Ku Pfuna Mindyangu Leswaku Yi Va Ni Vumundzuku Lebyi Nga Heriki
1 “Makwanga i manene,” mutivi wa swa timali u byele ntlawa wa le kholichi lowu a wu ri eku thwaseni, ivi a engetela a ku: “U nga va ni makwanga kambe u hambeta u tsaka hi leswi u nga swona.” Leyi hi yona ndlela leyi ha yona misava yi hlohlotelaka ku tilavela swa wena tanihi ndlela yo tiyiseka hi vumundzuku bya wena. Ku hambana na sweswo, Yesu u dyondzise leswaku Mukreste u fanele a “titshik[a] . . . hikokwalaho loko munhu a kota ku fuwa misava hinkwayo, kambe a lahlekeriwa hi vutomi bya yena, swi ta va swi n’wi pfune yini ke?” (Mt. 16:24-26) Leswaku a va ni vumundzuku lebyi nga heriki, munhu u fanele a endla ku rhandza ka Xikwembu evuton’wini bya yena hinkwabyo—pakani ya nkoka swinene ya mindyangu namuntlha. (Ps. 143:10; 1 Tim. 4:8) Rungula rolero ri kumeka eka ndzima yo hetelela ya buku leyi nge Xihundla Xa Ntsako eNdyangwini. Buku leyi leyintshwa yi pfuna vanhu leswaku va vona lexi nga xa nkoka evuton’wini ni ndlela leyi va nga tirhaka hi ndlela leyi vuyerisaka ha yona ehenhleni ka mindyangu ya vona. Loko hi ri karhi hi ya emahlweni hi chumayela mahungu lamanene hinkwako-nkwako, xana hi nga vula yini lexi nga khutazaka lava hi hlanganaka na vona leswaku va hlaya buku leyi nge Ntsako eNdyangwini? Hi leswi swiringanyeto swin’wana:
2 Loko u ri emutini ni le xitarateni, u nga ha ringeta ku tirhisa xiphephana lexi nge “Tsakela Vutomi Bya Ndyangu” leswaku u sungula mabulo. U nga vutisa u ku:
◼ “Tanihi leswi vutomi bya manguva lawa byi hi tiselaka ku vilela loku hinkwako, xana u vona onge swa koteka ku va ni vutomi bya ndyangu lowu tsakeke hakunene? [Yimela nhlamulo.] Xiphephana lexi xa hi tiyisekisa leswaku swa koteka. Xana u nga tsakela ku xi hlaya?” Loko xi amukeriwa, u nga ya emahlweni u ku: “Tanihi leswi u ri tsakelaka rungula leri, u nga ha tlhela u tiphina hi rungula ra buku leyi leyi nyikelaka xitsundzuxo hi vuxokoxoko malunghana ni ndlela leyi ntsako wu nga kumiwaka ha yona endyangwini.” Kombisa tinhloko-mhaka leti nga endzeni ta buku leyi nge Ntsako eNdyangwini. Kombisa swihloko swi nga ri swingani leswi kokaka mahlo swa buku leyi. Pfula eka tluka 10, ivi u hlaya xivulwa xo hetelela xa ndzimana 17 ku ya fika emakumu ka ndzimana 18. Fambisa buku hi munyikelo wa R4,00. Hlamusela leswaku wa ha ri ni swo tala swo swi vula, ivi u vutisa leswaku u nga tlhela u vuya rini.
3 U nga ha yisa bulo ra wena emahlweni malunghana ni vutomi lebyi tsakisaka bya ndyangu hi ku vula u ku:
◼ “Ndzi tsakela ku ku kombisa swin’wana ebukwini leyi u nga na yona leswi ndzi ehleketaka leswaku u ta swi tsakela. Ndzima yo hetelela yi kombisa xihundla xa xiviri xa ntsako endyangwini. [Hlaya ndzimana 2 eka tluka 183.] Xiya leswaku ku tirha swin’we eku endleni ka ku rhandza ka Xikwembu hi xona xilotlelo. Hi khutaza mindyangu leswaku yi dyondza Bibele swin’we leswaku yi ta tiva leswi ku rhandza ka Xikwembu ku nga swona ni ndlela yo swi tirhisa endyangwini. Hi nyikela dyondzo ya Bibele ya mahala leyi helaka endzhaku ka tin’hweti ti nga ri tingani ntsena. Loko wo ndzi pfumelela, ndzi ta ku kombisa ndlela leyi yi fambisiwaka ha yona.” Tlhelela ni broxara leyi nge I Yini Leswi Xikwembu Xi Swi Languteleke Eka Hina? kumbe buku leyi nge Vutivi, yin’wana ni yin’wana yi ta va yi fanerile swinene.
