Xana Swi Ni Mhaka Leswaku U Pfumela Yini?

XANA u ehleketa leswaku vutomi byi ni xikongomelo? Loko xitori xa ku tiendlekela ka swilo a xi ri ntiyiso, kutani a yi ta va yi ri ntiyiso mhaka leyi tshahiweke eka magazini wa Scientific American leyi nge: “Matwisiselo ya hina ya masiku lawa mayelana ni dyondzo ya ku tiendlekela ka swilo ma vula leswaku . . . vutomi a byi na xikongomelo xo karhi.”

Ehleketisisa hileswi marito wolawo ma vulaka swona. Loko vutomi a byi nga ri na xikongomelo, a wu nga ta pfuna nchumu evuton’wini handle ko ringeta ku endla swo karhi leswinene, kumbexana u hundzisela swiendlo swa wena swa xitekela eka rixaka leri landzelaka. Loko u fa, a swi ta va swi herile hi wena. Byongo bya wena, swin’we ni vuswikoti bya byona bya ku ehleketa ni ku ehleketisisa hi leswi vutomi byi vulaka swona, a ku to va ku ri nchumu lowu tiendlekelaka hi xiwelo hi ndlela ya ntumbuluko.

A swi heleli kwalaho. Vo tala lava pfumelaka eka dyondzo ya ku tiendlekela ka swilo va vula leswaku Xikwembu a xi kona kumbe a xi nge ngheneleli eka timhaka ta vanhu. Loko swi ri tano, swi vula leswaku vumundzuku bya hina byi titshenge hi van’watipolitiki, swidyondzeki ni varhangeri va vukhongeri. Hi ku ya hi leswi se va swi endleke, mpfilumpfilu, hasahasa ni vukanganyisi leswi onhaka vanhu swi ta ya emahlweni swi va kona. Loko dyondzo leya ku tiendlekela ka swilo a yi ri ntiyiso, a ku ta va ni xivangelo lexi twalaka xo hanya hi marito yo tilan’wa lama nge: “A hi dyeni hi nwa, hikuva mundzuku hi ta fa.”—1 Vakorinto 15:32.

U nga xisiwi. Timbhoni ta Yehovha a ti pfumelelani ni tidyondzo leti nga laha henhla. Naswona Timbhoni a ti xi amukeli xisekelo xa marito wolawo—ku nga ku tiendlekela ka swilo. Timbhoni ti kholwa leswaku Bibele yi tiyisile. (Yohane 17:17) Xisweswo ti tshemba leswi yi swi vulaka mayelana ni ndlela leyi hi veke kona ha yona laha misaveni: ‘I [Xikwembu] xi nga ni xihlovo xa vutomi.’ (Pisalema 36:9) Marito wolawo i ya risima swinene.

Vutomi byi ni xikongomelo. Muvumbi wa hina u ni xikongomelo lexinene hi lava va hlawulaka ku hanya hi ku rhandza ka yena. (Eklesiasta 12:13) Xikongomelo xexo xi katsa xitshembiso xa ku hanya emisaveni leyi nga riki na mpfilumpfilu, tinyimpi ni vuhomboloki—hambi ku ri rifu. (Esaya 2:4; 25:6-8) Timbhoni ta Yehovha ta timiliyoni emisaveni hinkwayo ta pfumela leswaku ku dyondza hi Xikwembu ni ku endla ku rhandza ka xona swi endla leswaku vutomi byi va ni xikongomelo.—Yohane 17:3.

I swa nkoka leswaku u kholwa yini, hikuva a swi nge khumbi ntsako wa wena sweswi ntsena, kambe ni vumundzuku bya wena. U fanele u tiendlela xiboho. Xana u ta hlawula dyondzo leyi hlulekeke ku nyikela swivangelo leswi twalaka swa leswaku hikwalaho ka yini hi fanele hi nga byi tekeli enhlokweni vumbhoni lebyi nga le erivaleni bya swilo leswi tumbuluxiweke? Kumbe, xana u ta pfumela leswi Bibele yi swi vulaka, ku nga leswaku misava ni hinkwaswo leswi hanyaka eka yona swi vumbiwe hi Muvumbi wo hlamarisa—Yehovha, Xikwembu lexi ‘tumbuluxeke swilo hinkwaswo’?—Nhlavutelo 4:11.