Kaya Leri Baseke—Hinkwerhu Hi Hoxa Xandla

Hi mutsari wa Xalamuka! eMexico

AHI ku tsakisa ka swona ku tshama endhawini leyi baseke! Hambiswiritano, leswi thyaka ri engetelekaka emadorobeni, a swi olovi ku hlayisa ndhawu ya hina yi tshama yi basile naswona yi hlelekile.

Tihulumendhe ti ringeta hi matimba leswaku switarata swi tshama swi basile hi ku famba ti teketela thyaka, kambe ku nga khathariseki matshalatshala wolawo, etindhawini tin’wana u kuma thyaka ri pakelanile, ri nga languteki naswona sweswo swi xungeta rihanyo ra vanhu. Thyaka leri fumbaneke ri nga endla leswaku ku engeteleka makondlo, mahele ni switsotswana swin’wana leswi vangaka mavabyi. Xana ku ni leswi u nga swi endlaka hi xiyimo lexi? Ina, hlayisa kaya ra wena ni ndhawu leyi u tshamaka eka yona yi basile.

Langutelo Lerinene Ra Mianakanyo

Vanhu van’wana va ehleketa leswaku vusiwana hi byona byi endlaka leswaku ku va ni tindhawu kumbe makaya lama thyakeke. Kambe, entiyisweni a swi tano. Phela, ku swela swi nga endla leswaku swi tika ku hlayisa ndhawu leyi hi tshamaka eka yona yi basile. Kambe hilaha xivuriso xa Xipaniya xi vulaka hakona, “ku swela ni ku basa a swi lwisani.” Hi hala tlhelo, mhaka ya leswaku munhu u ni swa yena a yi tiyisekisi leswaku u ta hlayisa ndhawu leyi a tshamaka eka yona yi basile.

Ku basisa yindlu endzeni ni le handle swi ya hi ndlela leyi munhu a swi langutaka ha yona swilo naswona swi endla leswaku munhu a teka goza. Entiyisweni, ku endla leswaku kaya ri tshama ri basile swi titshege ngopfu hi langutelo leri ndyangu hinkwawo wu nga na rona. Hikwalaho, i swinene ku kambisisa ndlela leyi hinkwerhu hi nga hoxaka xandla ha yona leswaku kaya ra hina ri tshama ri basile, ku katsa ni ndhawu leyi hi tshamaka eka yona.

Xiyimiso Xo Basisa

Swi vonaka onge ntirho wa manana wa le kaya a wu heli. Ku tlhandlekela eka ntirho wo sweka ni ku lunghiselela vana leswaku va ya exikolweni, manana u fanele a tlhela a basisa endlwini ni le handle. Xana u swi xiyile leswaku hakanyingi manana hi yena la vungelelaka swiambalo kumbe swilo leswi vana va yena va swi siyeke swi hangalakile emakamareni ya vona? Xiyimiso lexinene xo basisa lexi katsaka ndyangu hinkwawo xi nga olovisela manana ntirho.

Vavasati van’wana va vone leswaku ku ni swilo leswi lavaka ku khathaleriwa ni ku basisiwa siku ni siku, kasi tindhawu tin’wana endlwini ti nga basisiwa kan’we hi vhiki, kasi tin’wana kan’we hi n’hweti. Entiyisweni, ku ni swilo swin’wana leswi ku nga hleriwaka leswaku swi basisiwa kan’we hi lembe. Hi xikombiso, eMakaya ya le Bethele, emiakweni ya marhavi ya Timbhoni ta Yehovha ematikweni yo hambana-hambana, un’wana ni un’wana u nyikiwa nkarhi wo tala kan’we hi lembe wo basisa kahle laha ku vekiwaka kona swiambalo. Wolowo i nkarhi wo lahla swilo leswi munhu a nga swi tirhisiki ni ku basisa ndhawu yoleyo. Nakambe ku ni xiyimiso xa nkarhi ni nkarhi xo basisa makhumbi.

Ku ni tindhawu tin’wana endlwini leti lavaka ku basisiwa ngopfu leswaku mavabyi ma nga mi hlaseli, ku fana ni le vuhlambelweni. Hambileswi u faneleke u basisa siku ni siku, kambe u fanele u yi basisa kahle kan’we hi vhiki leswaku switsongwatsongwana swi nga akeli kwalaho. Van’wana va anakanya leswaku swa boha leswaku ku va ni mavala exihambukelweni naswona a wu nge swi koti ku ma susa. Hambiswiritano, ku ni makaya lama nga ni swihambukelo leswi nga riki na xivati. Lexi lavekaka i ku basisa nkarhi ni nkarhi ni ku tirhisa swilo swo basisa leswi faneleke.

