwerhu a hi tivoneleni khombo ra ku heta nkarhi wo leha hi ri edyambyini naswona a hi endleni hinkwaswo leswi hi nga swi kotaka leswaku hi sirhelela nhlonge ya hina.

[Swifaniso leswi nga eka tluka 9]

Jeremiah u suse tinyama ta nhlonge yakwe leti a ti ri ni khensa, ku katsa ni marhumba manharhu ya khensa. Hambiswiritano, u ni langutelo lerinene naswona u ni ntshembo

[Swifaniso leswi nga eka tluka 10]

“Emisaveni leyintshwa . . . ndzi ta tlhela ndzi va ni xikandza lexintshwa, lexi hetisekeke.”—Maxine