“Tikombeni Mi Ri Ni Ku Nkhensa”

◼ Hi ku phindha-phindha, Bibele yi khutaza vagandzeri va Xikwembu leswaku va nkhensa. Pisalema 92:1 yi ri: “I swinene ku nkhensa Yehovha.” Hilaha ku fanaka muapostola Pawulo u khutazile a ku: “Tikombeni mi ri ni ku nkhensa.”—Vakolosa 3:15.

Ku ni xivangelo lexi twalaka xo va hi nkhensa. Profesa Robert Emmons wa le Yunivhesiti ya California le Davis, u ri: “Valavisisi va ta ku nkhensa va sungule ku ringanyeta leswaku loko munhu a ri ni moya wo khensa swi n’wi pfuna leswaku a langutana ni swiphiqo swa siku ni siku, ngopfu-ngopfu ntshikilelo ni ku va munhu a titwa a ri wa risima.”

Magazini lowu nge Time wu ri: “Vanhu lava vulaka leswaku va nkhensa . . . va va ni matimba ni ntshembo, a va karhatiwi ngopfu hi ntshikilelo hambi ku ri ku karhatiwa hi gome ku ri na ku va ni vanhu van’wana hi ku angarhela.”

Hambiswiritano, lexi vavisaka, Bibele yi profete leswaku “emasikwini yo hetelela” vanhu vo tala va ta tikombisa va ri lava “tirhandzaka” lava nga “nkhensiki.” (2 Timotiya 3:1-5) Xana Vakreste va ntiyiso va nga swi papalata njhani ku ngheniwa hi moya wo tano? Mutsari un’wana wa Bibele u ri: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.” (Esaya 48:17) Hi papalata maxangu lama welaka lava phasiwaka hi ku hlongorisa rifuwo loko hi yingisa milawu ya Xikwembu. Ku engetela kwalaho, ha tiyiseka leswaku Yehovha wa ma vona matshalatshala ya hina naswona u ta hi katekisa hi ndlela leyi faneleke. (Vaheveru 6:10) Mikateko yo tano, yi hi susumetela ku “nkhens[a] Yehovha.”—Pisalema 107:8.