Xana Vatswari Va Nga Pfuna Njhani?

NHLANGANO wun’wana wa dyondzo wa le United States wu khutaza swichudeni leswi nghenaka eswikolweni swa le henhla leswaku swi endla nchumu lowu wo tika: “Kombisa leswaku u tiyimiserile ku tirha hi matimba ku tlula mpimo.” Vantshwa van’wana va ringeta ku endla leswi nga le henhla ka matimba ya vona hi leswi va susumetiwaka leswaku va fikelela tipakani ta vona. Madeline Levine, loyi ku vulavuriweke ha yena exihlokweni lexi hundzeke u tsarile a ku: “Vana vo tala va tshama va khomekile lerova rihanyo ra vona ri va ekhombyeni hikwalaho ka tidyondzo leti koxaka leswaku va dyondza rungula ro tala hi nkarhi wo koma, mintirho yo tala leyi endliwaka loko xikolo xi humile, ku hatlisela ku va endla va lunghekela tidyondzo ta le xikolweni xa le henhla kumbe ta le kholichi ni valeteri ni vakongomisi vo hlawuleka lava hirhiwaka leswaku va pfuna vana va xikolo leswaku va endla hinkwaswo leswi va nga swi kotaka leswaku va yisa tidyondzo ta vona emahlweni.” Swichudeni leswi nga le xiyin’weni xo tano swi nga ha vabya.

Loko u karhateka hi ntshikilelo lowu n’wana wa wena a langutaneke na wona exikolweni, yana exikolweni u ya vulavula ni vadyondzisi, vatsundzuxi ni vafambisi va xikolo. Va byele leswi u swi xiyaka eka n’wana wa wena. U ni mfanelo yo endla tano.

Bibele yi khutaza vatswari ku xiyisisa nhluvuko lowu vana va vona va wu endlaka loko va ri karhi va kula. Muxe u byele vatswari va Vaisrayele a ku: “U fanele u . . . dyondzisa n’wana wa wena [milawu ya Xikwembu] hi ku phindha-phindha naswona u vulavula ha [yona] loko u tshama endlwini ya wena, loko u famba egondzweni, loko u etlela niloko u pfuka.”—Deteronoma 6:7.

Ku khathala swinene hi dyondzo ya n’wana wa wena a swi vuli swona leswaku se u nghenelela etimhakeni ta yena n’wini. Swi kombisa leswaku u seketela n’wana wa wena hi ndlela ya rirhandzu. Naswona sweswo swi nga pfuna swinene eku hunguteni ka ntshikilelo wa n’wana wa wena exikolweni.

[Xifaniso lexi nga eka tluka 8, 9]

Bula ni vadyondzisi swin’we ni vatsundzuxi va n’wana wa wena malunghana ni ntshikilelo lowu a nga na wona