Ku Hanya Hi Ku Chava

ROXANAa wa chava ku byela nuna wakwe leswaku u lava ku khomanyana xikoropo. Loko a kombele nuna wakwe leswaku a n’wi nyika mali yo endzela mhani wakwe, u n’wi be ngopfu lerova Roxana u kale a lava vutshunguri. U hanya hi ku chava.

Rolando a a tala ku tshika nsati wakwe a vuya hi swo famba swa mani na mani nivusiku, kambe sweswi se u n’wi landza hi movha. Sweswi ku ni swiviko swo tala swa madzolonga endhawini ya ka vona lerova wa chava leswaku a nga ha hlaseriwa.

Haidé u tirha entsindza wa doroba. Siku rin’wana loko a muka, u tikume a rhendzeriwe hi vanhu lava a va macha naswona ku sungule madzolonga. Sweswi loko a twa leswaku ka machiwa, u khomiwa hi rhumbyana. U ri: “Ndzi titwa ndzi nga sirhelelekanga. A ndza ha swi lavi ku tirha laha. Kambe ndzi ta ya kwihi.”

Roxana, Rolando na Haidé se va hanya hi ku chava. Loko vanhu va boheka ku hanya hi ku chava, va nga ha titwa va nga ri na matimba. Ku chava ku nga ha endla leswaku va lahlekeriwa hi ntsako tanihi leswi ku nga ha va sivelaka ku endla leswi va lavaka ku swi endla. Vanhu va nga ha tshama va chuhile naswona sweswo swi nga ha kavanyeta ndlela leyi va ehleketaka ha yona.

Ku tshama u chuhile swi vanga ntshikilelo lowukulu. Hakanyingi swi vanga gome naswona swi nga ha vavisa rihanyo ra munhu. Magazini wa ta rihanyo wa hlamusela: “Ntshikilelo wu kavanyeta fambiselo ra nsawutiso naswona wu vanga mavabyi yo tala. Miri wu ta sungula ku hohloka, ngopfu-ngopfu swirho leswi khumbekaka. Munhu a nga ha va ni nsusumeto wa le henhla wa ngati, vuvabyi bya mbilu, vuvabyi bya tinso, ku pfimbelwa ekhwirini, swilondza, ku pandziwa hi nhloko, nkelunkelu, ntshikilelo ni ku vilela. Loko munhu a hlaseriwa hi swilo leswi nkarhi wo leha, u hela matimba.”

Emisaveni ya namuntlha, swi tolovelekile leswaku vanhu va hanya hi ku chava. Xana hi ta kala hi yi vona misava leyi vanhu va nga ta tsakela vutomi va nga chavi nchumu?

[Nhlamuselo ya le hansi]