Khixi na rona ri fanele ri basisiwa hi vukheta. Hambileswi u hlantswaka swibye ni ku basisa xitofu ni le henhla ka tikhabodo siku ni siku—kumbexana minkarhi yin’wana—kumbexana kan’we hi n’hweti—i swa nkoka ku basisa hi vukheta, ku fana ni le ndzhaku ka xitofu ni le ndzhaku ka xigwitsirisi ni le hansi ka sinki. Ku basisa tikhabodo nkarhi ni nkarhi swi ta endla leswaku mahele ni switsotswana swi nga akeli kwalaho.

Ku Khomisana eNdyangwini

Vatswari van’wana va vekela vana va vona milawu naswona va va dyondzisile leswaku loko va ya exikolweni nimixo, va fanele va suka va songile, va veke swiambalo swa vona leswi nga ni thyaka ni swilo swa vona endhawini leyi faneleke. Nawu lowu pfunaka un’wana ni un’wana i wa leswaku, “Xin’wana ni xin’wana xi fanele xi vekiwa endhawini ya xona.”

Nakambe, swirho swin’wana swa ndyangu swi nga ha averiwa ntirho lowu swi faneleke swi wu endla ku basisa yindlu. Hi xikombiso, xana tatana wa basisa ni ku hlela swilo kahle egaraji kan’we hi lembe? Xana n’wana un’wana a nga n’wi pfuna ku endla tano? I mani loyi a khathalelaka byanyi ni ku byi tsema kahle? Xana leswi swi fanele swi endliwa kangani leswaku jarati ri tshama ri languteka? Xana yi kona yindlu ya swingolongondzwana leyi lavaka ku kamberiwa loko yi ri ni swilo leswi nga tirhiki leswi lavaka ku lahliwa leswaku yi tshama yi basile? Loko swi ri tano, i mani loyi a nga swi endlaka? Vatswari van’wana va nyika vana mintirho yo tano, va yi endla hi ku cincana.

Hikokwalaho, endla xiyimiso lexinene xo hlayisa kaya ra wena ri basile. Ku nga khathariseki leswaku wa tibasisela wena hi wexe kumbe u basisa ni ndyangu wa wena kumbe u thola un’wana leswaku a ta ku pfuna, i swa nkoka leswaku u va ni xiyimiso lexinene. Manana un’wana loyi a hlayisaka kaya rakwe ri basile u hi byele ndlela leyi ndyangu hinkwawo wu khomisanaka ha yona leswaku kaya ri tshama ri basile: “Mina ni tintombhi ta mina tinharhu hi avelana ntirho. Norma Adriana u basisa kamara ra vaendzi, makamara mambirhi yo etlela eka wona, vhurandi ni rivala. Ana Joaquina u basisa ekhixini. Ndzi hlantswa swiambalo ni ku endla mintirho yin’wana loko hi hala tlhelo María del Carmen a hlantswa swibya.”

Jarati Ri Fanele Ri Languteka

Ku vuriwa yini hi le handle ka yindlu? Ku nga khathariseki leswaku u ni dyiyindlu kumbe u ni xiyindlwana, swa laveka leswaku u endla xiyimiso xo basisa ehandle ka yindlu. Hi xikombiso, swi nga ha endleka meremere ya gede yi nga ha khomi. A swi nge languteki loko gede yi tshikiwa yi nga lunghisiwi kukondza yi wa. Swi tano ni hi thyaka leri fumbiweke enyangweni kumbe erivaleni. Hambi ku ri swikotela, switirho ni swin’wana leswi siyiweke emahlweni ka yindlu swi nga va ndhawu leyi switsotswana swi tumbelaka eka yona.

Mindyangu yin’wana yi kunguhate ku kukula ni ku basisa rivala kan’we hi siku kumbe vhiki ni vhiki loko ku thyakile, ku katsa ni laha ku fambiwaka kona ni le xitarateni lexi nga emahlweni ka yindlu, kan’we hi siku kumbe vhiki rin’wana ni rin’wana, loko swi laveka. I ntiyiso leswaku etindhawini tin’wana hulumendhe yi ni xiyimiso lexinene xo basisa kasi eka tin’wana ku hava xiyimiso xo tano. Handle ko kanakana, tindhawu leti hi tshamaka eka tona ti nga languteka ti sasekile naswona ti nga xungeti rihanyo ra vanhu loko hi endla leswaku ti tshama ti basile.

Mindyangu yin’wana a yo va ni xiyimiso xo basisa lexi boxiweke laha henhla ntsena kambe yi tlhela yi xi tsala ehansi, yi xi veka laha ndyangu wu nga ta xi vona ni ku xi landzela. Leswi swi nga pfuna swinene. Ina, a hi boxanga hinkwaswo leswi u faneleke u swi tiva malunghana ni ku basisa. Hi xikombiso, u fanele u tiva leswaku hi swihi swilo swo basisa ha swona leswi u nga swi tirhisaka ni switirhisiwa swa kona leswi fanelekaka endhawini ya ka n’wina leswi u nga kotaka ku swi xava.