4 Loko u vulavula ni lava u dyondzaka na vona xikolo kumbe vantshwa van’wana ensin’wini, u nga ha kuma n’wangulo eka xivutiso lexi:
◼ “Xana i swa nkoka hi ndlela yihi eka vatswari ni vana va vona leswaku va hlayisa tindlela to vulavurisana ti pfulekile eka vona hi voxe? [Yimela nhlamulo.] Xiya ndlela leyi buku leyi ya ta vutomi bya ndyangu yi swi vulaka malunghana ni nhloko-mhaka leyi nge ‘Ku Vulavurisana Kahle Ni Hi Ku Ntshunxeka.’ [Hlaya ndzimana 4 hinkwayo ni xivulwa xo sungula eka ndzimana 5 eka tluka 65 ebukwini leyi nge Ntsako eNdyangwini.] Tindzimana leti landzelaka ti nyika swiringanyeto leswinene malunghana ni ku antswisa ku vulavurisana endyangwini. Buku leyi yi ni nhloko-mhaka leyi nge Xihundla Xa Ntsako eNdyangwini. Loko u tsakela ku yi hlaya, yi nga va ya wena hi munyikelo wa R4,00.” Hlamusela leswaku u ta tlhela u vuya enkarhini lowu taka leswaku u ta twa leswi a swi vulaka ehenhleni ka leswi a swi hlayeke.
5 U nga ha yisa bulo ra wena ro sungula emahlweni ni muntshwa malunghana ni ku vulavurisana ka mutswari ni n’wana hi ku vula u ku:
◼ “Ndzi tlangela ku tsakela loku u ku kombiseke malunghana ni nkoka wa ku va ni mbulavurisano lowunene endyangwini wa ka n’wina. Hi yihi mhaka ya nkoka swinene leyi u nga vulaka leswaku vatswari ni vana va fanele va bula ha yona?” Yimela nhlamulo. Kutani pfula eka tluka 68 ebukwini leyi nge Ntsako eNdyangwini, kutani u hlaya nhlamulo leyi kumekaka eka xiphemu xo sungula xa ndzimana 11. “Ku va ni dyondzo ya Bibele ya vhiki na vhiki i ndlela leyinene yo kuma vutivi bya Xikwembu.” Humesa broxara leyi nge I Yini Leswi Xikwembu Xi Swi Languteleke Eka Hina? Hlamusela leswaku tidyondzo ta yona ta 16 ti nyikela rungula ra xisekelo ra Bibele. Hlaya xingheniso lexi nga eka tluka 2, ivi mi bula swin’we hi dyondzo yo sungula. Fambisa broxara hi munyikelo wa R1,20.
6 Loko u kuma mutswari entirhweni wa yindlu na yindlu, kumbexana endhawini ya vuwiselo kumbe endhawini ya mabindzu, u nga ha pfuxa ku tsakela hi ku vula u ku:
◼ “Ndza tshemba wa swi vona leswaku ku kurisa vana namuntlha i ntlhontlho lowukulu. Xana u ehleketa leswaku i yini lexi nga sirhelelaka ndyangu wa wena eka minkucetelo leyi nga tengangiki? [Yimela nhlamulo.] Hi lexi xitsundzuxo lexinene lexi ndzi xi tlangelaka swinene.” Vulavula hi xikombiso lexi nga eka ndzimana 1, ivi u hlaya ndzimana 2 eka tluka 90 ebukwini leyi nge Ntsako eNdyangwini. Hlamusela ndlela leyi ha yona yi nyikaka nkongomiso lowu ringaniseriweke lowu tirhaka hakunene leswaku ku sirheleriwa mindyangu eka minkucetelo leyi onhaka. N’wi siyele buku hi munyikelo wa R4,00, ivi u tlhela u vuya leswaku u ta hlamula swivutiso swihi na swihi leswi vutisiwaka.
7 Loko u tlhelela eka mutswari loyi a tekeke buku leyi nge “Ntsako eNdyangwini,” u nga yisa bulo emahlweni hi ndlela leyi:
◼ “Loko hi vonana ro sungula, ndzi swi vonile leswaku hakunene wa va khathalela vana va wena naswona u lava ku endla hinkwaswo leswi u nga swi kotaka ku va sirhelela eka minkucetelo leyo biha. U nga ha va u nga si yi hlaya, kambe ku ni yinhla ya nkoka swinene ebukwini leyi ndzi ku siyeleke yona leyi u faneleke u yi vona. [Hlaya ndzimana 19 eka tluka 59.] Ku va ni vuxaka ni Xikwembu swi lava ku xi tiva hi ku hlaya Rito ra xona leri tsariweke, ku nga Bibele. Xana u nga tsakela leswaku ndzi ku kombisa ndlela leyi hi dyondzaka Bibele ha yona tanihi ndyangu?”
8 Vatsundzuxi va misava a va nge swi koti ku kombisa mindyangu ndlela yo kuma ntsako, naswona handle ko kanakana va ta yi siya yi hele matimba. A hi yi hangalaseni swinene buku leyi nge Ntsako eNdyangwini leswaku vanhu hinkwako-nkwako va ta pfuniwa hi Rito ra Xikwembu leswaku va kuma vumundzuku lebyi nga heriki.—1 Tim. 6:19.