Langutelo Ra Bibele

Ha Yini Hi Fanele Hi Lava Nkongomiso Wa Bibele?

“Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo.”—2 Timotiya 3:16.

XANA u ya kwihi loko u lava nkongomiso evuton’wini bya wena? Namuntlha ku ni switsundzuxo swo tala ngopfu emhakeni yin’wana ni yin’wana leyi u nga yi ehleketaka. Hambiswiritano, vanhu vo tala va lava nkongomiso ebukwini ya khale, ku nga Bibele.

Kambe, vanhu vo tala va teka Bibele yi nga ri ya nkoka, tanihi leswi namuntlha ku nga ni rungula to tala eka tikhompyuta ta manguva-lawa. Vadyondzisi ni van’wasayense van’wana lava xiximekaka va seketela vonelo ra leswaku Bibele a ya ha ri ya nkoka. Xana va tiyisile? Tanihi leswi namuntlha ku nga ni swihlovo swo tala swonghasi swa nkongomiso, ha yini hi fanele hi lava nkongomiso eBibeleni?

Buku Leyi Nga Ni Ntiyiso

Siku rin’wana Yesu Kreste a a wisile ekusuhi ni xihlovo a ri karhi a bula ni wansati wa Musamariya. U n’wi byele a ku: “Xikwembu i Moya, naswona lava va xi gandzelaka va fanele ku gandzela hi moya ni ntiyiso.” (Yohane 4:24) Marito lawa ma kombisa leswaku ku ni muxaka wa vugandzeri lebyi amukelekaka eka Xikwembu. Leswaku hi gandzela hi ntiyiso, vugandzeri bya hina byi fanele byi fambisana ni leswi Xikwembu xi swi paluxeke malunghana na xona n’wini eBibeleni. Rito ra Xikwembu ri tamele ntiyiso.—Yohane 17:17.

Hambiswiritano, ku ni vukhongeri byo tala lebyi vulaka leswaku byi tshemba Bibele naswona hinkwabyo byi ni tidyondzo ta byona hi ku hambana-hambana. Hikwalaho, a swi twisiseki leswaku hi swihi leswi kahle-kahle Bibele yi swi dyondzisaka. Xana Yesu i Xikwembu kumbe i N’wana wa Xikwembu? Xana ku ni vutomi endzhaku ka rifu kumbe a byi kona? Xana tihele i ndhawu ya xiviri laha vanhu va xanisiwaka kona loko va fa? Xana Sathana i munhu wa xiviri? Xana swi vula yini ku va Mukreste? Xana Xikwembu xa khathala hakunene hi swiendlo swa hina swin’we ni leswi hi swi anakanyaka? Xana rirhandzu ra ntiyiso ri nga endla leswaku vanhu va hlanganyela rimbewu emahlweni ka vukati? Xana swi hoxile ku nwa swakunwa leswi nga ni xihoko?a Vukhongeri byo tala byi vula leswaku byi dyondzisa ntiyiso etimhakeni leti. Kambe tidyondzo ta vukhongeri hakanyingi a ti pfumelelani. A swi nge endleki leswaku mavonelo wolawo hinkwawo ma ri ntiyiso.—Matewu 7:21-23.

Kutani u nga wu kuma njhani ntiyiso malunghana ni Xikwembu ni muxaka wa vugandzeri lebyi xi tsakisaka? A hi nge u kume leswaku u fanele u endliwa vuhandzuri leswaku u tshunguriwa xifo lexikulu. Xana a wu ta endla yini? Loko swi koteka, a wu ta endla hinkwaswo leswi u nga swi kotaka leswaku u kuma muendli wa vuhandzuri loyi a nga ni vuswikoti lebyikulu byo endla vuhandzuri byo tano. A wu ta lava ku tiyiseka leswaku hakunene dokodela yoloye wa faneleka naswona u ni ntokoto, kutani u vulavula na yena. Eku heteleleni, loko u tiyisekile hi ku vona vumbhoni byo karhi bya leswaku u ni vuswikoti, a wu ta n’wi tshemba kutani u pfumela leswaku a ku endla vuhandzuri. Van’wana va nga ha va ni vonelo rin’wana. Kambe wena se u ni swivangelo leswi twalaka swo tshemba muhandzuri loyi.

