Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g 10/06 matl. 8-9
  • Tindlela To Lawula Leswi U Swi Hlalelaka

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Tindlela To Lawula Leswi U Swi Hlalelaka
  • Xalamuka!—2006
  • Tinhlokomhaka Tin'wana Leti Yelana Na Yona
  • Ku Tirhisa Thelevhixini Hi Vukheta
    Xalamuka!—2000
  • TV—Xana Yi Hi Dyela Nkarhi?
    Xalamuka!—2006
  • TV—“Mudyondzisi La Nga Ni Mano”
    Xalamuka!—2006
Xalamuka!—2006
g 10/06 matl. 8-9

Tindlela To Lawula Leswi U Swi Hlalelaka

“LOKO yi pfuleriwile, a hi hlalela hinkwaswo leswi a swi kombisiwa hi ku landzelelana ka swona. A hi nga yi pfali ku fikela loko hi ya eku etleleni,” ku vula Claudine. Van’wana va ri: “A ndzi swi koti ku tshika ku yi hlalela” kasi van’wana va ri, “A ndzi nga swi lavi ku yi hlalela hi ndlela leyi ndzi yi hlalelaka ha yona, kambe a ndzi swi koti ku tshika.” Xana u hlalela thelevhixini nkarhi wo leha? Xana wa karhateka hi ndlela leyi TV yi nga khumbaka ndyangu wa wena ha yona? Hi leswi swiringanyeto leswi nga ku pfunaka ku lawula ndlela leyi u hlalelaka TV ha yona.

1. KUMA LESWAKU U HETA NKARHI WO TANIHI KWIHI U RI EKU YI HLALELENI. Swivuriso 14:15 yi ri: “Lowo tlhariha u xiyisisa magoza yakwe.” I vutlharhi ku kambisisa ndlela leyi u yi hlalelaka ha yona, ku vona loko u fanele u endla swo karhi hi mhaka leyi. Tsala ehansi nkarhi lowu u wu hetaka u hlalela TV vhiki hinkwaro. U nga ha tsala ni minongonoko leyi u yi hlaleleke, leswi u swi dyondzeke ni ndlela leyi yi ku tsakiseke ha yona minongonoko ya kona. Kambe, mhaka-nkulu i ku hlayela nkarhi lowu u wu hetaka u hlalele TV. U ta hlamala ku vona nkarhi lowu u wu heteke. Ku tiva leswaku u heta nkarhi wo tanihi kwihi u hlalele thelevhixini swi nga ha ku endla leswaku u endla ku cinca ko karhi.

2. HUNGUTA NKARHI WO HLALELA. Ringeta ku pfala TV ya wena siku rin’we evhikini, vhiki hinkwaro kumbe nh’weti hinkwayo. Kumbexana u nga ha pima nkarhi lowu u wu hetaka u yi hlalerile siku ni siku. Loko wo hunguta ku hlalela TV hi hafu ya awara hi siku, u ta va u ri ni tiawara ta15 leti u nga ti tirhisaka nh’weti ni nh’weti. Tirhisa nkarhi wolowo eka swilo leswi vuyerisaka, swo fana ni ku endla swilo swa moya, ku hlaya buku leyinene kumbe ku va ni vandyangu ni vanghana. Minkambisiso yi komba leswaku vanhu lava hlalelaka TV nkarhi wo koma, va yi tsakela ku tlula lava yi hlalelaka nkarhi wo leha.

Ndlela yin’wana yo hunguta nkarhi lowu munhu a wu hetaka a hlalele TV i ku yi susa ekamareni ro etlela. Vana lava nga ni TV emakamareni ya vona va tirhisa nkarhi wa kwalomu ka awara ni hafu va ri karhi va yi hlalela, ku tlula lava nga riki na yona emakamareni ya vona. Ku tlula kwalaho, loko ku ri ni TV ekamareni ra n’wana, vatswari a va swi tivi leswi hlaleriwaka hi n’wana. Vatswari ni mimpatswa leyi tekaneke va ta xiya leswaku va ni nkarhi wo tala lowu va nga wu hetaka va ri swin’we loko vo susa TV ekamareni ra vona. Kasi van’wana va hlawule leswaku va nga vi na TV ekaya.

3. HLELA LESWI U SWI HLALELAKA. I ntiyiso leswaku ku ni minongonoko yo tala leyinene leyi nga hlaleriwaka. Ematshan’weni yo tshamela ku cinca-cinca switichi kumbe ku hlalela swin’wana ni swin’wana leswi kombisiwaka, kamba xiyimiso xa TV ka ha ri emahlweni leswaku u ta hlawula minongonoko leyi u lavaka ku yi hlalela. Pfulela TV loko nongonoko lowu u wu hlawuleke wu sungula, kutani u yi tima loko wu hela. Kumbe, ematshan’weni yo hlalela nongonoko wolowo loko wu haxiwa hi nkarhi wolowo, u nga ha wu rhekhoda leswaku u ta wu hlalela hi nkarhi wun’wana. Leswi swi ta endla leswaku u kota ku wu hlalela hi nkarhi lowu fanelekaka kutani u ta kota ku hundzisa swinavetisi.

4. HLAWULA LESWI U SWI HLALELAKA. Bibele yi profete leswaku nkarhi wa hina wu ta xiyiwa hi vanhu “lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu.” Wa swi tiva leswaku vatlangi vo tala va le ka thelevhixini va tano. Bibele yi vula leswaku lavo tano, “u va fularhela.” (2 Timotiya 3:1-5) Ha lemukisiwa: “Mi nga xisiwi. Vunakulobye byo biha byi onha mikhuva leyi pfunaka.”—1 Vakorinto 15:33.

Leswaku u va munhu la hlawulaka swi lava ku tikhoma. Xana u tshame u hlalela masungulo ya filimi kumbe xitori xo karhi, naswona hambileswi a wu swi xiya leswaku a swi amukeleki, u ye emahlweni u hlalela ku vona leswaku ku ta humelela yini? Vo tala va ti hlalerile tifilimi to tano. Hambiswiritano, loko wo kanya mbilu u tima TV leswaku u ta endla swin’wana, u ta kuma leswaku a wa ha khathali hi leswi humeleleke loko se u yi timile.

Khale ka khaleni ku nga si endliwa tithelevhixini, mupisalema u tsale a ku: “A ndzi nge veki nchumu lowu nga pfuniki nchumu emahlweni ka mahlo ya mina.” (Pisalema 101:3) Yoleyo ku nga va pakani ya kahle leyi hi nga ehleketaka ha yona loko hi hlawula leswi hi swi hlalelaka! Van’wana, ku fana na Claudine, va endle xiboho xo hambana ni thelevhixini ya vona. Claudine u ri: “A ndzi nga swi xiyi leswaku TV yi ndzi tlanyate swonghasi. Loko ndzi kuma nkarhi wo hlalela TV masiku lawa, ndzi chavisiwa hi swilo leswi a swi nga ndzi chavisi eku sunguleni. A ndzi vona onge ndza hlawula leswi ndzi swi hlalelaka, kambe sweswi ndza swi xiya leswaku a ndzi tixisa. Loko ndzi hlalela swilo leswinene swa ndzi tsakisa swinene.”

[Xifaniso lexi nga eka tluka 8]

Tsala ehansi nkarhi lowu u wu hetaka u hlalele TV

[Xifaniso lexi nga eka tluka 8]

Siva ku hlalela TV hi ku endla swilo swin’wana swa nkoka

[Xifaniso lexi nga eka tluka 9]

U nga kanakani ku tima TV!

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela