Vantshwa Eka Internet!
Ehleketa leswaku a swi ta va njhani loko n’wana wa wena la nga ni malembe ya khume a a tsendzeleka ni switarata nivusiku.
Ehleketa leswaku a swi ta va njhani loko n’wana wa wena la nga emalembeni ya kondlo-a-ndzi-dyi a a hlele xinkhubyana ekaya ra wena lexi wena u nga tiviki nchumu ha xona.
Ehleketa leswaku a swi ta va njhani loko n’wana wa wena wa mufana kumbe wa nhwanyana a a endle swilotlelo swo tala swa yindlu ya wena kutani a swi nyika vanhu lava a nga va tiviki nikatsongo.
LOKO n’wana wa wena a ri ni ndlela yo nghena eka Internet, timhaka leti nga laha henhla ti nga endleka. Magazini wa Science News wu ri: “Internet yi ni tindhawu to tala to hambana-hambana leti vanhu va nga hlanganaka eka tona, va nga ha rhumelana rungula hi Internet kumbe va bula hi ku tsalelana, hileswaku loyi un’wana u vona leswi tsariwaka hi loyi un’wana kutani va hlamulana hi nkarhi wolowo.”
Vantshwa va swi tolovele hi ku hatlisa ku tirhisa tindlela to burisana ha tona eka Internet. Phela, hi 2004, vanhu va kwalomu ka kaye eka va khume va le United States lava nga exikarhi ka malembe ya 12 na 17 a va tirhisa Internet, leyi sweswi yi kumekaka emisaveni hinkwayo.
A hi vangani lava nga alaka leswaku Internet ya pfuna. Kambe hinkwerhu hi fanele hi swi xiya leswaku yi nga ha va ni khombo. Hi xikombiso, vantshwa vo tala va nghena-nghena eka Ti-Web-site to hambana-hambana va ri swavo eka Internet, naswona van’wana va endla vunghana ni vanhu lava wena—hambi ku ri n’wana wa wena—u nga taka u nga swi rhandzi leswaku va ku endzela ekaya ra wena.
Vantshwa van’wana lava nga xalamukangiki va tsala hambi ku ri vuxokoxoko bya vona vini, leswi va swi ehleketaka, va teka ni swifaniso swa vona va swi nghenisa eka Internet. Hi ku ya hi Profesa Zheng Yan wa State University of New York, vantshwa “hakanyingi a va swi lemuki leswaku i vangani vanhu lava vonaka rungula rero, a va swi lemuki leswaku hambi ku ri lava rhandzaka ku kanganyisa vana leswaku va etlela na vona va swi vona.”
A hi swi kambisiseni hi vuenti leswi vantshwa vo tala va swi endlaka eka Internet. Leswi swi ta hi pfuna ku vona swiphiqo leswi va nga ha langutanaka na swona, ni ku vona leswi kahle-kahle vana va hina va lavaka swona eka yona, ni ku vona leswaku hi nga va pfuna njhani ku enerisa swilaveko swa vona swa xiviri. Swi ta tlhela swi pfuna vantshwa lava nga Vakreste leswaku va tshama va tshembekile eka Xikwembu eminkarhini leyi yo nonon’hwa.—2 Timotiya 3:1-5.