Hilaha ku fanaka, loko u endla nkambisiso lowu tshembekaka ni lowu hetisekeke wa vumbhoni lebyi nga kona, u nga va ni ripfumelo eka Xikwembu ni le Bibeleni. (Swivuriso 2:1-4) U nga ha tihlawulela leswaku u lava ku tikuma kwihi tinhlamulo ta swivutiso leswi khumbaka muxaka wa vugandzeri lebyi amukelekaka eka Xikwembu. U nga ha lava tinhlamulo eka tidyondzo leti pfilunganyaka swin’we ni le ka mavonelo ya vanhu kumbe u nga ha kambisisa langutelo ra Bibele.

Ya Pakanisa Naswona Ya Twisiseka

Loko u yi kambisisa kahle Bibele, u ta kuma vumbhoni lebyi tiyeke bya leswaku “Matsalwa hinkwawo ma huhuteriwe hi Xikwembu naswona ma pfuna.”b (2 Timotiya 3:16, 17) Hi xikombiso, Bibele yi ni vuprofeta byo tala. Ku ni vumbhoni lebyi tiyeke bya ku hetiseka ka vuprofeta lebyi. (Esaya 13:19, 20; Daniyele 8:3-8, 20-22; Mikiya 5:2) Hambileswi yi nga riki buku ya sayense, Bibele ya pakanisa hi tlhelo ra sayense. Yi vulavula hi ntumbuluko ni rihanyo lerinene leswi tsariweke magidi ya malembe lama hundzeke van’wasayense va nga si fikelela makumu lama fanaka.—Levhitika 11:27, 28, 32, 33; Esaya 40:22.

Ku tlula kwalaho, Bibele yi hi pfuna ku endla swiboho swa vutlhari. Yi ni switsundzuxo leswi pfunaka evuton’wini bya ndyangu, eka ta rihanyo ra nyama ni ra moya, ta bindzu ni timhaka tin’wana ta siku ni siku. Swivuriso 2:6, 7 yi ri: “Yehovha u nyika vutlhari; enon’wini wakwe ku ni vutivi ni ku twisisa. Lavo lulama u ta va hlengeletela vutlhari lebyi pfunaka.” Hi ku lava nkongomiso eBibeleni, u nga letela matimba ya wena yo twisisa leswaku u “hambanisa leswi lulameke ni leswi hoxeke.”—Vaheveru 5:14.

Rito ra Xikwembu ri tlhela ri hi pfuna ku twisisa xikongomelo xa vutomi. (Yohane 17:3; Mintirho 17:26, 27) Ri hlamusela leswi swiyimo swa misava swi vulaka swona. (Matewu 24:3, 7, 8, 14; 2 Timotiya 3:1-5) Eka rona Xikwembu xi hi komba ndlela leyi xi nga ta byi susa ha yona vubihi emisaveni kutani xi endla leswaku vanhu va va ni rihanyo lerinene ni ku hanya hilaha ku nga heriki.—Esaya 33:24; Daniyele 2:44; Nhlavutelo 21:3, 4.

Vanhu va timiliyoni va swi xiyile leswaku hakunene Bibele i xihlovo lexi tshembekaka ni xa vutlhari lebyi pfunaka. Vakandziyisi va Xalamuka! va ku rhamba leswaku u kambisisa ntlhandlamano wa swihloko leswi nge “Langutelo Ra Bibele,” leswi humaka enkandziyisweni wun’wana ni wun’wana wa magazini lowu. Hi ku endla tano, u nga kuma vumbhoni lebyi engetelekeke lebyi kombisaka leswaku Bibele i xihlovo xo antswa lexi nga kongomisaka vutomi bya wena.

XANA U TSHAME U TIVUTISA LESWI?

◼ I vugandzeri bya njhani lebyi Xikwembu xi byi amukelaka?—Yohane 4:24.

◼ I yini leswi u nga swi endlaka leswaku vutlhari bya Xikwembu byi ku pfuna?—Swivuriso 2:1-4.

◼ Bibele i xihlovo xa nkongomiso lowu pfunaka hi ndlela yihi?—Vaheveru 5:14.

[Tinhlamuselo ta le hansi]