Xihundla 1: Ku Rhangisa Swilo Swa Nkoka

“Tiyiseka hi swilo swa nkoka swinene.”—Vafilipiya 1:10.

Leswi swi vulaka swona. Emindyangwini leyi swilo swi yi fambelaka kahle, nuna kumbe nsati u rhangisa swilaveko swa loyi a tekaneke na yena, a nga rhangisi swilo swakwe, ntirho, vanghana hambi ku ri maxaka. Havumbirhi bya vona va heta nkarhi wo tala va ri swin’we va tlhela va heta nkarhi wo tala va ri ni vana va vona. Hinkwavo va tiyimisela ku titsona swo karhi leswaku ndyangu wa vona wu vuyeriwa.—Vafilipiya 2:4.

Lexi endlaka leswaku swi va swa nkoka. Bibele yi vula leswaku munhu u fanele a rhangisa swilaveko swa ndyangu wakwe. Muapostola Pawulo u vule leswaku munhu loyi a nga wu wundliki ndyangu wakwe “u bihe ngopfu ku tlula munhu la nga riki na ripfumelo.” (1 Timotiya 5:8) Hi ku famba ka nkarhi, swilo leswi munhu a a swi teka swi ri swa nkoka, a nga ha swi vona swi nga ha pfuni nchumu. Hi xikombiso, mutsundzuxi un’wana wa mindyangu u xiye leswaku vanhu vo tala lava yaka eminhlanganweni yakwe, va tikomba va rhangisa ngopfu mintirho ya vona ku ri ni mindyangu ya vona. U vule leswaku swi tikomba onge va lava nchumu lowu nga ta va pfuna leswaku va “tlhantlha swiphiqo swa vona hi ku copeta ka tihlo,” ku endlela leswaku va nga “dyi nkarhi va ri karhi va khathalela mindyangu ya vona, kambe va heta nkarhi wo tala va ri karhi va endla mintirho ya vona.” Hi dyondza yini emhakeni leyi? Hi dyondza leswaku swa olova ku vula leswaku hi rhangisa swilaveko swa mindyangu ya hina kambe hi nga swi kombisi hi swiendlo.

Ringeta xitoloveto lexi. Tikambele hi ku tirhisa swivutiso leswi landzelaka ku vona loko u wu teka wu ri wa nkoka ndyangu wa wena.

◼ Loko loyi ndzi tekaneke na yena kumbe n’wana wa mina a lava ku vulavula na mina, xana ndzi vulavula na yena hi nkarhi wolowo?

◼ Loko ndzi vulavula ni vanhu van’wana hi mintirho ya mina, xana minkarhi yo tala ndzi tikuma ndzi vulavula ni hi swilo leswi ndzi swi endlaka ni ndyangu wa mina?

◼ Xana ndzi nga hunguta mintirho ya mina (entirhweni kumbe kun’wana) loko ndyangu wa mina wu lava leswaku ndzi heta nkarhi lowu engetelekeke ndzi ri na wona?

Loko nhlamulo ya wena ku ri ina eka swivutiso leswi nga laha henhla, u nga vula leswaku wa swi rhangisa swilaveko swa ndyangu wa wena. Kambe, xana loyi u tekaneke na yena ni vana va wena va nga swi hlamula njhani swivutiso leswi? Swilo leswi hina hi swi tekaka swi ri swa nkoka, a swi vuli swona leswaku i swa nkoka ni le ka vanhu van’wana. Swi tano ni hi timhaka tin’wana ta nkoka leti hi nga ta bula ha tona eka matluka lama landzelaka, leti nga pfunaka mindyangu leswaku swi yi fambela kahle.

Tiendlele xiboho. Ehleketa hi ndlela yin’we kumbe timbirhi leti u nga swi kombisaka ha tona leswaku wa swi rhangisa swilaveko swa ndyangu wa wena. (Hi xikombiso: Ehleketa hi ku hunguta swilo leswi ku dyelaka nkarhi lowu a wu ta wu tirhisa u ri ni ndyangu wa wena.)

Ha yini u nga byeli ndyangu wa wena leswaku u tiyimisele ku heta nkarhi wo tala mi ri swin’we? Loko xirho xin’we xi tiyimisele ku endla tano, lavan’wana va nga ha navela ku landzela xikombiso xa xona.

[Xifaniso lexi nga eka tluka 3]

Wanuna loyi swilo swi n’wi fambelaka kahle u rhangisa swilaveko swa ndyangu wakwe