Tsaka Hi Ntshembo

JOE a a khomiwe hi vuvabyi bya khensa naswona a ku ri phulaphulani. Nsati wakwe Kirsten ni vanghana vo hlayanyana a va ri etlhelo ka mubedo wakwe va ri karhi va vulavula. Kirsten u langute nuna wakwe kutani a xiya leswaku a a xiririka mihloti. Eku sunguleni a a anakanya leswaku Joe a a twa ku vava. Kumbexana a a ku twa, kambe u byele nsati wakwe leswaku a a nga ririsi hi ku twa ku vava.

Kirsten u ri: “Enkarhini lowu wo tika, Joe a a rhendzeriwe hi vanghana, lava a va tele ku ta n’wi vona. Nakambe se a a tiyiseka ku tlula hambi ku ri rini eku sunguleni leswaku ntshembo lowu a a ri na wona wa risima wu ta hetiseka, naswona a a swi tiva leswaku ku hava munhu loyi a nga wu tekaka. U vule leswaku mihloti leyi a yi huma a ku ri mihloti ya ntsako. Madyambu wolawo Joe u file.”

Hi wihi ntshembo lowu tiyiseke Joe loko vuvabyi bya yena byi ri karhi byi tinyika matimba? A ku ri xitshembiso xa Yehovha Xikwembu xa vutomi lebyi nga heriki ni lebyi hetisekeke eparadeyisini emisaveni. (Pisalema 37:10, 11, 29) Nhlavutelo 21:3, 4 yi ri: “Ntsonga wa Xikwembu wu le vanhwini . . . Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula [ku katsa ni swiphiqo swo tala leswi nga kona namuntlha] swi hundzile.”

Ntshembo Ni Le Ka Lava Feke

Eka Joe, ku hetiseka ka ntshembo wa yena swi ta vula ku pfuxiwa eku feni. Entiyisweni, u chaveleriwe hi xitshembiso xa Yesu lexi vulaka leswaku “hinkwavo lava nga eka masirha-bako ya xitsundzuxo”—vafi lava nga emianakanyweni ya Xikwembu—va ta pfuxiwa. (Yohane 5:28, 29) Xana u ni gome hikwalaho ka leswi u feriweke hi xirho xa ndyangu kumbe munghana? Loko swi ri tano, ntshembo wa ku pfuxiwa ka vafi wu nga ku chavelela. Phela, ntshembo lowu a wu ri susi gome leri hi vaka na rona loko loyi hi n’wi rhandzaka a fa. Yesu hi byakwe ‘u humese mihloti’ loko a twa hi ta ku fa ka munghana wakwe Lazaro. Kambe ntshembo wa hina wa hi chavelela.—Yohane 11:14, 34, 35; 1 Vatesalonika 4:13.

Kirsten u ri: “Loko Joe a dlayiwe hi khensa, a ndzi anakanya leswaku a ndzi nge he tlheli ndzi va ni ntsako wa xiviri. Hambileswi ku hundzeke malembe yo hlayanyana, ndza swi xiya leswaku vutomi bya mina eka mafambiselo lawa byi cincile. Joe u siye vangwa leri nga taka ri nga pfaleki. Kambe, ndzi nga vula hi ku tiyiseka leswaku ndzi ni ku rhula ka mianakanyo ni ku eneriseka nakambe.”

Marito ya Kirsten ma hi tsundzuxa leswaku eka mafambiselo lawa, a hi nge languteli ku tshama hi tsakile. Vutomi bya cinca-cinca. Ku ni minkarhi leyi hi nga ta va ni gome, laha swi nga taka swi nga koteki leswaku hi tsaka hi ku helela. (Eklesiasta 3:1, 4; 7:2-4) Nakambe, van’wana va hina swi nga endleka leswaku hi lwa ni ntshikilelo, lowu vangiwaka hi swilo swo hambana-hambana. Hambiswiritano, switshembiso leswi nga eBibeleni swa hi chavelela swinene, naswona vutlhari lebyikulu lebyi hi byi kumaka eBibeleni byi nga hi pfuna ku papalata mintlhamu yo tala leyi endlaka leswaku hi nga vi na ntsako. Xikwembu xi ri: “Loko ku ri loyi a ndzi yingisaka, u ta tshama a sirhelelekile naswona a nge kavanyetiwi hi ku chava khombo.”—Swivuriso 1:33.

Entiyisweni, Yehovha wa khathala swinene hi vuhlayiseki bya hina. U lava leswaku hi tsaka hakunene, naswona ku nga ri malembe ma nga ri mangani ntsena, kambe hilaha ku nga heriki! Hikwalaho, N’wana wakwe u vule marito lama nga hundzeriwiki hi nkarhi lama nge: “Va tsaka lava khathalaka hi xilaveko xa vona xa moya.” (Matewu 5:3) Hi ta va hi tlharihile loko hi ma tirhisa marito lawa.

[Bokisi/Swifaniso leswi nga eka tluka 9]

Swilo Swa Kaye Leswi Nga Endlaka Leswaku U Va Ni Ntsako

1. Ku hlakulela langutelo ra moya evuton’wini.—Matewu 5:3.

2. Eneriseka naswona u papalata “ku rhandza mali.”—1 Timotiya 6:6-10.

3. U nga hlongorisi ntsako.—2 Timotiya 3:1, 4.

4. Hanana u tlhela u pfuna van’wana leswaku va tsaka.—Mintirho 20:35.

5. Vana ni moya wo nkhensa u tlhela u tlangela mikateko leyi u yi kumaka.—Vakolosa 3:15.

6. Vana ni moya wo rivalela.—Matewu 6:14.

7. Hlawula vanghana va wena hi vutlhari.—Swivuriso 13:20.

8. Tihlayise ni ku papalata mikhuva yo biha.—2 Vakorinto 7:1.

9. ‘Tsaka hi ntshembo’ lowu nga eBibeleni.—Varhoma 12:12.

[Swifaniso leswi nga eka tluka 8, 9]

Ntshembo lowu sekeriweke eBibeleni wa vutomi emisaveni leyintshwa wa chavelela swinene