Vantshwa Va Vutisa . . .

Xana Ndzi Nga Swi Kotisa Ku Yini Ku Hanya Eka Mindhavuko Yo Hambana?

“Eka hina hi Mantariyana naswona hi vanhu va ku rhandza ku hleka hi ntshunxekile. Sweswi hi tshama eBritain. Vanhu va kona va xiximeka naswona va ni xichavo. Ndzi titwa ndzi nga amukeleki eka mindhavuko hayimbirhi—loko ndzi ri eItaliya ndzi titwa onge ndzi Munghezi kasi loko ndzi ri eBritain ndzi titwa onge ndzi Muntariyana.”—Giosuè, eNghilandhi.

“Loko ndzi ri exikolweni mudyondzisi u ndzi byele leswaku ndzi n’wi languta exikandzeni loko a vulavula. Kambe loko ndzi languta Tatana loko a vulavula, u ndzi byele leswaku a ndzi n’wi xiximi. Ndzi titwe ndzi nga amukeleki eka mindhavuko hayimbirhi.”—Patrick, i muluveri wo huma eAlgeria, loyi a tshamaka eFurwa.

Xana tatana kumbe mana wa wena i muluveri?

◻ Ina ◻ E-e

Xana ririmi kumbe ndhavuko wa laha u nghenaka kona xikolo swa hambana ni swa le kaya ka n’wina?

◻ Ina ◻ E-e

VANHU va timiliyoni va rhurha lembe ni lembe, naswona vo tala va vona va langutana ni swiphiqo leswikulu. Hi xitshuketa va tikuma va tshama exikarhi ka vanhu va ririmi, ndhavuko ni maambalelo lama hambaneke ni ya vona. Hikwalaho ka sweswo, valuveri va tala ku hlekuriwa—nhwanyana la vuriwaka Noor u yi tiva kahle mhaka leyi. Yena swin’we ni ndyangu wa ka vona, va rhurhe le Yordan va ya tshama eAmerika N’walungu. U ri: “Swiambalo swa hina a swi hambanile ni swa vanhu van’wana, kutani vanhu a va hi hleka. Naswona a hi nga byi twisisi vumunhu bya Maamerika.”

Muntshwa la vuriwaka Nadia, u hlangavetane ni ntlhontlho lowu hambaneke. U ri: “Ndzi velekiwe eJarimani. Leswi vatswari va mina va nga Mantariyana, loko ndzi vulavula Xijarimani ndza twala leswaku ndzi Muntariyana, naswona vana exikolweni va ri ndzi ‘xiphukuphuku.’ Kambe loko ndzi endze le Italiya, loko ndzi vulavula Xintariyana ndza twala leswaku ndzi huma eJarimani. Kutani ndzi titwa ndzi nga ri na vuyo. Kun’wana ni kun’wana laha ndzi yaka kona, ndzi munhu wumbe.”

Hi yihi mintlhontlho yin’wana leyi vana va valuveri va langutanaka na yona? Naswona xana va nga humelela njhani eka swiyimo leswi va langutanaka na swona?

Ku Hambana Ka Mindhavuko Ni Tindzimi

Hambi ekaya, vantshwa lava nga ni vatswari lava nga valuveri va nga ha kuma leswaku ndhavuko wa rikwavo wa honisiwa. Njhani? Hakanyingi vana va tekelela ndhavuko lowuntshwa hi ku hatlisa ku tlula vatswari. Hi xikombiso, Ana a a ri na malembe ya nhungu loko a rhurhela eNghilandhi ni ndyangu wa ka vona. U ri: “Mina na buti wa mina hi hatle hi tolovela mahanyelo ya le London. Kambe a swi tika eka vatswari va mina, hikuva va tshame ngopfu exihlaleni lexitsongo le Madeira, laha a ku vulavuriwa Xiputukezi.” Voeun, loyi a a ri na malembe manharhu loko yena ni vatswari vakwe lava humaka le Cambodia va fika eAustralia, u ri: “Vatswari va mina a va si wu tolovela kahle ndhavuko wa kwalaho. Entiyisweni, Tatana wa hlundzuka hikuva a ndzi ri twisisi langutelo rakwe ni ndlela leyi a ehleketaka ha yona.”

Ku hambana loku ka ndhavuko ku nga fana ni mukhandlu lowu hambanisaka vantshwa ni vatswari va vona. Kutani ku fana ni nambu lowu hambanisaka miganga, ririmi na rona ri nga hambanisa mindyangu. Ku hambana loku ku dzima timitsu loko vana va sungula ku dyondza ririmi lerintshwa hi ku hatlisa ku tlula vatswari va vona. Kutani ku ya ku kula loko vana va sungula ku rivala ririmi ra manana ivi swi ya swi tika ku vulavurisana ekaya.

