Tintsumi—Leswi Ti Nga Swona

MUFUMI wa mfumo wa matimba u vone nchumu wo hlamarisa. Vavanuna vanharhu lava gweviweke ku lovisiwa hi ndzilo va pone ri ahlamile! I mani la va kutsuleke? Hosi hi yoxe yi byele vavanuna vanharhu lava kutsuriweke yi ku: “A ku vongiwe Xikwembu [xa n’wina] lexi rhumeke ntsumi ya xona kutani xi ponisa malandza ya xona lawa a ma xi tshemba.” (Daniyele 3:28) Mufumi loyi wa le Babilona la fumeke emalembeni lama tlulaka 2 000 lama hundzeke u swi vone hi mahlo loko vanhu va kutsuriwa hi ntsumi. Vanhu va timiliyoni enkarhini lowu hundzeke a va pfumela eka tintsumi. Vo tala namuntlha va pfumela leswaku tintsumi ti kona naswona va vona onge ta va pfuna evuton’wini hi ndlela yo karhi. I vamani tintsumi, naswona ti huma kwihi?

Hi ku ya hi Bibele, tintsumi i mimoya, tanihi leswi Xikwembu na xona xi nga Moya. (Pisalema 104:4; Yohane 4:24) Tintsumi ti tele ngopfu, ti fika eka timiliyoni. (Nhlavutelo 5:11) Naswona hinkwato ka tona ti “ni matimba lamakulu.” (Pisalema 103:20) Hambileswi tintsumi ti fanaka ni vanhu hileswi ti nga ni vumunhu byo hambana-hambana naswona ti nga ni ntshunxeko wa ku tihlawulela, eku sunguleni a ti nga ri vanhu va nyama. Entiyisweni, Xikwembu xi vumbe tintsumi khale swinene xi nga si vumba vanhu—ni Misava yi nga si va kona. Bibele yi vula leswaku loko Xikwembu xi “simeka misava . . . tinyeleti ta nimixo [tintsumi a] ti huwelela hi ntsako, ni vana va Xikwembu hinkwavo va huwelela va dzunisa.” (Yobo 38:4, 7) Leswi tintsumi ti vumbiweke hi Xikwembu, ti vitaniwa vana va Xikwembu.

Xikwembu xi vumbe tintsumi hi xikongomelo xihi? Loko ku ri ni xiphemu xo karhi lexi tintsumi ti xi hetisiseke evuton’wini bya vanhu, hi xihi? Xana ta hi pfuna evuton’wini namuntlha? Leswi ti nga ni ntshunxeko wa ku tihlawulela, xana ti kona tintsumi leti landzeleke Sathana Diyavulosi kutani ti tiendla valala va Xikwembu? Bibele yi nyikela tinhlamulo leti nga ntiyiso eka swivutiso leswi.