Xana Ndlala Yi Ta Hela eMisaveni?
EHLEKETA leswaku tatana la nga ni rirhandzu u titwa njhani loko a vona vana vakwe va sika hi ndlala. U twa ku vava lokukulu. Loko mutswari wa nyama a titwa hi ndlela leyi, ehleketa ndlela leyi Tatana wa hina wa le tilweni la nga ni rirhandzu a titwaka ha yona. Wa yi vona ndlela leyi vanhu va madzana ya timiliyoni lava nga exiyin’weni lexi va xanisekaka ha yona.
Hambileswi vanhu va nga ni makungu lamanene yo wundla vanhu lava sikaka, kambe vanhu lava sikaka va engetelekile eku sunguleni ka lembe-xidzana ra vu-21. Kambe, Tata wa hina wa le tilweni, Yehovha, a nga ha teka goza naswona u ta ri teka ku herisa ndlala hilaha ku nga heriki. Hi swi tivisa ku yini?
Bibele yi vula leswaku loko Xikwembu xi veka Adamu na Evha entangeni wa Edeni, xi va nyike hinkwaswo leswi a va swi lava leswaku va titwa va sirhelelekile, va enerisekile naswona va wundleke kahle. Xikwembu xi va byele xi ku: “Ndzi mi nyika swimila hinkwaswo swa vuandlalo bya misava hinkwayo leswi vekaka timbewu.” Yehovha a a lava leswaku vana va Adamu na Evha va “tata misava” nileswaku vanhu hinkwavo va va ni swakudya swo tala leswinene leswi va nga ta swi dya.—Genesa 1:28, 29.
Hambileswi mpatswa wo sungula wu xandzukeleke Muvumbi wa wona naswona a wu fularheleke, kambe xikongomelo xa Xikwembu hi vanhu a xi si cinca. Bibele yi vula leswaku Yehovha hi “Loyi a va nyikaka xinkwa lava nga ni ndlala,” naswona yi tamele vuprofeta byo tala lebyi kombisaka leswaku u ta herisa swiphiqo hinkwaswo leswi fambisanaka ni ku pfumaleka ka swakudya.—Pisalema 146:7.
Loko vadyondzisiwa va Yesu va kombela xikombiso kumbe vumbhoni lebyi kombisaka nkarhi lowu a nga ta simeka Mfumo wakwe ha wona ni ku nghenelela etimhakeni ta misava, Yesu u bule hi swiyimo leswi nga ta va kona emahlweninyana ka nkarhi wolowo. Xin’wana xa swona i “ku kayivela ka swakudya.” Ku kambisisa marito ya Yesu swi ta hi tiyisekisa leswaku ku xaniseka ka vanhu ku le kusuhi ni ku hela.a—Matewu ndzima 24.
Malunghana ni Paradeyisi leyi Xikwembu xi nga ta yi endla, Pisalema 72:16 yi profeta yi ku: “Ku ta va ni mavele yo tala emisaveni; ma ta khapakhapa etinhlohlorhini ta tintshava.” EIsrayele wa khale, hi ntolovelo mavele a ma mila etintshaveni. Kambe, eswiyin’weni leswi katekeke leswi hlamuseriwaka hi vuprofeta lebyi, timbewu leti byariweke hambi ku ri emakwandzasini, etindhawini to oma ni le ndhawini leyi nga riki na swakudya—leyi hi ntolovelo a yi nga ta mirisa nchumu—ti ta tswala ngopfu. Xichudeni xin’wana xa Bibele xi ri: “Hi nkarhi wa Mesiya, swi ta vonaka onge masimu ya mavele ma biwa hi moya ma ya hinkwako-nkwako, hambi ku ri etinhlohlorhini ta tintshava kumbe onge hiloko tintshava ti rimiwe ku fikela etinhlohlorhini ta tona, lerova etikweni hinkwaro ku ta va ku vonaka ntshovelo lowunene, wu ri karhi wu hungiwa hi moya.”
Vona ku hambana lokukulu loku nga kona exikarhi ka vumundzuku lebyi Bibele yi vulavulaka ha byona ni vutomi bya vanhu va timiliyoni namuntlha! Kunene, eka vumundzuku lebyi Xikwembu xi byi tshembisaka, “misava yi ta humesa swimila swa yona; Xikwembu, Xikwembu xa hina xi ta hi katekisa.”—Pisalema 67:6.
Loko u rhandza ku tiva ndlela leyi wena ni vanhu lava u va rhandzaka mi nga kumaka swilo leswi ha yona swin’we ni mikateko yo tala leyi hlamuseriwaka eka vuprofeta lebyi tsakisaka bya Bibele, u nga kanakani ku vutisa Timbhoni ta Yehovha endhawini ya ka n’wina kumbe ku tsalela eka adirese leyi faneleke eka leti nga eka tluka 5 ra magazini lowu.
[Nhlamuselo ya le hansi]
a Leswaku u tiva ndlela leyi vuprofeta bya Yesu byi hetisekeke ha yona, vona ndzima 11 ya buku leyi nge Vutivi Lebyi Yisaka eVuton’wini Lebyi Nga Heriki, leyi kandziyisiweke hi Timbhoni ta Yehovha.
[Xifaniso lexi tataka tluka hinkwaro lexi nga eka tluka 26]