Ndlela Leyi Swiharhi Swi Khathalelaka Ni Ku Kurisa Vana Va Swona Ha Yona
Hi mutsari wa Xalamuka! eSpaniya
HAKANYINGI vatswari va tinyiketela eka malembe ya kwalomu ka 20 va ri karhi va kurisa vana va vona. Hi hala tlhelo, swiharhi swo tala, swi boheka ku phamela vana va swona ni ku va letela eka tin’hweti ti nga ri tingani ta ximumu. Ku ni swikombiso swi nga ri swingani leswi nga ta hi kombisa leswaku swiharhi swin’wana swi langutana ni ntirho wo tika lembe ni lembe.
1. Gumba Xinyenyana lexi nga exifanisweni lexi xi hava nkarhi wo wisa hi ximumu. Loko xi ri ni mavondlo lama lavaka ku phameriwa, xi fanele xi ya ko tala emativeni ya le kusuhi xi ya lava machela, swinhlampfana, minkolombyana kumbe tinjiya, hi nga ha vuli ku pfuxeta xisaka nkarhi ni nkarhi. Swinyenyana leswi haswimbirhi swi gingiriteka siku hinkwaro. Mavondlo lawa ma dya ngopfu. Phela, emavhikini yo hlayanyana yo sungula, ma nga dya swakudya swo tala ku hundza ntiko wa swona siku ni siku! Hambiloko se ma swi tiva ku haha, ma ha hambeta ma wundliwa hi vatswari va wona ku ringana mavhiki yo hlayanyana.
2. Xinkankanka Swinkankanka hakanyingi swi va ni mutswari un’we, naswona i mana wa kona loyi a khathalelaka vana. U fanele a kuma swakudya siku ni siku leswaku a tiwundla kahle ni ku wundla vana vakwe—hi ntolovelo u va ni vana vanharhu ku ya eka va ntlhanu. Ntirho lowu a hi matlangwana hikuva minkarhi yo tala a nga khomi nchumu. Ku tlula kwalaho, nkarhi ni nkarhi u boheka ku rhurhisa ndyangu wakwe wu ya endhawini yin’wana hikuva tinghala ti tshama ti lote meno ti lavana ni vana lava nga sirheleriwangiki. Loko vana va kona va ri ni tin’hweti ta nkombo, mana wa kona u sungula ku va dyondzisa ku tihlotela, swi teka nkarhi wo leha ku dyondzisa vana ku hlota, swi nga ha teka lembe kumbe ku tlula. Hi ntolovelo vana va kona va tshama ni mana wa vona ku ringana lembe ku ya eka lembe ni hafu.
3. Sekwa Masekwa a ma hambani ni swiciwana swa wona. Loko swiciwana swi tlhotlhorhiwile, swi huma eswisakeni swi famba ni vatswari va swona. Swiciwana swi tlulela enhlaneni wa vatswari va swona. Kwalaho swa kufumela ni ku sirheleleka loko mana wa kona ni tata wa kona va ri karhi va hlambela. Vatswari va kona va nyupela va lava swakudya va patse vana va kona. Hambileswi swiciwana leswi swi hatlaka swi dyondza ku hlambela ni ku tikumela swakudya, kambe swi tshama ni vatswari va swona nkarhi wo lehanyana.
4. Nhutlwa A swi talanga leswaku tinhutlwa ti va ni vana vo hundza un’we naswona xivangelo xa kona xi lo dla! Xinhutlwana lexa ha ku tswariwaka, ku fana ni lexi nga laha xifanisweni, xi nga ha tika 60 wa tikhilogiramu naswona xi va xi lehe timitara timbirhi loko xi yimile! Loko xi ri ni awara xi tswariwile, xinhutlwana xa swi kota ku yima hi milenge kutani xi sungula ku an’wa eka mana wa xona. Xi an’wisiwa tin’hweti ta kaye, hambileswi endzhakunyana ka ku tswariwa, xi sungulaka ku dya byanyi. Loko xinhutlwana xi vona khombo, xi yima exikarhi ka milenge ya mana wa xona, tanihi leswi mana wa kona a xi sirhelelaka hi ku raha swiharhi leswi xi hlaselaka.
5. Mavungana Swinyenyana leswi vuriwaka vamavungana swi boheka ku hlawula hi ndlela leyi pakanisaka loko swi khomela swivondlwana swa swona tinhlampfi. Vativi va swinyenyana va kume leswaku vatswari havambirhi va wundla swivondlwana hi swinhlampfana leswi nga lehangiki ku tlula tisentimitara timbirhi. Xinyenyana lexi xi khoma nhlampfi hi ncila. Sweswo swi endla leswaku swivondlwana swi kota ku yi mita kahle nhlampfi leyi, swi rhanga hi nhloko. Loko swivondlwana swi ri karhi swi kula, vatswari va kona va sungula ku tisa tinhlampfi letikulunyana. Vatswari va sungula ni ku swi kumela swakudya ko hlayanyana. Eku sunguleni, vondlo rin’we a ri nyikiwa swakudya endzhaku ka timinete tin’wana ni tin’wana ta 45. Kambe loko mavondlo se ma ri ni masiku ya 18, ma dya ngopfu, ma kuma nhlampfi eka timinete tin’wana ni tin’wana ta 15! Vondlo leri u ri vonaka laha xifanisweni se ri humile exisakeni naswona ku nga ri khale ri ta sungula ku tikhomela tinhlampfi. Enkarhini lowu, u nga ha ehleketa leswaku vatswari va kona va ta tshika ku wundla mavondlo ya vona. A swi tano hi swinyenyana leswa mavungana! Swi sungula ntirho lowu nakambe hi ximumu xexo.
Entiyisweni, a byi si tiveka vuxokoxoko byo tala malunghana ni ndlela leyi swiharhi swo hambana-hambana swi kurisaka vana swona ha yona. Kambe, loko vativi va ta ntumbuluko va ya emahlweni va va ni vutivi lebyintshwa, swi ya swi va erivaleni leswaku hi ntumbuluko swiharhi swi lava ku khathalela vana va swona. Loko Xikwembu xi nyike swiharhi swa xona matimba lawa, entiyisweni xi lava leswaku ni vanhu va wundla ni ku khathalela vana va vona hi swilo leswi va swi lavaka.