Ian, loyi a nga na 14 wa malembe, u vone ku hambana loku eka yena ni vatswari endzhaku ko va ndyangu wa ka vona wu rhurhele le New York wu suka le Ecuador. U ri: “Sweswi Xinghezi xa mina xi huma hi tinhompfu ku tlula Xipaniya. Hikuva vadyondzisi va mina exikolweni va vulavula Xinghezi, vanghana va mina va vulavula xona naswona mina na buti wa mina hi vulavula Xinghezi. Se ndzi tolovele Xinghezi ngopfu ku tlula Xipaniya.”

Xana na wena u le ka xiyimo xo fana na Ian? Loko ndyangu wa ka n’wina wu rhurhe wa ha ri ntsongo, swi nga endleka u nga swi xiyanga leswaku ririmi ra manana ri nga ku pfuna evuton’wini. Kutani u nga ha va u pfumelele leswaku ri huma emianakanyweni ya wena. Noor la tshahiweke eku sunguleni, u ri: “Tatana u ringete hi matimba ku sindzisa leswaku ku vulavuriwa ririmi rakwe ekaya, kambe a hi nga swi lavi ku vulavula Xiarabu. A hi swi teka onge ku dyondza Xiarabu i ku tirhwexa ndzhwalo. Hikuva vanghana va hina va vulavula Xinghezi. Minongonoko ya TV leyi hi yi hlalelaka i ya Xinghezi hinkwayo. Xisweswo a xi nga ri kona xilaveko xo dyondza Xiarabu.”

Kambe, loko u ri karhi u kula, u nga ha sungula ku swi xiya leswaku ku vulavula ririmi ra manana kahle swa pfuna. Hambiswiritano, swi nga ha ku tikela ku tsundzuka marito lawa a wu ma tiva kahle. Michael, wa malembe ya 13, loyi vatswari vakwe va rhurheke le Chayina va ya eNghilandhi u ri: “Ndzi tala ku hlanganisa marito ya tindzimi letimbirhi.” Ornelle wa malembe ya 15, loyi a rhurheke eCongo (Kinshasa) a ya eLondon u ri: “Loko ndzi ringeta ku byela Manana swo karhi hi Xilingala ndza tsandzeka hikuva ndzi tolovele ku vulavula Xinghezi.” Lee, loyi a tswaleriweke eAustralia hi vatswari lava humaka le Cambodia, wa tisola leswi a nga ri kotiki kahle ririmi ra vatswari vakwe. Wa hlamusela: “Loko ndzi vulavula ni vatswari va mina niloko ndzi lava ku phofula ta le mbilwini hi timhaka to karhi, swa ndzi tikela hikuva a ndzi swi koti kahle ku vulavula ririmi ra rikwerhu.”

Xivangelo Xo Dyondza Mindhavuko Ni Tindzimi Tin’wana

Loko u nga ha ri tivi kahle ririmi ra manana, u nga heli matimba. U nga tlhela u ri dyondza. Kambe, u fanele u twisisa xivangelo xo endla tano. Xana u ta vuyeriwa hi yini? Giosuè la boxiweke eku sunguleni, u ri: “Ndzi dyondze ririmi ra vatswari va mina hikuva a ndzi lava ku va ni vuxaka lebyikulu na vona naswona ku tlula hinkwaswo a ndzi lava ku gandzela Xikwembu xikwan’we na vona. Ku dyondza ririmi ra rikwerhu swi ndzi pfuna ku twisisa ndlela leyi va titwaka ha yona. Naswona swi va pfunile leswaku va ndzi twisisa.”

Vantshwa vo tala lava nga Vakreste va dyondza ririmi ra manana hikwalaho ka leswi va lavaka ku chumayela valuveri-kulobye mahungu lamanene ya Mfumo wa Xikwembu. (Matewu 24:14; 28:19, 20) Salomão, loyi a rhurheleke eLondon a ha ri ni ntlhanu wa malembe, u ri: “Kunene swa tsakisa ku hlamusela Matsalwa hi tindzimi timbirhi! A ku sele ka ntsongo ndzi ri rivarile ririmi ra vatswari va mina, kambe sweswi leswi ndzi nga evandlheni ra Xiputukezi, ndzi kota ku vulavula Xinghezi ni Xiputukezi ndzi nga tiluma-lumi.” Oleg, la nga ni 15 wa malembe, loyi sweswi a tshamaka eFurwa u ri: “Ndza tsaka leswi ndzi kotaka ku pfuna van’wana. Ndzi kota ku hlamusela leswi nga eBibeleni eka vanhu lava vulavulaka Xirhaxiya, Xifurwa kumbe Ximoldova.” Noor, u vone xilaveko xo chumayela ensin’wini ya Xiarabu. U ri: “Sweswi ndzi le ku dyondzeni ka ririmi ra rikwerhu naswona ndzi ringeta ku tsundzuka marito lama ndzi ma rivaleke. Langutelo ra mina ri cincile. Sweswi ndzi lava ku byeriwa loko ndzi endla swihoxo. Ndzi lava ku dyondza.”

