Ndlela Ya Xiviri Yo Herisa Vangwa Leri

VANHU va timiliyoni emisaveni hinkwayo va wa va pfuka hambileswi va nga le vusiwaneni lebyikulu. Swi le rivaleni leswaku vanhu va lava hulumendhe yo lulama leyi nga riki na vukungundzwana, leyi swi tsakelaka hi mbilu hinkwayo ku herisa xiyimo lexi xa ku pfumaleka ka vululami. Hulumendhe yo tano yi fanele yi va ni matimba swinene yo hetisisa swikongomelo swa yona leswinene. Xana hi fanele hi rindzela leswaku vanhu va ta ni hulumendhe yo tano hakunene?

Matimu ma tiyisekisa ntiyiso wa xilemukiso xa Bibele lexi nge: “Mi nga tshembi vanhu va xiyimo xa le henhla, hambi ku ri n’wana wa munhu wa nyama, loyi a tsandzekaka ku ponisa.” (Pisalema 146:3) Xana u swi lemukile leswaku ku tshemba tihulumendhe ta vanhu kumbe varhangeri hakanyingi swi heta matimba? Kambe, i mani un’wana loyi hi nga n’wi tshembaka?

Entiyisweni, vanhu va timiliyoni va khongelele hulumendhe yo lulama leswaku yi ta tlhantlha swiphiqo leswi. Kumbexana na wena u khongele xikhongelo xa hosi lexi Yesu a xi dyondziseke lexi nge: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni. Hi nyike namuntlha xinkwa xa hina xa siku leri; naswona hi rivalele milandzu ya hina, tanihi leswi na hina hi rivaleleke lava nga ni milandzu eka hina. Naswona u nga hi nghenisi endzingweni, kambe hi kutsule eka lowo homboloka.”—Matewu 6:9-13.

Xana hi wona Mfumo lowu lowu hi wu lavaka? Xana wu lulamile naswona a wu na byona vukungundzwana? Xana wu ni matimba yo hetisisa swikongomelo swa wona leswinene? Handle ko kanakana, hi nga ku, ina! Xikwembu lexi simekeke hulumendhe leyi, “Tata wa hina la nge matilweni,” i “Xikwembu xo lulama ni Muponisi,” naswona xi “lulamile emintirhweni ya [xona] hinkwayo.” (Esaya 45:21; Daniyele 9:14) Ku vuriwe leswi malunghana na xona: “Mahlo ya wena ma tengile swinene, ku va ma vona leswo biha,” kutani ha tiyiseka swinene leswaku hulumendhe leyi a yi nge pfuki yi ve ni vukungundzwana. (Habakuku 1:13) Tanihi leswi ‘Xikwembu xi nga yiki hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama a amukelekaka eka xona,’ ha swi tiva leswaku xa khathala hi munhu ha un’we emisaveni.—Mintirho 10:34, 35; Varhoma 2:11.

Ana Se Wu Simekiwile Naswona Wa Tirha!

Hambileswi Mfumo wa Xikwembu wu nga hulumendhe ya le tilweni, wu ta kongomisa timhaka emisaveni leswaku wu hetisisa swikongomelo swa Xikwembu. Leswi swi katsa ku siva hulumendhe ya munhu hi hulumendhe leyi hetisekeke ya Xikwembu. Eka Daniyele 2:44 ku ni xitshembiso lexi: “Emasikwini ya tihosi [tihulumendhe] teto Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.”

Ehansi ka nkongomiso wa Mfumo lowu, ku rhandza ka Xikwembu ku ta endliwa emisaveni ni le tilweni. Mawaku ndlela leyi swi khutazaka ha yona ku tiva leswaku leyi ku ta va hulumendhe leyi nga ta herisa vuthala hinkwabyo bya ku pfumaleka ka vululami lebyi ku nga byona byi endleke leswaku ku va ni rifuwo ni vusweti lebyikulu! A ku nge he tlheli ku va ni vanhu va nga ri vangani lava fuweke ni vo tala lava nga swisiwana.

Swa tsakisa swinene ku tiva leswaku hulumendhe ya Xikwembu ya le tilweni ana se yi simekiwile leswaku yi ta tlhantlha swiphiqo leswi hilaha ku nga heriki! Ntlhandlamano wa minkarhi ya Bibele ni swiendlakalo swa le misaveni swi kombisa kahle leswaku lembe ra 1914 hi rona leri hulumendhe ya Xikwembu yi simekiweke ha rona etilweni.a Hikwalaho, enkarhini lowu se wu lavaka ku endla dzana ra malembe, hulumendhe leyi yi karhi yi veka xisekelo xa misava leyintshwa yo lulama.

Lava va xiyaka ku simekiwa ka Mfumo naswona va landzelaka nkongomiso wa wona a va ha ri na xona xihlawuhlawu. Timbhoni ta Yehovha ti ya emahlweni ni ntirho wa tona wo chumayela ematikweni yo tala ngopfu ya misava. Vanhu lava tshamaka ematikweni lawa, ku nga khathariseki leswaku va ni rifuwo kumbe e-e, va nyikiwa nkarhi wo dyondza ndlela yo kuma vutomi lebyi nga heriki. (Yohane 17:3) Timbhoni a ti pfumeli leswaku emavandlheni ya tona munhu a tekeriwa ehansi kumbe ehenhla ntsena hileswi a nga na mali kumbe a nga riki na mali. Vanhu a va tekiwi va ri va nkoka hi ku ya hi leswi va nga na swona. Kambe, va xiximiwa hileswi va nga xiswona. Ku kandziyisiwa ngopfu timfanelo ta moya ku ri ni swilo leswi vonakaka.

