‘A Hi Veni Vanhu Lava Nkhensaka’
1 Loko Yesu a tshungule vanhu va khume lava a va ri ni nhlokonho, ku vuye un’we ntsena a ta nkhensa. Yesu u vutise a ku: “Va basisiwe va ri khume, a swi tano ke? Kutani, xana lavan’wana va kaye va kwihi?” (Luka 17:11-19) I swa nkoka leswaku hi nkhensa nyiko yin’wana ni yin’wana leyi hetisekeke, leyi humaka eka Yehovha Xikwembu, Tata wa hina la nga ni rirhandzu ni la hananaka.—Kol. 3:15; Yak. 1:17.
2 Hi tihi tinyiko tin’wana leti hi nga ti nkhensaka? Hi nkhensa nkutsulo, ku nga nyiko leyikulu ngopfu leyi Xikwembu xi yi nyikeke vanhu. (Yoh. 3:16) Nakambe hi nkhensa Yehovha leswi a hi tshineteke eka yena. (Yoh. 6:44) Nyiko yin’wana leyi hi yi nkhensaka i vun’we lebyi hi nga na byona tanihi Vakreste. (Ps. 133:1-3) A swi kanakanisi leswaku ti tele tinyiko tin’wana leti Yehovha a hi nyikeke tona. Kutani hi nga tshuki hi fana ni Vaisrayele lava rivaleke tinyiko leti Yehovha a va nyikeke tona!—Ps. 106:12, 13.
3 Vana La Nkhensaka: Hambileswi swi nga endlekaka leswaku vanhu lavaya va khume lava nga ni nhlokonho a va tsakile hileswi Yesu a va tshunguleke, kambe i un’we ntsena la vuyeke a ta nkhensa. (Luka 17:15) Na hina hi fanele hi nkhensa leswi hi endleriweke swona hi ku hisekela ntirho wo chumayela. Loko hakunene hi swi tlangela hinkwaswo leswi Tata wa hina la nge matilweni a hi endlelaka swona, hi ta kota ku pfuna van’wana loko hi ri karhi hi va chumayela, va swi vona leswaku wa va rhandza. (Luka 6:45) Nakambe, loko hi ri karhi hi byela van’wana hi ‘mintirho ya Yehovha yo hlamarisa ni miehleketo ya yena eka hina,’ hi ta hambeta hi n’wi rhandza.—Ps. 40:5.
4 Dyondzisa Van’wana Ku Nkhensa: Hi fanele hi dyondzisa vana va hina ni swichudeni swa hina swa Bibele leswaku swi nkhensa. Vatswari va ni tindlela to tala to dyondzisa vana va vona to tanihi loko va hlalele ntumbuluko wa Yehovha na vona. (Rhom. 1:20) Loko hi ri karhi hi dyondza Bibele ni xichudeni xa hina, hi nga xi vutisa hi ku, “Xana leswi hi swi dyondzaka laha swi hi dyondzisa yini hi vumunhu bya Yehovha?” Loko xichudeni xi hambeta xi tlangela ntumbuluko, xi ta ya xi rhandza Xikwembu kutani xi tiyimisela ku xi tirhela.
5 Vanhu vo tala emasikwini lawa yo hetelela a va nkhensi. (2 Tim. 3:1, 2) Mawaku ndlela leyi Yehovha a tsakaka ha yona loko a vona malandza ya yena ma tlangela leswi a ma endlelaka swona hi ku hisekela ntirho wo chumayela!—Yak. 1:22-25.