Xana Ri Kona Tiva Ra Pinki Hakunene?

Hi mutsari wa Xalamuka! eSenegal

XANA swi nga endleka hakunene leswaku tiva ri va ra pinki? Tiva ra Retba ri vuriwa Tiva ra Pinki, naswona leswi ri nga eka mpfhuka wa 30 wa tikhilomitara ntsena ku suka ekaya eDakar, le Senegal, eAfrika Vupela-dyambu, hi teke riendzo ro ya tivonela hi hexe loko ri ri kona hakunene tiva ro tano. Loko hi fika, hi vone mati ma ri karhi ma hatima loko ma tlhaviwe hi dyambu. Kunene, a ku ri ni muhlovo wa pinki. Loyi a hi valangisa u vule leswaku miseve ya dyambu yi hlangana ni switsongwatsongwana ematini ivi ku huma muvala lowu wo hlamarisa. Kambe kwalaho, a wu voni ntsena tiva ra muvala wa pinki.

Ehansi ka mati lama nga entangiki ngopfu ya tiva, a hi munyu i tanani mi ta vona. Mati lawa ma ni munyu wo tala ngopfu naswona swa olova ku papamala ehenhla ka wona lerova hi xiye vaendzi van’wana va tiphina hi ku papamala ehenhla ka mati handle ko endla matshalatshala yo karhi.

Swi le rivaleni leswaku Tiva ra Pinki ri endla leswaku vanhu vo tala va kuma mali ya ku tihanyisa (1). Le mati ma helelaka kona, vatirhi va karhi va layicha munyu etilorini. Hi yime swa xinkarhana hi hlalela vanhu va kwalaho loko va ri karhi va humesa munyu etiveni. A hi vona vavanuna va nghene va fika hi le swifuveni etiveni, va cela munyu hi tipiki. A va wu cheletela emabakitini hi mafoxolo kutani va wu layicha emabyatsweni. Un’wana loyi a a tirha kwalaho u hi byele leswaku swi teka kwalomu ka tiawara tinharhu ku hlengeleta thani yin’we ya munyu. Mabyatso ya kona ma layichiwa ngopfu lerova ko sala katsongo leswaku ma mbombomela (2). Loko mabyatso ma fika eribuweni, vavasati hi vona va tekaka ntirho lowu, va rhwala munyu lowu hi mabakiti etinhlokweni (3). Loko va ri karhi va tirha swin’we, va wu tleketla.

Riendzo ra hina a ri tsakisa ngopfu. Tiva leri ra pinki hi xin’wana xa swihlamariso leswi endlaka leswaku misava ya hina yi va nyiko leyinene ngopfu leyi humaka eka Yehovha.—Pisalema 115:16.

[Laha Xifaniso Xi Humaka Kona eka tluka 18]

Xifaniso hi Jacques CLEMENT, Clichy, FRANCE at http://community.webshots.com/user/pfjc