Matimba Ya Vuxisi Bya Swinavetisi

HI MUTSARI WA XALAMUKA! LE POLAND

Tomek u honolele thelevhixini, a nga copeti ni mahlo. U rhiye ndleve loko xinavetisi xi ri karhi xi khutaza vayingiseri xi ku: “Loko n’wana wa wena o ambala leswi u ta va ni matimba, a va xitlangi lexinene emintlangwini naswona vanghana vakwe va ta n’wi navela. U fanele u xi xava!” Tomek u tsutsumela eka tata wakwe, a ri karhi a phindha-phindha xinavetisi lexi a ha ku xi twaka. Wa vutisa a ku: “Papa, xana u ta ndzi xavela swona?”

◼ Ha yini vana va lava swilo leswi navetisiwaka? Mudyondzisi la tshahiweke eka magazini wa Rewia wa Xipolixi u hlamule a ku: “Va swi lava hikwalaho ka leswi va vonaka vana van’wana va ri na swona. Va lava ku hambeta va rhandziwa hi vanghana va vona.” Loko vana va kombela, va rila ni ku tsuva, hakanyingi vatswari van’wana va hetelela va va xavele swilo leswi va swi lavaka.

I yini lexi endlaka leswaku xinavetisi lexi endleriweke ku yenga vana xi kanganyisa swinene? Mutivi wa mianakanyo Jolanta Wąs u vula leswaku swinavetisi swa kona “a swi vuli leswaku nchumu wa kona i mali muni, wu tiye ku fikela kwihi kumbe ndlela leyi wu pfunaka ha yona.” Xi endleriwe leswaku munhu a titwa a “navela swilo leswi navetisiwaka.” Wąs u ri: “Vana a va nge swi koti ku kambisisa leswi va nga swi twa eka xinavetisi xo karhi. . . . Leswi va swi twaka a va swi koti ku swi pimanisa ni leswi va swi tivaka swi ri ntiyiso.” Hambiloko vo ringeta ku endla tano, a va nge swi koti ku vona loko nchumu wo karhi wu ri wa nkoka.

Xana u nga n’wi sirhelela njhani n’wana wa wena eka matimba ya vuxisi bya swinavetisi? Magazini wa Rewia loko wu hlamusela xivangelo xo sungula wu ri: “U fanele u heta nkarhi ni n’wana wa wena naswona nkarhi na nkarhi u n’wi hlamusela leswaku lexi endlaka leswaku munhu a va wa nkoka a hi ntangu [kumbe swiambalo] leswi a swi ambalaka.” Dyondzisa n’wana wa wena leswaku a nga swi kota ku kula a tsakile hambiloko a nga ri na swona swilo swo tlangisa leswintshwa. Xa vumbirhi, vatswari hi voxe va fanele va xalamukela ndlela leyi swinavetisi swi nga va kucetelaka ha yona vana va vona. Wąs u vula leswaku, mhaka ya nkoka “hileswaku a hi lavi ku pfumelela swinavetisi swi hi byela leswaku i yini leswi nga swinene eka vana va hina.”

Xo hetelela, vatswari hinkwavo va nga vuyeriwa eka ndzayo leyi nga eBibeleni. Muapostola Yohane u te: “Hinkwaswo leswi nga emisaveni—ku navela ka nyama ni ku navela ka mahlo ni ku bombisa rifuwo ra munhu ra vutomi—a swi humi eka Tatana, kambe swi huma emisaveni.”—1 Yohane 2:15, 16.

Xana a wu pfumeli leswaku swinavetisi swo tala swi va swi fambisana ni “ku navela ka mahlo” kutani swi kucetela vana swin’we ni vanhu lavakulu leswaku va “bombisa rifuwo ra [vona] ra vutomi”? Lexi tsakisaka, hileswi muapostola Yohane a yaka emahlweni ni ndzayo yakwe a ku: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yohane 2:17.

Vatswari lava minkarhi hinkwayo va bulaka ni vana va vona hi timhaka leti akaka va nga va dyondzisa milawu ya Bibele leyi kongomisaka ni swilo leswi nga swa nkoka. (Deteronoma 6:5-7) Leswi swi ta endla leswaku vana va nga kanganyisiwi hi ku olova hi swinavetisi leswi nga ni matimba swa misava leyi, leswi nga endleriwa ku tshikilela vatswari va vona leswaku va va xavela swilo swo hambana-hambana.