Handle ko kanakana swiringanyeto leswi swi ta endla leswaku ndyangu hinkwawo wu xiya xilaveko xo endla leswaku kaya ni ndhawu leyi mi tshamaka eka yona swi tshama swi basile. Tsundzuka, ku hlayisa kaya ni ndhawu leyi mi tshamaka eka yona swi basile a swi titsheganga hi mali, kambe swi titshege hi langutelo ra n’wina ra mianakanyo.

[Bokisi leri nga eka tluka 16, 17]

Xiyimiso Lexinene Xo Basisa Kaya

Tirhisa ndhawu leyi seleke ku engetela tinhla tin’wana eka xiyimiso lexi

Xitsundzuxo xa nkoka: Ku pfanganisa tikhemikhali to basisa swi nga vanga khombo lerikulu, ngopfu-ngopfu papalata ku hlanganisa bleach ni amoniya

✔ Siku Ni Siku

❏ Kamara: Songa mubedo u tlhela u veka swilo kahle

❏ Khixi: Hlantswa swibye ni sinki. Basisa ehenhla ka tikhabodo ni le henhla ka matafula. Kukula ehansi kumbe u koropa loko swi fanerile

❏ Vuhlambelo: Hlantswa sinki ni xihambukelo. Veka swilo hi ndlela ya kona

❏ Kamara ra vaendzi ni tikamara tin’wana: Veka swilo hi ndlela ya kona. Sula-sula fanichara. Kukula, koropa kumbe u tirhisa muchini wo basisa ehansi loko swi fanerile

❏ Yindlu hinkwayo: Lahla thyaka hi mfanelo

✔ Vhiki Ni Vhiki

❏ Kamara: Cinca malakani ya mubedo. Kukula, koropa kumbe u tirhisa muchini wo basisa ehansi loko swi fanerile. Sula-sula fanichara

❏ Khixi: Hlantswa xitofu, switirhisiwa leswi nga ehenhla ka khabodo ni swin’wana ni swin’wana leswi fambisanaka ni sinki. Koropa ehansi

❏ Vuhlambelo: Hlantswa khumbi leri nga exawareni ni swin’wana leswi kumekaka kwalaho. Basisa xihambukelo, khabodo ni tindhawu tin’wana hi khemikhali ya ku dlaya switsongwatsongwana. Cinca mathawula. Kukula kumbe u koropa ehansi

✔ N’hweti Ni N’hweti

❏ Vuhlambelo: Hlantswa makhumbi hinkwawo ma basa paa

❏ Yindlu hinkwayo: Basisa tifireme ta tinyangwa. Basisa switulu

❏ Ntanga, jarati, garaji: Kukula u tlhela u basisa loko swi fanerile. Papalata ku fumba thyaka kumbe swilo leswi nga ha tirhiki

✔ Endzhaku Ka Tin’hweti Ta Tsevu

❏ Kamara: Hlantswa swo andlalela mubedo hi ku ya hi swiletelo swa kona

❏ Khixi: Humesa swilo leswi nga exigwitsirisini u tlhela u xi basisa kahle

❏ Vuhlambelo: Humesa swilo leswi nga etixelufini ni le tidirowarini kutani u basisa. Lahla swilo leswi nga ha tirhiki

❏ Yindlu hinkwayo: Basisa mavoni, tifene ni swin’wana leswi fambisanaka ni mavoni. Basisa tinyangwa. Hlantswa swisirhelelo swa mafasitere, mafasitere ni tifireme ta mafasitere

✔ Lembe Ni Lembe

❏ Kamara: Humesa swiambalo hinkwaswo laha ku tshamaka swiambalo kutani u basisa. Lahla swilo leswi nga ha tirhiki. Hlantswa minkumba. Sula-sula ritshuri emantarasini. Basisa swiseketelo hi ku ya hi swiletelo swa kona

❏ Khixi: Humesa swilo hinkwaswo leswi nga eka tixelufu, tikhabodo ni tidirowara kutani u basisa. Lahla leswi nga ha tirhiki. Susa switirhisiwa leswaku u ta kota ku basisa laha a swi vekiwe kona

❏ Yindlu hinkwayo: Hlantswa makhumbi hinkwawo. Basisa switulu ni makhetenisi hi ku ya hi swiletelo swa kona

❏ Garaji kumbe ndhawu yo veka swingolongondzwana: Kukula hi vukheta. Hlela kahle kumbe u lahla swilo leswi nga ha tirhiki

[Swifaniso leswi nga eka tluka 18]

“Xin’wana ni xin’wana xi fanele xi vekiwa endhawini ya xona”

[Swifaniso leswi nga eka tluka 18]

Swi nga pfuna ku hanana hi swilo leswi u nga ha swi tirhisiki