Langutelo Ra Bibele

Xana Vanhu Lava Rhandzanaka Va Nga Hlanganyela Vuxaka Bya Rimbewu Va Nga Si Tekana?

EKA nkambisiso wun’wana, kwalomu ka 90 wa tiphesente ta vantshwa lava ku buriweke na vona va vule leswaku a swi bihanga leswaku vanhu va hlanganyela rimbewu va nga si tekana, ntsena loko havumbirhi bya vona va rhandzana. Mavonelo lawa ma kombisiwa ni ku bumabumeriwa hi vuhaxi. Eka thelevhixini ni le ka tifilimi, timhaka ta rimbewu ti kombisiwa tanihi nchumu lowu kombisaka leswaku vanhu va rhandzana.

Phela, lava lavaka ku tsakisa Xikwembu a va lavi nkongomiso lowu humaka emisaveni, hi ku xiya leswaku misava yi kombisa mianakanyo ya mufumi wa yona, Diyavulosi. (1 Yohane 5:19) Va tlhela va va ni vuxiya-xiya leswaku va nga fumiwi hi ku navela ka vona, hi ku tiva leswaku “mbilu yi kanganyisa ngopfu ku tlula hinkwaswo naswona yi ni khombo.” (Yeremiya 17:9) Ku ri ni sweswo, lava tlhariheke hakunene va lava nkongomiso eka Muvumbi ni le ka Rito ra yena leri huhuteriweke.—Swivuriso 3:5, 6; 2 Timotiya 3:16.

Rimbewu I Nyiko Leyi Humaka Eka Xikwembu

Yakobo 1:17 yi ri: “Nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla, hikuva yi xika hi le ka Tata wa mavoningo ya le xibakabakeni.” Vuxaka bya rimbewu elunghiselelweni ra vukati i yin’wana ya tinyiko ta risima. (Rhuti 1:9; 1 Vakorinto 7:2, 7) Byi endla leswaku vanhu va kota ku va ni vana, naswona byi pfuna wanuna ni wansati leswaku va va ni vuxaka bya le kusuhi hi ku kongoma ni le mintlhavekweni hi ndlela leyinene ni leyi tsakisaka. Hosi Solomoni wa khale u tsale a ku: “Tsaka hi nsati wa vuntshwa bya wena . . . Mavele yakwe a ma ku pyopye minkarhi hinkwayo.”—Swivuriso 5:18, 19.

Kahle-kahle, Yehovha u lava leswaku hi pfuneka ni ku tsakela tinyiko leti a hi nyikaka tona. Hikwalaho ka sweswo, u hi nyike milawu ni misinya ya milawu leyinene leyi hi faneleke ku hanya ha yona. (Pisalema 19:7, 8) Yehovha hi yena “Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.” (Esaya 48:17) Xana Tata wa hina la nge matilweni—loyi a nga rirhandzu—a nga hi tsona nchumu lowu nga wunene?—Pisalema 34:10; 37:4; 84:11; 1 Yohane 4:8.

Ku Hlanganyela Rimbewu eMahlweni Ka Vukati A Swi Kombisi Rirhandzu

Loko wanuna ni wansati va tekana, swi fana ni loko va ri “nyama yin’we.” Loko vanhu vambirhi lava nga tekanangiki va hlanganyela rimbewu, leswi nakambe swi vuriwaka vumbhisa, na vona va va “miri wun’we”—kambe lowu nga basangiki emahlweni ka Xikwembu.a Ku tlula kwalaho, ku hlangana ko tano a ku kombisi rirhandzu. Njhani?—Marka 10:7-9; 1 Vakorinto 6:9, 10, 16.

Xivangelo xin’wana hileswaku vumbhisa i rimbewu leri ku nga hava ku tiboha ka xiviri. Ri susa xindzhuti xa munhu, naswona ri nga ha vanga mavabyi, ku tika loku nga lavekiki, ni ku vavisa munhu embilwini. Ku tlula hinkwaswo, i ku tlula milawu ya Xikwembu ya ku lulama. Hikwalaho, munhu la endlaka vumbhisa a nga na mhaka ni ntsako ni vuhlayiseki bya nkarhi lowu taka bya munhu un’wana.

Eka Mukreste, vumbhisa byi kombisa ku ka munhu a nga ma xiximi malunghelo ya vamakwavo va moya. (1 Vatesalonika 4:3-6) Hi xikombiso, lava nga tivulaka malandza ya Xikwembu kambe va nghenelaka rimbewu va nga si tekana, va thyakisa vandlha ra Vukreste. (Vaheveru 12:15, 16) Nakambe, va tsona loyi va endleke vumbhisa na yena xiyimo lexi tengeke, naswona loko loyi un’wana a nga si teka kumbe ku tekiwa, va n’wi tsona ni mfanelo yo nghenela vukati a tengile emahanyelweni. Va tlhela va onha ni vito lerinene ra ndyangu wa ka vona ni vito ra ndyangu wa loyi va etleleke na yena. Xo hetelela, va delela Xikwembu, lexi va xi twisaka ku vava hi ku tlula milawu ya xona leyinene. (Pisalema 78:40, 41) Yehovha u ta va ‘xupula’ hinkwavo lava endlaka swiendlo swo tano swo biha va nga hundzuki. (1 Vatesalonika 4:6) A swi hlamarisi leswi Bibele yi hi byelaka leswaku hi ‘balekela vumbhisa’!—1 Vakorinto 6:18.

