Ndlela Yo Hlawuleka Yo Enerisa Swilaveko Swa Vanhu

VANHU a va lavi moya, swakudya ni mati ntsena. Leswaku hi va lava tsakeke hakunene, hi fanele hi enerisa xilaveko xa hina xa moya. Hi fanele hi tiva xikongomelo xa vutomi, leswaku ha yini hi ri laha misaveni. Hikwalaho, Yesu Kreste u te: “Va tsaka lava khathalaka hi xilaveko xa vona xa moya.”—Matewu 5:3.

Xikwembu xi endle leswaku hi kota ku enerisa xilaveko xolexo hi ku hi nyika buku leyi kwetsimaka leyi hangalasiweke swinene emisaveni, ku nga Bibele yo Kwetsima, leyi sweswi yi kumekaka yi helerile kumbe yi nga helelanga hi tindzimi ta kwalomu ka 2 400. (2 Timotiya 3:16) Bibele yi hi byela leswaku Xikwembu xi vumbe vuako ni swilo hinkwaswo leswi hanyaka leswi nga laha misaveni. (Genesa, tindzima 1 na 2) Yi hi byela leswaku xi avanyise ntirho wa xona wo tumbuluxa xi wu endla hi “masiku” ya tsevu yo fanekisela, ku nga mhaka leyi pfumelelanaka ni nkarhi lowu katsekaka eku vumbiweni ka misava hilaha van’wasayense va swi kombiseke hakona.

Bibele yi tlhela yi paluxa xikongomelo xa Xikwembu hi vanhu. Xikongomelo xolexo xi vuriwe eka Pisalema 37:29, leyi nge: “Lavo lulama va ta dya ndzhaka ya misava, va ta tshama eka yona hi masiku.” Xiya leswaku lavo lulama, ku nga vanhu lava hanyaka hi milawu ya mahanyelo leyi nga le Bibeleni, va ta hanya hilaha ku nga heriki emisaveni ku nga ri etilweni. Ina, misava yi ta va yi nga ri pulanete leyi thyakeke hilaha yi nga hakona namuntlha. Ematshan’weni ya sweswo, misava hinkwayo yi ta va yi ri paradeyisi.—Pisalema 104:5; Luka 23:43.

Vutivi Lebyi Nga Endlaka Munhu A Kuma Vutomi Lebyi Nga Heriki

Ku ta va ku ri ni mixaka yimbirhi ya Paradeyisi: misava yi ta va yi ri paradeyisi naswona vanhu va ta va va ri ni ku rhula ni Xikwembu. Esaya 11:9 yi ri: “Kunene misava yi ta tala hi ku tiva Yehovha kukota mati lama funengetaka lwandle.” Vutivi byolebyo lebyi dzikeke etimbilwini ta vanhu byi susumetela Vakreste va ntiyiso hambi ku ri sweswi leswaku va hanya hi ku rhula naswona va twanana. Xa nkoka swinene, va yingisa marito lawa Yesu a ma vuleke loko a khongela a ku: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Loko u tsakela ku twa leswi engetelekeke malunghana ni ntshembo lowu hlamuseriweke eBibeleni, Timbhoni ta Yehovha ti nga tsakela ku ku pfuna mahala.a

[Nhlamuselo ya le hansi]