Ku Vuriwa Yini Hi Ku Endla Xiboho Xa Leswaku A Wu Nge Hlanganyeli Rimbewu?

SE SWI tolovelekile manguva lawa leswaku vantshwa va vula leswaku “a va nge hlanganyeli rimbewu kukondza va nghenela vukati,” va vula leswaku va ha ri tintombhi. Swiboho leswi swi kombisa pakani leyinene ngopfu leyi fambisanaka ni swileriso swa Bibele. (1 Vakorinto 6:18; Vaefesa 5:5) Kambe, swi vonaka onge a swi pfuni nchumu swiboho swa muxaka lowu. Hi ku ya hi nkambisiso wun’wana, ku kumiwe leswaku vantshwa va kwalomu ka 60 wa tiphesente va tlula swiboho leswi va swi endleke ku nga si hela ni lembe.

Tlhandlakambirhi, ya kanakanisa ndlela leyi vantshwa van’wana va hlamuselaka ha yona rito leri nge “papalata” ni xiga lexi nge “vutengi bya rimbewu.” Charlene C. Giannetti na Margaret Sagarese, va tsale leswi ebukwini ya vona leyi nge Boy Crazy!: “Ku andza ka mukhuva wa ku endla rimbewu ra nomu, hambi ku ri ra hala mahosi, swi kumeke leswaku swi vangiwa hileswi vana va nga laviki ku hlanganyela rimbewu hi ndlela ya ntumbuluko. Va ehleketa leswaku loko ku nga hlangananga swirho swa rimbewu hi ku kongoma, a va hlanganyelanga rimbewu.”

Swi vonaka onge vonelo rero ri tolovelekile. Endzhaku ko bula ni vantshwa lava tlulaka 1 000, mutsari un’wana u te: “Swi vonaka onge i muntshwa un’we kumbe vambirhi eka va dzana lava tekaka rimbewu ra nomu ku ri rimbewu.” U tlhele a ku: “Mi fanele mi swi xiya leswaku kumbexana hi yona ndlela leyi vantshwa—kumbe ni lava nga si fikaka emalembeni ya vuntshwa—va swi vonisaka xiswona.”

Lava va namarhelaka nkongomiso wa Bibele va swi xiya leswaku rimbewu ra nomu kumbe ra hala mahosi—hilaha mavito ya kona ma swi kombisaka kahle hakona—na rona i rimbewu. Bibele yi lerisa leswaku hi “papalata vumbhisa,” leswi vulaka mixaka hinkwayo ya ku tikhoma loko biha ka rimbewu.—1 Vatesalonika 4:3.