Langutelo Ra Bibele

Xana Vanhu Va Hundzuka Tintsumi Loko Va Fa?

XINHWANYETANA lexi vuriwaka Argyro xi fe xi ri ni malembe ya nkombo ntsena. Vatswari va yena a va khomiwe hi gome lerikulu loko va langute xinhwanyetana xa vona ebokisini naswona a va xi ambexe swo basa. Loko mufundhisi a va chavelela, u va byele leswi: “Xikwembu a xi lava ntsumi yin’wana, kutani xi teke Argyro leswaku a ya va na xona. Sweswi moya wa yena wu le ku haheni wu rhendzeleka ni xitulu xa Lowa Matimba Hinkwawo.”

Vanhu vo tala va ni ntshembo wa leswaku tintsumi i mimoya ya vanhu lava feke, hambileswi byi nga talangiki vukhongeri lebyi seketelaka dyondzo yoleyo. Vuhungasi byi hangalase dyondzo leyi eka tifilimi ni le ka switori swa le ka thelevhixini laha byi kombisaka vanhu lava feke va ri karhi va ‘kuma timpiko,’ ivi va va tintsumi kutani va pfuna ni ku sirhelela lava hanyaka.

Xana na wena u nga langutela leswaku vanhu lava u va rhandzaka va ta hundzuka tintsumi loko va fa? Xana Bibele yi dyondzisa yini hi mhaka leyi? Leswaku hi kuma nhlamulo, a hi sunguleni hi ku kambisisa leswi Matsalwa yo Kwetsima ma swi vulaka hi tintsumi ni hi xiyimo xa vafi.

Tintsumi—Swivumbiwa Leswi Hlawulekeke

Tintsumi i swivumbiwa leswi nga vonakiki leswi tirhelaka Xikwembu lexi tshamaka exivandleni xa moya. Ku va kona ka tona a ku lawuriwi hi vanhu. Tintsumi i swivumbiwa swa moya leswi vumbiweke hi Xikwembu. Bibele yi ri: ‘Tintsumi a ti dzunise vito ra Yehovha; hikuva yena u lerisile, kutani ti tumbuluxiwa.’—Pisalema 148:2, 5.

Bibele yi vula leswaku swivumbiwa swa moya leswi tshembekaka swa timiliyoni, leswi katsaka tiserafi ni makerubu, swi endla ntirho lowu swi averiweke wona hi ku titsongahata hi ku ya hi swikhundla swa tona. (Pisalema 103:20, 21; Esaya 6:1-7; Daniyele 7:9, 10) Xana a ku laveka leswaku ku fa vanhu vo tala leswaku Xikwembu xi ta va ni tintsumi to tala? Kahle-kahle, sweswo a swi nge koteki. Ha yini?

Bibele yi vula leswaku tintsumi ti ve kona vanhu va nga si va kona. Loko Yehovha a tumbuluxa misava leyi vanhu a va ta tshama eka yona hi ku famba ka nkarhi, tintsumi—leti loko ti tlhokovetseriwa ti vuriwaka tinyeleti ta nimixo—‘ti huwelele hi ntsako ti dzunisa.’ (Yobo 38:4-7) Xisweswo tintsumi ti ve kona malembe ya tibiliyoni vanhu va nga si tumbuluxiwa.

Ku tlula kwalaho, tintsumi ni vanhu swa hambana swinene hi ndlela leyi swi vumbiweke ha yona ni xikhundlha xa swona eka xikongomelo xa Yehovha.a Xikwembu xi endle munhu “a va ehansinyana ka tintsumi,” hikwalaho swi fanerile ku vula leswaku tintsumi ti ni matimba yo tlula ya munhu, hikuva ti tlharihe ngopfu naswona ti ni matimba ku tlula vanhu. (Vaheveru 2:7) “Vutshamo bya tona lebyi faneleke” hi le tilweni. (Yudha 6) Kasi, malunghana ni vanhu, xikongomelo xa Xikwembu a ku ri leswaku vanhu va hanya hilaha ku nga heriki emisaveni. (Genesa 1:28; 2:17; Pisalema 37:29) Loko mpatswa wo sungula a wu yingise Xikwembu, a wu ta va wu nga fanga. Xisweswo, ku sukela eku sunguleni vanhu ni tintsumi a swi tsakela swiyimo leswi hambaneke eka xikongomelo xa Xikwembu.

Ku Endleka Yini Loko Munhu A Fa?