Xana u nga swi tsakela ku tiva leswaku u nga hanya njhani ehansi ka hulumendhe leyi yo lulama? Kutani, sungula ku lavisisa namuntlha. Dyondza ndlela leyi u nga ta hanya ha yona loko misava yi ta va yi nga ha pandziwanga hi rifuwo ni vusiwana.

[Nhlamuselo ya le hansi]

[Bokisi/Swifaniso leswi nga eka tluka 8, 9]

Hinkwavo I Vamakwavo, Hambi Va Fuwile Hambi I Swisiwana

◼ Eku heleni ka Nyimpi ya Vumbirhi ya Misava, Timbhoni ta Yehovha to tala eYuropa ni le matikweni ya le Vuxeni a ti pfumala swakudya, swiambalo ni tindhawu to tshama. Timbhoni leti tshamaka ematikweni man’wana ti rhumele swiambalo ni swakudya swo tala eka vamakwavo va moya lava nga eYuropa, ePhilippines ni le Japani. Timbhoni ta le United States ni le Canada ti hlenge swilo swo phalala leswaku swi rhumeriwa eAustria, eBelgium, eCzechoslovakia (sweswi ku nga Czech Republic na Slovakia), eFinland, eFurwa, eGrikiya, eHolland, eHungary, eItaliya, eJarimani, eNghilandhi, ePoland ni le Romania.

[Swifaniso]

United States

Switzerland

Jarimani

◼ Sweswinyana, hi ximumu xa 1994, ntlawa wa vatirhi va ku tirhandzela lava nga Timbhoni va le Yuropa wu tsutsumele eAfrika ku ya pfuna vamakwavo lava nga Vakreste. Ku simekiwe tikampa leti hlelekeke kahle ni swibedlhele swa le nhoveni le tikampeni ta le Rwanda. Ku rhumeriwe swiambalo swo tala, minkumba, swakudya ni minkandziyiso ya Bibele leswaku swi ya pfuna vanhu lava tlulaka 7 000 lava a va swerile—nhlayo leyi a yi phindheke hi mpimo lowu lavaka ku va kanharhu wa Timbhoni ta Yehovha leti a ti ri eRwanda hi nkarhi wolowo.

◼ Endzhaku ka malembe mambirhi, hi 1996, ku pfuke nyimpi evuxeni bya Democratic Republic of Congo. Mavele ma onhiwile, swakudya leswi a swi vekiwile swi phangiwile naswona swilo swo phalala swi siveriwe ku fika laha swi faneleke swi ya kona. Vanhu vo tala a va dya kan’we ntsena hi siku, leswi endleke leswaku va sika ni ku hlaseriwa hi mavabyi. Timbhoni ta Yehovha ta le Yuropa ti teke goza hi ku hatlisa. Ntlawa wo phalala wa Timbhoni, ku katsa ni madokodela mambirhi, wu nghene etikweni wu tamele mirhi ni mali. Hi June 1997, Timbhoni ta le Belgium, eFurwa ni le Switzerland ti nyikele hi 500 wa tikhilogiramu ta mirhi, tithani ta khume ta makokisi lama nga ni tiphroteyini to tala, 20 wa tithani ta swakudya, 90 wa tithani ta swiambalo, 18 500 wa tintangu na 1 000 wa minkumba—hinkwaswo swi fika eka R6,7 wa timiliyoni.

◼ Ku tlhandlekela eka swilaveko swa tona swa nyama, Timbhoni ta Yehovha ti tsakela ngopfu ku pfuna vanhu hi tlhelo ra moya. Hi swona leswi endlaka leswaku ti navela ku aka Tiholo ta Mfumo leti nga ta tirhisiwa ku dyondzisa vanhu hi tlhelo ra moya. Hi 1997 ku vikiwile: “Hi ku pfuniwa hi vamakwavo va le matikweni man’wana, Sosayiti [ya Watch Tower] yi swi kotile ku pfuneta eku akiweni ka 413 wa Tiholo ta Mfumo letintshwa ni ku pfuxeta tin’wana ta 727 hi tin’hweti ta mune ntsena ematikweni ya 75.” Hi 2003, xiviko a xi ku: “Exikarhi ka matiko ya le Yuropa lama vuyeriwaka hi lunghiselelo leri ra ku aka Tiholo ta Mfumo ematikweni lama pfumalaka a ku ri na Romania, laha ku akiweke Tiholo ta Mfumo ta 124 ku sukela hi July 2000. Hi ku tirhisa pulani leyi fanaka eka Tiholo ta Mfumo hinkwato, Ukraine yi ake 61 wa tiholo hi lembe ra 2001 ni tin’wana ta 76 hi 2002. Hi ku pfuniwa hi mali leyi nyikeriwaka eNkwameni wo Aka Tiholo ta Mfumo, ku akiwe Tiholo ta Mfumo to tala ngopfu eBulgaria, eCroatia, eMacedonia, eMoldova, eRhaxiya, eSerbia ni le Montenegro.”

[Swifaniso]

Croatia

Bulgaria

Romania

[Xifaniso lexi nga eka tluka 7]

Mutirhi wa ku tirhandzela u khathalela vana vambirhi va vahlapfa lava nga riki na vatswari

[Xihlovo Xa Kona]

© Liba Taylor/Panos Pictures

[Xifaniso lexi nga eka tluka 10]

Timbhoni ta Yehovha ti haxa rungula ra ntshembo

[Xifaniso lexi nga eka tluka 10]

Mfumo wa Xikwembu wu ta herisa vusweti