Ta Rivala
◼ Eka malembe ya 20 lama hundzeke, nhlayo ya makhombo ya ntumbuluko emisaveni hinkwayo yi phindheke ka mune. Vanhu vo tlula 250 wa timiliyoni va khumbeka lembe ni lembe.—EL UNIVERSAL, MEXICO.
◼ “Mimoya leyi hungeke ekusuhi ni lwandle ra Pacific eka malembe lama hundzeke yi hlengelete thyaka ro tala ngopfu.” Ndhawu leyi funengetiweke hi thyaka leri se yi kule ku ringana ni tiko ra Australia.—LA DÉPÊCHE DE TAHITI, TAHITI.
◼ Leswaku ku endliwa petirolo leyi endlaka tilitara ta 50 ya movha lowutsongo swi lava mavele lama endlaka tikhilogiramu ta 200—“lama nga wundlaka munhu un’we lembehinkwaro!”—GAZETA WYBORCZA, POLAND.
Ku Kandziyisiwa Ka Tibibele Le Chayina
Ye Xiaowen loyi a nga murhangeri wa Ndzawulo ya Timhaka ta Vukhongeri eTikweni u ri: “Tiko ra Chayina i rin’wana ra matiko lama fambaka emahlweni hi ku kandziyisa Tibibele to tala emisaveni hinkwayo.” Khampani ya le Chayina leyi tirhaka ku kandziyisa leyi nga le Nanjing, laha ku nga ntsindza wa Xifundzha xa Jiangsu yi kandziyise Tibibele ta 50 wa timiliyoni leti heleleke. Hi ku ya hi magazini wa People’s Daily Online, “muchini [wa khampani leyi] a wu kandziyisa Tibibele ta kwalomu ka timiliyoni tinharhu hi lembe emalembeni ya sweswinyana.” Ku vikiwa leswaku nhlayo ya vanhu lava tivulaka Vakreste le Chayina yi le ku andzeni.
Makhamba Ma Lava Mimfungho Ya Vukhongeri
Magazini wa Russky Newsweek wu vika leswaku, “eka malembe ya ntlhanu lama hundzeke, ku vikiwe leswaku tikereke to tlula 1 000 ti hlaseriwe hi swigevenga le Rhaxiya.” Mimfungho ya kwalomu ka 40 000 leyi yiviweke yi vikiwe eka Ndzawulo ya Timhaka ta Xikaya ya le Rhaxiya. Sweswi Ndzawulo ya Timhaka ta Xikaya ni Kereke ya Orthodox ya le Rhaxiya va twanane leswaku mimfungho hinkwayo ya tikereke yi ta va ni mfungho wo hlawuleka, lowu nga ta vonaka ntsena loko wu voningiwa hi miseve ya dyambu. Leswi swi ta pfuna valavisisi leswaku va tiva n’wini wa mfungho lowu kumiweke. Magazini wa Russky Newsweek wu vula leswaku Varhangeri va le Moscow va wu amukela ntwanano lowu, “tanihi leswi mfungho wa laha ‘misaveni’ wu nga taka wu nga kavanyeti masalamusi ya mimfungho ya tikereke.”
Tinyimpi Ti Heta Mali Ya Le Afrika
Phepha-hungu ra International Herald Tribune ri ri: “Exikarhi ka lembe ra 1990 na 2005, matiko ya 23 ya laha Afrika ma katseke eka tinyimpi, naswona mali hinkwayo leyi tirhisiweke yi endle kwalomu ka 300 wa tibiliyoni ta tidolara ta le United States.” Ellen Johnson-Sirleaf loyi a nga Muungameri wa tiko ra Liberia u ri: “Mali leyi tiko-nkulu ra Afrika ri yi hakelaka yi nga kota ku hakelela swiphiqo leswi vangiwaka hi HIV na AIDS laha Afrika, kumbe ku hakelela dyondzo, mati ni ku sivela kumbe ku tshungula mavabyi ya rifuva ni dari. A ku ta va ku akiwe magidi-gidi ya swibedlhele, swikolo ni mapatu.” Phepha-hungu leri ri gimeta hi ku vula leswaku loko a ku nga ri tinyimpi, tiko-nkulu ra Afrika “a ri ta va ri ve tiko-nkulu leri fuweke swinene ematshan’weni yo va evuswetini lebyikulu emisaveni hinkwayo.”
Ku Ba Xithongwana Swi Nga Ku Pfuna
Nkambisiso lowu endliweke eka vavanuna ni vavasati va Magriki vo tlula 23 000 wu kombise leswaku ku ba xithongwana kanharhu hi vhiki swi nga hunguta ku dlayiwa hi vuvabyi bya mbilu hi 37 wa tiphesente. Dimitrios Trichopoulos loyi a nga mukambisisi tlhelo mutivi wa ta nsivela-mavabyi eXikolweni xa Harvad xa ta Rihanyo ra Mani na Mani, eU.S.A. u ri: “Ku ni vumbhoni lebyi xiyekaka bya leswaku ntshikilelo wa xitshuketa ni lowu tshamaka wu ri kona wu nga vanga vuvabyi bya mbilu.” U ri: “Ku ba xithongwana nindzhenga swi nga hunguta ntshikilelo [ni] ku hunguta mafu lama vangiwaka hi vuvabyi bya mbilu.”