Hi Swihi Swiphiqo Leswi Thekinoloji Yi Nga Swi Vangaka Eka Vukati Bya Wena?

Hambiswiritano, vatekani van’wana va pfumelela ku tirhisa thekinoloji hi ndlela yo biha swi va . . .

• tekela nkarhi wa nkoka lowu a va ta wu heta va va ri swin’we.

• endla va vuya ni ntirho va ta wu endla ekaya hambiloko swi nga bohi.

• endla va nga tshembani hambi ku ri ku tumbetelana swo karhi.

LESWI U FANELEKE U SWI TIVA

NKARHI WO VA SWIN’WE

Nuna loyi a vuriwaka Michael u ri: “Mikarhi yin’wana loko mina ni nsati wa mina hi ri swin’we ekamareni, swi fana ni loko a nga ri kona. U va a ri karhi a tirhisa foni ya yena naswona u ri, ‘A ndzi swi koti ku kamba ku fikela sweswi.’” Nuna loyi a vuriwaka Jonathan u vula leswaku eka swiyimo swo tano “nuna ni nsati va nga va va ri swin’we kambe swi vonaka onge va le tindhawini leti hambaneke.”

MHAKA YO ANAKANYISISA HI YONA: I kangani u kavanyetiwa hi ku rila ka foni kumbe ku nghena ka rungula hi nkarhi lowu a wu fanele u wu heta ni nkataku?—VAEFESA 5:33.

NTIRHO

Vanhu van’wana mitirho ya vona yi lava va hlamula tifoni kumbe tiimeyili hambiloko va ri ekaya. Kambe van’wana hambiloko mitirho ya vona yi nga lavi leswaku va heta nkarhi wo tala eka yona, va nga heta nkarhi wo tala va ri karhi va tirha loko va ri ekaya. Nuna loyi a vuriwaka Lee u ri: “Swa tika ku nga hlamuli foni loko yi rila kumbe ku nga languti rungula rin’wana ni rin’wana leri fambisanaka ni ntirho hi nkarhi lowu ndzi wu vekeleke etlhelo leswaku ndzi va ni nsati wa mina.” Nsati loyi a vuriwaka Joy u ri: “Ndzi tirhela ekaya, kutani swa ndzi tikela ku tshika ku tirha. Swi lava ku endla matshalatshala lamakulu leswaku u ringanisela.”

MHAKA YO ANAKANYISISA HI YONA: Xana u rhiya ndleve loko nkataku a vulavula na wena?—LUKA 8:18.

KU TSHEMBEKA

Ndzavisiso wun’wana lowu endliweke wu kume leswaku hakanyingi vatekani va holovisa hi ku va munghana lowun’wana a tivutisa hi leswi lowun’wana a swi hoxaka eka social media. Van’wana va lava ku vulavurisaniweke na vona va pfumerile leswaku va hoxe swilo eka social media leswi va nga laviki leswaku vanhu lava tekaneke na vona va swi tiva.

Swi fanerile leswi vanhu vo tala va tshembaka leswaku social media yi ni makhombo yo tala eka vanhu lava tekaneke naswona yi endla leswaku swi va olovela ku endla vuoswi. A swi hlamarisi leswi magqweta ya vanhu lava dlayaka vukati ma vulaka leswaku social media yi endla leswaku vanhu vo tala va dlaya vukati.

MHAKA YO ANAKANYISISA HI YONA: Xana u fihlela nkataku leswi u bulaka ha swona ni munhu un’wana wa rimbewu leri hambaneke ni ra wena?—SWIVURISO 4:23.

LESWI U NGA SWI ENDLAKA

TIVEKELE LESWI U NGA TA SWI RHANGISA

Munhu loyi a nga dyiki a nge vi ni rihanyo lerinene. Hilaha ku fanaka, munhu loyi a nga tinyikiki nkarhi wa ku va ni nkatakwe u ta va ni swiphiqo evukatini byakwe.—Vaefesa 5:28, 29.

Vulavula ni nkataku hi swiringanyeto leswi nga laha hansi leswi mi lavaka ku swi tirhisa kumbe mi tsala mavonelo ya n’wina leswaku thekinoloji yi nga vangi swiphiqo evukatini bya n’wina.

• Hi dya swin’we swakudya kan’we hi siku

• Hi tivekela nkarhi lowu hi nga taka hi nga ti tirhisi tifoni ta hina

• Hi tivekela nkarhi lowu hi nga ta endla nchumu wo karhi wo hlawuleka

• Hi veka tifoni ta hina ekule ni laha hi etlelaka kona

• Hi tivekela timinete ta 15 siku ni siku to vulavurisana, tifoni ta hina ti nga ri ekusuhi na hina

• Hi nga ngheni eka Inthanete hi nkarhi wo karhi esikwini