Xana u nga endla yini leswaku u tlhela u ri vulavula kahle ririmi ra vatswari va wena? Mindyangu yin’wana yi kume leswaku loko yi phikelela yi vulavula ririmi ra manana ntsena loko yi ri ekaya, vana va ta ti dyondza kahle tindzimi ha timbirhi.a U nga ha kombela vatswari va wena leswaku va ku pfuna ku dyondza ku tsala ririmi ra rikwenu. Stelios, loyi a kuleleke eJarimani kambe a vulavulaka Xigriki, u ri: “Vatswari va mina a a va hlaya tsalwa ra Bibele na mina siku ni siku. A va ri hlayela ehenhla kutani mina ndzi ri tsala ehansi. Sweswi ndzi kota ku hlaya ni ku tsala Xigriki ni Xijarimani.”

Entiyisweni, loko u tolovelana ni mindhavuko yimbirhi ni ku vulavula tindzimi timbirhi kumbe ku tlula, u ni lunghelo lerikulu. Ku tiva ka wena mindhavuko yimbirhi swi engetela vuswikoti bya wena byo twisisa ndlela leyi vanhu va titwaka ha yona ni ku kota ku hlamula swivutiso swa vona malunghana ni Xikwembu. Bibele yi ri: “Munhu wa tsaka hi ku hlamula ka nomu wakwe, naswona rito leri fikeke hi nkarhi wa kona i rinene ngopfu!” (Swivuriso 15:23) Preeti, loyi a tswaleriweke le Nghilandhi, kasi vatswari va yena i Maindiya, wa hlamusela: “Leswi ndzi twisisaka mindhavuko yimbirhi, ndzi chumayela ndzi ntshunxekile ensin’wini. Ndzi twisisa vanhu va mindhavuko hayimbirhi, leswi va swi pfumelaka ni malangutelo ya vona.”

“Xikwembu A Xi Yi Hi Nghohe”

Loko u titwa u nga amukeleki eka ndhavuko wo karhi, u nga heli matimba. Xiyimo xa wena xa fana ni xa vanhu vo hlaya va le Bibeleni. Hi xikombiso, Yosefa, u tekiwile eka ndhavuko wa rikwavo wa Xiheveru loko a ha ri jaha kutani a ya fela aEgipta. Hambiswiritano, swi le rivaleni leswaku a nga ri rivalanga ririmi ra rikwavo. (Genesa 45:1-4) Hikwalaho ka sweswo, u kote ku pfuna ndyangu wa ka vona.—Genesa 39:1; 45:5.

Timotiya loyi a fambeke nkarhi wo leha na muapostola Pawulo, a a ri na tatana wa Mugriki ni manana wa Muyuda. (Mintirho 16:1-3) Ematshan’weni yo pfumelela mindhavuko yakwe yimbirhi yi va xihinga eka yena, a swi kanakanisi leswaku u kote ku pfuna van’wana loko a ri entirhweni wa vurhumiwa hileswi a a ma tiva kahle mahanyelo ya mindhavuko yakwe leyi hambaneke.—Vafilipiya 2:19-22.

Xana na wena u nga teka swiyimo leswi u nga eka swona tanihi lunghelo ematshan’weni yo va xihinga? Tsundzuka, “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” (Mintirho 10:34, 35) Yehovha u rhandza leswi u nga xiswona, ku nga ri laha u humaka kona. Xana u nga fana ni vantshwa lava tshahiweke laha, u tirhisa vutivi ni ntokoto wa wena leswaku u pfuna van’wana lava humaka erixakeni ra ka n’wina leswaku va dyondza hi ta ku pfumala xihlawuhlawu ka Xikwembu xa hina xa rirhandzu Yehovha? Ku endla tano, swi nga ku tisela ntsako lowukulu!—Mintirho 20:35.

Swihloko swin’wana leswi nge “Vantshwa Va Vutisa . . . ” swi kumeka eka Website leyi nge, www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

◼ Hi yihi mindhavuko kumbe tindzimi leti nga swihinga eka wena?

◼ Xana u nga yi hlula njhani yin’wana ya mintlhontlho leyi?

[Xifaniso lexi nga eka tluka 20]

Ku vulavula ririmi ra vatswari va wena swi nga tiyisa vun’we bya ndyangu