Vatswari Lava Tirhisanaka Hi Ku Tshembeka

◼ Maxelo ya le tindhawini leti tlakukeke kumbe ya tindhawu leti nga rivala ta Afrika Dzonga, ma titimela swinene. Loko ndzi ri ehofisini ya mina yo kufumela leyi nga exithezini xa vunharhu, ndzi langutise murhi lowu nga riki na matluka lowu a wu ri karhi wu hungiwa hi moya lowukulu wa xixika ndzi ri eku vileleni. Emarhavini ya murhi a ku ri ni tuva leri tsakeke leri a ri fukamele mavondlo mambirhi lawa a ma ri ni masiku manharhu ma tlhotlhorhiwile.

Loko tandza ro sungula ri nga si tshikeriwa, tuva ra xinuna ni ra xisati ma pfunanile leswaku ma aka xisaka—ra xinuna ri ta ni swimhandzana kutani lera xisati ri aka. Ma endle ntirho lowunene ngopfu hikuva moya wa matimba wa xixika wu tsandzekile ku hahlula xisaka xolexo, lexi sweswi a xi ri ni matandza mambirhi. Tuva ra xisati a ri fukamela matandza lawa nivusiku; kasi lera xinuna ri ma fukamela ninhlikanhi. Endzhaku ka mavhiki mambirhi, matandza ma tlhotlhorhile. Ku nga si hela mavhiki man’wana mambirhi, mavondlo lawa ma ta va ma kurile naswona ma kota ku haha.

Yingisela! Xana wa wu twa noti wa tuva wo tsakisa, lowu fanaka ni xihleko? Tuva ra xisati leri yimbelelaka, leri rhweleke swakudya swa mavondlo ya rona lama twaka ndlala, ri fika ri tshama eka rhavi rin’wana leri nga ekusuhi ni xisaka ri tivisa leswaku se ri fikile naswona lera xinuna ri fanele ri huma exisakeni. Hambiloko se mavondlo ma kota ku haha, vatswari havambirhi va ta hambeta va ma wundla ku kondza ma kota ku ti lavela swakudya hi woxe.

Hakanyingi ndzi hlamarisiwa hi ntirhisano ni nkhathalelo lowu matuva lawa ma wu kombisaka, lowu ma nga na wona hi ntumbuluko naswona ma wu hundzisela ni le ka vana va wona. Mhaka leyi yi endla leswaku ndzi ehleketa hi marito ya Pisalema 86:8: “A nga kona la fanaka na wena . . . , wena Yehovha, ni mintirho leyi fanaka ni ya wena a yi kona.”

ERitweni rakwe leri tsariweke ku nga Bibele yo Kwetsima, Yehovha Xikwembu u nyike vatswari lava nga vanhu nkongomiso lowu tshembekaka hilaha a nyikeke hakona matuva vutlhari bya ntumbuluko. Hi xikombiso, Bibele yi khutaza vamanana leswaku “va rhandza vana va vona.” (Tito 2:4) Eka vatatana yi ri: “Mi nga karhati vana va n’wina, kambe hambetani mi va kurisa hi ku tshinya ni nkongomiso wa mianakanyo wa Yehovha.” (Vaefesa 6:4; 1 Timotiya 5:8) Hakunene vatswari lava endlaka swilo leswi i va risima ematihlweni ya Xikwembu.