Va Pone Ri Ahlamile Le Mumbai
HI MUTSARI WA XALAMUKA! LE INDIYA
DOROBA ra Mumbai, ri ni vaaki vo tlula 18 wa timiliyoni. Siku ni siku vanhu va kwalaho va kwalomu ka timiliyoni ta tsevu ku ya eka nkombo, va famba hi switimela leswi nga ni rivilo ku ya emintirhweni, eswikolweni, etindhawini ta mabindzu ni le tindhawini tin’wana to tsakisa ta kwalaho. Hi nkarhi lowu vanhu vo tala va humaka ha wona, xitimela ha xin’we lexi nga ni matorokisi ya kaye, lexi hi ntolovelo xi rhwalaka vanhu va kwalomu ka 1 710, xi va xi rhwele vanhu va kwalomu ka 5 000. A ku ri hi nkarhi wolowo wa mphensa-mphensa hi July 11, 2006, loko matherorisi ma hlasela switimela swa le Mumbai. Ku nga si hela timinete ta 15, ku buluke tibomo ta nkombo eka switimela swo hambana-hambana swa Western Railway naswona ku fe vanhu vo tlula 200 kutani va kwalomu ka 800 va vavisekile.
Ku ni vanhu vo hlayanyana lava kumekaka eka mavandlha ya Timbhoni ta Yehovha ya 22 lama nga le Mumbai ni tindhawu ta le kusuhi lava na vona va fambaka hi switimela leswi siku ni siku, naswona a va ri endzeni ka swona loko swi hlaseriwa. Lexi tsakisaka, a nga kona ni un’we wa vona la feke, kambe vo hlayanyana va vavisekile. Anita a a vuya entirhweni. Xitimela a xi lo hontlo, kutani a a yime ekusuhi ni rivanti leswaku a ta kota ku hatla a huma loko xi yima. Loko xitimela xi ri karhi xi famba, hi xitshuketa ku twale ku buluka lokukulu, kutani torokisi leri a a ri eka rona, ri tala hi musi wa ntima. Loko a hlometela exineneni, u vone tlhelo ra xitimela leri nga endliwa hi nsimbi ri phatlukile naswona a ro lenga kunene hi rivambu. U chuhe ngopfu loko a vona mintsumbu ni swirho swa vanhu swi ri karhi swi wetetela exiporweni. Endzhaku ka xiendlakalo lexi—lexi a swi vonaka onge xi teke nkarhi wo leha eka yena, hambileswi kahle-kahle a ku ri tisekoni ti nga ri tingani—xitimela xi yimile. Anita ni vakhandziyi van’wana va jitamile kutani va ya yimela le kule na xona. Anita u fonele nuna wakwe John eka selfoni kutani nkateko wa kona a n’wi kuma; ku nga si hela timinete ti nga ri tingani fambiselo ra tifoni a ri nga ha tirhi hileswi a ku ri ni vanhu vo tala lava a va ringeta ku fona hikwalaho ko vilela. A a tikhomile kukondza loko a vulavula ni nuna wakwe. Hiloko a ku xi buku, a sungula ku rila. U byele nuna wakwe leswi endlekeke kutani a n’wi kombela leswaku a n’wi landza. Loko a ha yimele nuna wakwe, mpfula yi sungule ku na yi hlantswa ni vuthala hinkwabyo lebyi a byi ta pfuna mafokisi.
Claudius, un’wana wa Timbhoni ta Yehovha, u suke entirhweni ku nga si ba nkarhi wo chayisa. U khandziye xitimela xa 5:18 p.m. eXitichini xa Churchgate, ku nga xitichi xa Western Railway, kutani a nghena eka torokisi ra mathikithi yo durha. Loko a ha lava ndhawu yo tshama eka riendzo ra yena ro ya eBhayandar leri tekaka awara, u vone Joseph, loyi a hlanganyelaka eka vandlha ra le kusuhi ra Timbhoni ta Yehovha. A va ri karhi va dya mabulo loko xitimela xi ri karhi xi famba. Hikwalaho ka leswi Joseph a a karhele, u khomiwe hi vurhongo. Leswi xitimela a xi tele hi vanhu, Claudius, u suke a yima a kongoma erivantini ra xitimela va nga si fika exitichini lexi a a ta xika eka xona. Loko Claudius a ha yime kwalaho, Joseph u pfukile a titshega hi xitulu leswaku va ta lelana. Hiloko Claudius a khomelela nsimbi ya xitulu a korhama leswaku va ta vulavula. Swi nga ha endleka leswaku ku korhama ka yena hi swona swi nga ponisa vutomi bya Claudius. Hiloko hi xitshuketa ku twala huwa leyikulu. Kutani torokisi ri tsekatseka swinene ri tala hi musi ku ku dzwii! Ku buluka loku ku tlumbele Claudius ehansi exikarhi ka switulu kutani a nga ha twi nchumu. Laha a a yime kona a ku ri ni mbhovo lowukulu. Lava a va yime ekusuhi na yena a va wele ehandle kumbe a va wele ehansi va file. U pone bomo ya vuntlhanu eka leta nkombo leti bulukeke hi Ravumbirhi wolowo wa khombo, eswitimeleni swo hambana-hambana.
Claudius, u yisiwe exibedlhele a lo phyii, hi tingati. Hambiswiritano, ngati leyi a ku ri ya lava va nga lova. Yena a nga vavisekanga ngopfu—u fe ndleve yin’we, a tshwa katsongo evokweni naswona misisi yakwe a yi tshwe katsongo. Loko a fika le xibedlhele u kume Joseph na nsati wakwe Angela, loyi a a ri etorokisini ro hlawuleka ra vavasati ntsena naswona a a nga vavisekanga. Joseph yena a a vaviseke hala tihlweni ra xinene naswona a a fe tindleve. Timbhoni letinharhu ti nkhense Yehovha leswi ti poneke. Claudius u vule leswaku nchumu wo sungula lowu teke emianakanyweni yakwe loko a phaphama a ku ri leswaku, ‘A swi pfuni nchumu ku hlongorisa mali ni rifuwo eka mafambiselo lawa ya swilo hikuva u nga ha fa hi xitshuketa!’ A a tsake ngopfu leswi a nga ni vuxaka lebyinene ni Xikwembu xa yena Yehovha, ku nga nchumu wa nkoka ku tlula hinkwaswo evuton’wini bya yena!
Hi xinkarhana, doroba ra Mumbai a ri hlaseriwe hi ndhambi, mpfilumpfilu xikan’we ni ku buluka ka tibomo. Kambe Timbhoni ta kwalomu ka 1 700 leti kumekaka kwalaho ta hiseka. Nkarhi ni nkarhi ti avelana ni vaakelani va tona ntshembo lowunene wa misava leyintshwa, laha madzolonga ma nga ta va ma nga ha ri kona.—Nhlavutelo 21:1-4.
[Marito lama tshahiweke exihlokweni lama nga eka tluka 23]
Laha a a yime kona, ku lo sala mbhovo lowukulu ntsena
[Swifaniso leswi nga eka tluka 23]
Anita
[Xifaniso lexi nga eka tluka 23]
Claudius
[Xifaniso lexi nga eka tluka 23]
Joseph na Angela
[Laha Xifaniso Xi Humaka Kona eka tluka 22]
Sebastian D’Souza/AFP/Getty Images