Xana u kona loyi u rhandzanaka na yena naswona mi kunguhata ku tekana? Kutani, ha yini mi nga tirhisi nkarhi lowu wa ku gangisana leswaku mi aka xisekelo lexi tiyeke xa ku tshembana ni ku xiximana? Tivutise: Xana wansati a nga n’wi tshembisa ku yini wanuna loyi a hlulekeke ku tikhoma? Naswona, xana wanuna a nga n’wi khathalela ni ku n’wi fundzha njhani wansati loyi a nga yingisiki nawu wa Xikwembu leswaku a enerisa ku navela ka yena ka rimbewu kumbe ku tsakisa wanuna?

Tsundzuka leswaku lava alaka ku yingisa nkongomiso wa Xikwembu va tshovela leswi va swi byalaka. (Vagalatiya 6:7) Bibele yi ri: “Loyi a hanyaka hi vumbhisa u dyohela miri wa yena n’wini.” (1 Vakorinto 6:18; Swivuriso 7:5-27) I ntiyiso leswaku loko mpatswa lowu hlanganyeleke rimbewu emahlweni ka vukati wu tisola hakunene, wu endla leswi faneleke ku vuyetela vuxaka bya wona ni Xikwembu, ni ku tlhela wu tiyisa ku tshembana ka wona, ku titwa nandzu ku nga hunguteka. Hambiswiritano, hi ntolovelo ndlela leyi wu tikhomeke ha yona enkarhini lowu hundzeke yi siya xivati. Mpatswa wun’wana lowu sweswi wu tekaneke wa tisola swinene hi ku va wu endle vumbhisa. Minkarhi yin’wana nuna wa kona wa tivutisa: ‘Xana swiphiqo leswi hi vaka na swona evukatini bya hina swi vangiwa hileswi hi veke ni masungulo lama nga basangiki?’

Rirhandzu Ra Xiviri A Ri Na Vutianakanyi

Hambileswi ri nga ha fambisanaka ni ku nyanyuka ko karhi, rirhandzu ra ntiyiso “a ri tikhomi hi ndlela leyi nga tengangiki” naswona a ri “lavi leswi vuyerisaka rona ntsena.” (1 Vakorinto 13:4, 5) Ku ri na sweswo, ri khathala hi vuhlayiseki bya munhu un’wana naswona ri n’wi navelela ntsako lowu nga heriki. Rirhandzu ro tano ri pfuna wanuna ni wansati leswaku va xiximana ni ku hlanganyela rimbewu leri faneleke, leri averiweke hi Xikwembu—esangwini ra vukati.—Vaheveru 13:4.

Ku tshembeka ni ku titwa u hlayisekile leswi vaka kona hikwalaho ka vukati lebyi tsakisaka i swa nkoka ngopfu-ngopfu loko mi va ni vana, hikuva Xikwembu xi lava leswaku vana va kulela endyangwini lowu nga ni rirhandzu, lowu tiyeke ni lowu hlayisekeke. (Vaefesa 6:1-4) Vanhu vambirhi va tiboha hakunene evukatini ntsena. Etimbilwini ta vona va hlambanya leswaku va ta khathalelana ni ku seketelana loko swi famba kahle ni loko swi nga fambi kahle evuton’wini bya vona hinkwabyo, minkarhi yin’wana va tlhela va vula xihlambanyo xa vona hi nomu.—Varhoma 7:2, 3. 

Vuxaka bya rimbewu exikarhi ka wanuna ni wansati lava tekaneke byi nga tiyisa vuxaka bya vona. Eka vukati lebyi nga ni ntsako, vatekani va kuma leswaku vuxaka bya rimbewu byi va lebyi tsakisaka ngopfu ni lebyi nga ni xikongomelo—naswona swi va leswi tsakisaka handle ko nyamisa vukati, ku karhatiwa hi ripfalo kumbe ku tlula nawu wa Muvumbi.

XANA U TSHAME U TIVUTISA?

◼ Hi rihi langutelo ra Xikwembu hi vuxaka bya rimbewu emahlweni ka vukati?—1 Vakorinto 6:9, 10.

◼ Ha yini vumbhisa byi ri ni khombo?—1 Vakorinto 6:18.

◼ Xana vanhu vambirhi lava rhandzanaka va nga kombisana njhani rirhandzu ra xiviri?—1 Vakorinto 13:4, 5.

[Nhlamuselo ya le hansi]