Ku Navela Ku Rhandziwa

Khale swinene endhawini leyi namuntlha ku nga ni doroba leri vuriwaka Turkey, a ku tshama nhwanyana la vuriwaka Leya. Leya a a nga sasekanga kambe ntsongwana yakwe Rahele, a a sasekile.

RAHELE u hlangane ni wanuna loyi a a n’wi rhandza swinene lerova u pfumele ku tirhela tata wakwe malembe ya nkombo leswaku a ta n’wi teka. Kambe hi siku ra mucato, tata wa vanhwanyana lava u n’wi nyike Leya ematshan’weni ya Rahele. A hi swi tivi leswaku Leya u titwise ku yini hi rhengu ra tata wakwe, kambe u fanele a swi tivile leswaku leyi a ku nga ri ndlela leyinene yo nghenela vukati.

Loko a kume leswi endlekeke, muteki u vilerile swinene. Tata wa vona u hlamusele leswaku a ku ri ndhavuko wa vona ku rhanga va catisa lonkulu. Hikwalaho, Leya u tikume a catisiwe hi vukanganyisi ni wanuna loyi eku sunguleni a a rhandza ntsongwana yakwe, loyi na yena a n’wi tekeke. Kunene Leya u fanele a karhateke ngopfu loko a vona makwavo a rhandziwa swinene ku tlula yena! Leya a nga wu kumanga nkarhi wo gangisana ni ku kombisana rirhandzu ni nuna wakwe, naswona swi nga ha endleka ku ri hava swo hlawuleka leswi a swi tsundzukaka hi siku rakwe ra mucato. Kumbexana a a swi navela hi mbilu yakwe hinkwayo ku rhandziwa ku fana na Rahele! Xisweswo, swi nga ha endleka Leya a titwe a nga rhandziwi, kumbexana hikwalaho ka swiyimo leswi a a tsandzeka ku swi lawula.a

Vanhu vo tala namuntlha va rila na Leya. Hinkwerhu ha swi lava ku rhandza ni ku rhandziwa. Kumbexana hi navela ku va ni munghana wa vukati loyi a nga ta hi rhandza. Nakambe hi lava ku rhandziwa hi vatswari va hina, vana va hina, vamakwerhu ni hi vanghana va hina. Ku fana na Leya, hi nga ha vona van’wana lava kombisiwaka rirhandzu leri hina hi nga ri kumiki.

Ku sukela evuhlangini hi twa switori leswi vulavulaka hi vanhu vo saseka lava sungulaka ku rhandzana kutani va tshama va tsakile vutomi bya vona hinkwabyo. Vayimbeleri va yimbelela tinsimu to nandziha malunghana ni rirhandzu; ni vatlhokovetseri va ri bumabumela. Hambiswiritano, mulavisisi un’wana u tsale leswi malunghana ni mhaka leyi: “A ku na ntirho hambi wu ri wihi kumbe bindzu hambi ri ri rihi leri sunguriwaka hi ntshembo ni ku langutela lokukulu hi ndlela leyi, kambe leri talaka ku helela emoyeni ku fana ni rirhandzu.” Hakanyingi vanhu lava hi tekaneke na vona hi vona va hi kayakayisaka—va hi tisela gome ematshan’weni ya ntsako lowu nga heriki. Ematikweni yo hlayanyana, vukati bya kwalomu ka 40 wa tiphesente byi hetelela byi file naswona mimpatswa yo tala leyi nga dlayangiki vukati a yi tsakanga nikatsongo.

Ematikweni yo tala nhlayo ya mutswari un’we ni mindyangu leyi nga tsakangiki ya engeteleka, leswi endlaka leswaku vana na vona va xaniseka. Kambe, vana hi vona ngopfu-ngopfu va lavaka nsirhelelo wa ndyangu lowu nga ni rirhandzu. Ri ye kwihi rirhandzu? Xana hi nga hundzukela kwihi laha hi nga dyondzaka kona hi mfanelo leyi ya risima? Swihloko leswi landzelaka swi ta tlhuvutsa swivutiso leswi.

[Nhlamuselo ya le hansi]