Swivutiso swin’wana swa nkoka leswi hi faneleke ku swi tlhuvutsa hi leswi: Ku humelela yini hi vanhu loko va fa? Xana va ya emahlweni va hanya, kambe va ri eka xivumbeko xin’wana, kumbexana va ri tintsumi exivandleni xa moya? Bibele yi ni nhlamulo leyi olovaka ni leyi nga erivaleni: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” (Eklesiasta 9:5) Xisweswo loko vanhu va fa, va file. Vafi a va tivi nchumu, a va twi nchumu, naswona ku hava lexi va nga xi endleka.

Xana wu kona ntshembo eka lava feke? Ina! Bibele yi vula leswaku ntshembo wa vanhu hinkwavo lava feke hileswaku va ta pfuxiwa. Vo tala va vanhu lava feke va ta pfuxiwa va hanya va ri vanhu eparadeyisini laha misaveni.—Luka 23:43; Yohane 5:28.

A hi vangani lava nga ni ntshembo wo pfuxeriwa ku ya hanya ematilweni. Nhlayo ya vona i yitsongo—ko va 144 000 ntsena. Hambiswiritano, vanhu lava 144 000 va hambanile swinene ni swivumbiwa leswi vuriwaka tintsumi. Hi xikombiso, lava 144 000 va ta fuma tanihi tihosi leti nga fiki ni ku va vaprista xikan’we na Kreste. Va nyikiwe matimba ya ku avanyisa. (1 Vakorinto 6:3; Nhlavutelo 20:6) Xana vanhu lava i vana lava nga fa? Doo! I valandzeri va Kreste lava ringiweke ni ku kamberiwa hilaha ku heleleke!—Luka 22:28, 29.

Nakambe xiya ku hambana loku nga kona exikarhi ka vanhu lava feke ni tintsumi leti hanyaka. Leswi vanhu lava feke ‘va nga tiviki nchumu nikatsongo,’ tintsumi tona ta swi vona hinkwaswo leswi endlekaka naswona ti ni mintlhaveko ni vuswikoti byo tihlawulela. Ti ni lunghelo ro tihlawulela leswi ti swi lavaka. (Genesa 6:2, 4; Pisalema 146:4; 2 Petro 2:4) Vafi va hlamuseriwa tanihi vanhu lava nga “hluriwa hi rifu” kumbe ku hela matimba, kasi tintsumi tona ti hlamuseriwa ti ri ni “matimba lamakulu.” (Esaya 26:14; Pisalema 103:20) Vana va Adamu va fa hikwalaho ka xidyoho ni ku nga hetiseki, kambe tintsumi leti chavaka Xikwembu tona ti hetisekile naswona ti tsakela xiyimo xa tona lexinene emahlweni ka Yehovha.—Matewu 18:10.

Dyondzo ya leswaku tintsumi i mimoya ya vanhu lava feke i vonelo ra minongonoko ya thelevhixini naswona Matsalwa a ma yi seketeli. Ntiyiso wa Bibele lowu hlamuseriweke laha henhla wu hi pfuna ku papalata mavonelo lama hoxeke hileswi humelelaka varhandziwa va hina loko va fa. Naswona Bibele ya hi tiyisekisa leswaku tintsumi leti tshembekaka—malandza ya Xikwembu lama vumbiweke hi ku kongoma naswona ma nga ni matimba—i ta xiyimo xa le henhla ku tlula vanhu, naswona ti tshama ti tiyimisele ku endla ku rhandza ka Yehovha. Lexi tsakisaka, ku rhandza ka Xikwembu ku katsa ku tirhisa tintsumi ku langutela ni ku pfuna lava endlaka ku rhandza ka xona hi ku tshembeka naswona va lavaka ku n’wi tirhela.—Pisalema 34:7.

XANA U TSHAME U TIVUTISA?

◼ Xana varhandziwa va wena lava feke va hundzuke tintsumi naswona va gandzela Xikwembu etilweni?—Eklesiasta 9:5, 10.

◼ Xana vana va fa hikwalaho ka leswi Xikwembu xi lavaka ku va ni tintsumi to tala ekusuhi na xona?—Yobo 34:10.

◼ Xana vafi va nga tlhela va vuya leswaku va ta sirhelela lava hanyaka?—Esaya 26:14.

[Nhlamuselo ya le hansi]

[Marito lama tshahiweke exihlokweni lama nga eka tluka 29]

‘Tintsumi a ti dzunise vito ra Yehovha; hikuva yena u lerisile, kutani ti tumbuluxiwa.’—Pisalema 148:2, 5