Ta Rivala
◼ “Ku ni vumbhoni byo tala bya sayense lebyi seketelaka mhaka ya leswaku swilo swi lo tihundzukela lebyi hi nga byi vonaka ni lebyi hi dyondzisaka swo karhi evuton’wini.”—MUPAPA BENEDICT Wa vu-16.
◼ “Valawuri va kulule va n’watseka . . . leswaku va kuma mali yo kambela ni ku lunghisa mabuloho ‘lama nga akiwangiki kahle’ ya kwalomu ka 74 000 le United States endzhaku ka loko buloho leri nga ni malembe ya 40 hi vukhale ra le Minneapolis [Minnesota] leri taleriwaka ngopfu hi timovha ri wele eNambyeni wa Mississippi, ri dlaya [vanhu va 13].” —THE WEEK, U.S.A.
Vanhu Vo Tala Va Tlula Nawu
Phepha-hungu ra le London ra Times ri te: “Mhaka ya leswaku ‘vanhu vo tala va hanya hi nawu’ ko va norho ntsena. Vanhu vo tala va le Britain va pfumela leswaku va yingisa ntsena milawu leyi va yi lavaka, hi nkarhi lowu va lavaka ha wona.” Ndzavisiso lowu endliweke hi Ndzawulo leyi kambisisaka Vugevenga ni Vululami le Kholichi ya King eLondon, wu kombise leswaku vunyingi bya vanhu lava tlulaka nawu i vanhu lava “xiximekaka.” Munhu un’we eka vanharhu lava ku vulavuriweke na vona a nga xavi hi xikweleti leswaku a papalata ku hakela xibalo, munhu un’we eka vanharhu u tlherisa cinci loko a nyikiwe cinci yo tala, naswona munhu un’we eka va ntlhanu wa pfumela leswaku wa yiva entirhweni. Vaendli va ndzavisiso va gimete hileswaku matikhomelo lawa “ma onha mahanyelo ya vanhu, kumbexana ku tlula ndlela leyi madzolonga ni vugevenga byi ma onhaka ha yona.”
Xana Matlhari Ya Nyutliya “Ma Le Mavokweni Ya Xikwembu”?
Kereke ya Orthodox ya le Rhaxiya yi tlangele ntirho lowu endliweke hi vavanuna ni vavasati lava a va nyikiwe vutihlamuleri bya ku hlayisa ni ku khathalela matlhari ya nyutliya ya le Rhaxiya. Eka rungula leri nga hlayiwa eka nhlengeletano leyi veke kona le Kerekeni Leyikulu ya Kreste Muponisi le Moscow, ivi ku tlhela ku vulavuriwa ha rona eka phepha-hungu ra Krasnaya Zvezda, Alexis wa Vumbirhi loyi a nga murhangeri wa kereke Orthodox ya le Rhaxiya, u te: “Ndzi khongela eka Xikwembu . . . leswaku matlhari ya nyutliya lama endliweke hi n’wina mi tlhela mi nyikiwa vutihlamuleri bya ku ma hlayisa, onge minkarhi hinkwayo ma nga tshama ma ri emavokweni ya Xikwembu, naswona ma va matlhari yo chavisa matiko man’wana leswaku ma nga hlaseli ma tlhela ma tirhiseriwa ku rihisela eka matiko lama hlaselaka.”
Vulombe eTikweni Ra Khale Ra Israyele
Yunivhesiti ya Xiheveru ya le Yerusalema leyi Dyondzisaka hi ta Vuyimburi yi te: “Vumbhoni bya vuyimburi bya nhlamuselo leyi nga eBibeleni ya tiko ra Israyele . . . tanihi ‘tiko leri khulukaka ntswamba ni vulombe’ (kumbe tiko ra vulombe) byi yimburiwile.” Le Tel Rehov, eNkoveni wa Beth Shean le Israel, ku kumiwe swihlenge swa tinyoxi leswi endliweke hi vumba leswi pakiweke swi va tilayini tinharhu ku ya ehenhla. Xiviko lexi xi vula leswaku tinyoxi leti ti hanye “hi lembe-xidzana ra vukhume ku ya eku sunguleni ka lembe-xidzana ra vukaye B.C.E.” naswona “swi nga endleka a ti ri ni swihlenge swa 100.” Vahlayisi va tinyoxi va ringanyeta leswaku endhawini leyi swi nga ha endleka leswaku a ku kumiwa “vulombe lebyi endlaka hafu ya thani” lembe rin’wana ni rin’wana.
Swifuwo Swi Rhandziwa Ngopfu
The Sydney Morning Herald yi vika leswaku hi ku ya hi nkambisiso wa Internet, “munhu un’we eka va mune va le Australia u vula leswaku u rhandza xifuwo xa yena ngopfu ku tlula ni munghana wa yena wa vukati kumbe munhu loyi a rhandzanaka na yena kumbe vatswari va yena.” Munhu un’we eka vanharhu lava ku vulavuriweke na vona eka nkambisiso lowu endliweke hi khampani ya le Australia leyi pfunaka vanhu hi matirhiselo ya mali ya vona, u tirhisa “nkarhi wo tala ni mali yo tala eka xifuwo xa yena ku tlula leyi a yi tirhiselaka vutshunguri bya yena.” Matshungulelo man’wana ya swifuwo ma katsa matshungulelo hinkwawo lama rharhanganeke.