Pfumelela Xikwembu Xi Ku Kongomisa “eVuton’wini Bya Xiviri”

NCHUMU wa nkoka hileswaku nkongomiso wun’wana ni wun’wana wu fanele wu va nkongomiso lowu tshembekaka. Lava va tivaka Yehovha, Mutsari wa Bibele, va tshemba leswaku a ku na un’wana la tshembekaka ku tlula yena. A nga ‘hembi.’ (Tito 1:2; 2 Timotiya 3:16) Yoxuwa loyi a a chava Xikwembu, loyi a rhangeleke Vaisrayele loko va nghena eTikweni ra Xitshembiso, u tiyisekise hi byakwe leswaku Yehovha wa tshembeka swinene. Loko a vulavula ni Vaisrayele u te: “Mi swi tiva kahle hi timbilu ta n’wina hinkwato ni mimoya-xiviri ya n’wina hinkwayo leswaku a ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina. A ku wanga ni rito rin’we eka wona.”—Yoxuwa 23:14.

Ku ni vuprofeta byo tala bya Bibele lebyi hetisekeke ku sukela enkarhini wa Yoxuwa. Ku hetiseka ka vuprofeta lebyi swi hi nyika xivangelo lexi twalaka xa ku tshemba leswaku byi ta hetiseka lebyi nga siki hetisekaka. Byo tala bya vuprofeta lebyi byi katsa ku hetiseka ka swikongomelo swa Xikwembu hi misava ni vanhu va xona lava yingisaka.

Xana U Ta Vuyeriwa Hi Ku Yingisa Nkongomiso Wa Xikwembu?

Yehovha, xikombiso lexi hetisekeke xa rirhandzu u lava leswaku hi tsaka sweswi ni hilaha ku nga heriki. (Yohane 17:3; 1 Yohane 4:8) Xikwembu xi lava leswaku hi tiphina hi ‘vutomi bya xiviri’—ku nga vutomi lebyi nga heriki. (1 Timotiya 6:12, 19) Hikwalaho ka sweswo, Timbhoni ta Yehovha leti tlulaka timiliyoni ta tsevu ti yingisa xileriso xa Xikwembu hi ku chumayela ‘mahungu lamanene ya mfumo’ eka vaakelani va tona hi ntsako. (Matewu 24:14) Swa sweswi, ti endla ntirho lowu ematikweni ya 235—kwalomu ka vaaka-tiko va misava hinkwayo!

Mfumo wa Xikwembu i mfumo wa le tilweni lowu nga emavokweni ya Yesu Kreste. (Daniyele 7:13, 14; Nhlavutelo 11:15) Mfumo lowu wu ta herisa vanhu vo homboloka hinkwavo, lava alaka ku hanya hi milawu ya yena leyinene. (Pisalema 37:10; 92:7) Endzhaku ka sweswo, misava hinkwayo “yi ta tala hi ku tiva Yehovha kukota mati lama funengetaka lwandle.”—Esaya 11:9.

Ehleketa hi ku rhula ni ntwanano lowu nga ta va kona, loko vanhu hinkwavo emisaveni va gandzela Xikwembu “hi moya ni ntiyiso” naswona va wu landzela hi ku tirhandzela nkongomiso ni milawu ya xona leyi hetisekeke! (Yohane 4:24) Eku heteleleni vanhu va ta kuma ‘vutomi bya xiviri’ lebyi tshembisiweke hi Xikwembu!

Kambe, hilaha swi profetiweke hakona, a hi vangani lava nga ta amukela nkongomiso wa Xikwembu kutani va kuma vutomi. (Matewu 7:13, 14) Xana wa swi lava ku va un’wana wa vona? Loko u swi lava, Timbhoni ta Yehovha ta ku rhamba leswaku u kambisisa Matsalwa kutani u pfumelela ndzayo ya Xikwembu yi ku kongomisa. Hi ku endla tano, u ta ‘nantswa’ hi wexe u swi vona leswaku Yehovha hi lonene. (Pisalema 34:8) Kukota ndlela leyi swinyenyana swi kongomisiwaka ha yona hi ntumbuluko kukondza swi ya fika lomu swi yaka kona, Yehovha u ta kongomisa vanhu va yena vo tshembeka leswaku va ya hanya eParadeyisini.—Luka 23:43.

[Xifaniso lexi nga eka tluka 8, 9]

“Va tsaka lava nga ni moya wo rhula, hikuva va ta dya ndzhaka ya misava.”—MATEWU 5:5.

“Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—PISALEMA 37:11.

“Ntsonga wa Xikwembu wu le vanhwini . . . Kutani xi ta sula mihloti hinkwayo ematihlweni ya vona, rifu a ri nge he vi kona.”—NHLAVUTELO 21:3, 4.

“Hikuva lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”—SWIVURISO 2:21, 22.