“Dyondzani Ku Nkhensa”
1 Vo tala va hina hi leteriwe ku sukela evuhlangini ku vula hi ku “ndza kombela” na “inkomu” loko munhu un’wana a hi kombisa tintswalo kumbe ku hi anakanyela. Pawulo u hi tsundzuxa leswaku nkarhi hinkwawo ‘hi dyondza ku nkhensa,’ naswona ngopfu-ngopfu hi fanele hi tlangela Yehovha. (Kol. 3:15, 16) Kambe, xana hi nga ku kombisa njhani ku tlangela Muvumbi wa hina Lonkulu? Naswona hi swihi swivangelo swo hlawuleka leswi hi nga na swona leswi endlaka leswaku hi n’wi nkhensa?
2 Muapostola Pawulo u tsarile: “A ku nkhensiwe Xikwembu lexi hi nyikaka ku hlula hi Hosi ya hina Yesu Kriste.” (1 Kor. 15:57) Hi nkarhi wa Xitsundzuxo lembe rin’wana ni rin’wana, hi tsundzuxiwa hi rirhandzu lerikulu leri Xikwembu na Kreste va ri kombiseke hi ku hi nyika nkutsulo lowu hi nyikaka ntshembo wa vutomi lebyi nga heriki. (Yoh. 3:16) Tanihi leswi vo tala hi lahlekeriweke hi varhandziwa va hina eku feni, vona ndlela leyi hi nkhensaka ha yona xitshembiso xa Yesu xa ku pfuxiwa ka vafi! Timbilu ta hina ta khapakhapa hi ntsako loko hi anakanyisisa hi ntshembo wa ku pona makumu ya mafambiselo lawa hi nga kalanga hi fa. (Yoh. 11:25, 26) Swa nonon’hwa ku kuma marito yo phofula ku nkhensa mikateko hinkwayo leyi hlamarisaka leyi hi nga ta yi kuma evokweni ra Yehovha eParadeyisini leyi taka ya laha misaveni. (Nhlav. 21:4) Hi swihi swivangelo swin’wana swo antswa leswi un’wana ni un’wana a nga na swona swo ‘tikombisa a ri la nkhensaka’ Xikwembu?
3 Ndlela Yo Kombisa Ku Nkhensa Xikwembu: Nkarhi na nkarhi swi fanerile ku phofula ku nkhensa ka hina vunene bya Yehovha hi xikhongelo. (Ps. 136:1-3) Nakambe, hi susumeteleka ku kombisa ku n’wi nkhensa ka hina hi tindlela tin’wana letinene. Hi xikombiso, ha tiyiseka leswaku hi ta va kona hi Sonto, March 23, eXitsundzuxweni xa rifu ra Kreste. Leswaku hi pfuneta hi swilo leswi vonakaka swa vandlha ra ka hina ni swa ntirho wa misava hinkwayo, hi ‘dzunisa Yehovha hi swilo swa hina swa risima’ hi ntsako. (Swiv. 3:9) Hi seketela vakulu hi xitalo ni ku tirhisana na vona, xisweswo hi kombisa ku tlangela ka hina Yehovha hikwalaho ka mpfuno lowu a wu nyikelaka hi ku tirhisa vona. (1 Tes. 5:12, 13) Siku rin’wana ni rin’wana, hi lwela ku hlayisa mahanyelo lamanene lama dzunisaka vito ra Xikwembu. (1 Pet. 2:12) Yehovha u tsakisiwa hi vumbhoni lebyi hinkwabyo bya ku nkhensa ka hina.—1 Tes. 5:18.
4 Ku Phofula Ka Hina Lokunene Ka Ku Nkhensa: Ku hlanganyela hi moya-xiviri hinkwawo entirhweni wa ku chumayela hi Mfumo, ku dzunisa vito ra Yehovha, ku phofula ku tlangela hi xikhongelo, ni ku lwela ntiyiso hi vutshembeki lebyi tiyeke hi yin’wana ya tindlela letinene leti hi nga kombisaka Muvumbi wa hina ha tona leswaku hi n’wi tlangela hi mbilu hinkwayo eka hinkwaswo leswi a hi endleleke swona. Yehovha u tsakela ku hi vona hi n’wi endlela ntirho wo kwetsima lowu seketelaka ku rhandza ka yena ka “leswaku vanhu hinkwavo va ponisiwa.” (1 Tim. 2:3, 4) Hi yona mhaka leyi vahuweleri hinkwavo lava nga swi kotaka ku amukela xirhambo lexi nga eka Vutirheli Bya Hina Bya Mfumo bya February xo nghenela vuphayona bya nkarhinyana eka yin’wana ya tin’hweti ta March, April na May kumbe hinkwato ka tona. Ku endla matshalatshala lamakulu evutirhelini i ndlela leyinene yo ‘kombisa ku nkhensa ka hina’ Xikwembu. Xana u ta swi kota ku phayona hi April? hi May?
5 Hi nyikiwe ntshembo lowunene wa ku hanya hi masiku. Loko hi ku vona, ha ha ta va ni swivangelo swo tala siku rin’wana ni rin’wana swo hambeta hi nkhensa Yehovha hi ntsako.—Ps. 79:13.