Mindyangu Yin’wana Leyi Swilo Swi Yi Fambelaka Kahle—Xiyenge Xa Vumbirhi

Hilaha swi kombisiweke hakona eka xihloko lexi nge “Mindyangu Yin’wana Leyi Swilo Swi Yi Fambelaka Kahle—Xiyenge Xo Sungula,” milawu ya Bibele yi nga pfuna mindyangu loko yi langutane ni minkarhi yo nonon’hwa.a Yehovha Xikwembu u tshembisa vanhu lava hanyaka hi milawu yakwe a ku: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.”—Pisalema 32:8.

Ku langutana ni swiphiqo swa timali. Hakanyingi vatekani va holovisiwa hi mali. Kambe milawu ya Bibele yi nga pfuna mindyangu leswaku yi va ni langutelo lerinene loko yi ri ni swiphiqo swa timali. Yesu u te: “Tshikani ku vilela hi mimoya-xiviri ya n’wina malunghana ni leswi mi nga ta swi dya kumbe leswi mi nga ta swi nwa, kumbe ku vilela hi mimiri ya n’wina hi leswi mi nga ta swi ambala. . . . Tata wa n’wina wa le tilweni wa swi tiva leswaku ma swi lava swilo leswi hinkwaswo.”—Matewu 6:25, 32.

Eka tluka 23, Issachar wa le United States, u hlamusela ndlela leyi yena ni ndyangu wakwe va koteke ku langutana ha yona ni swiphiqo swa timali endzhaku ka loko yindlu yakwe yi khukhuriwe hi Xidzedze xa Katrina.

Loko xirho xa ndyangu xi vabya. Entiyisweni vanhu hinkwavo va vabya. Hakanyingi munhu u vabya swa xinkarhana kutani a hlakarhela hi ku hatlisa. Kambe ku vuriwa yini loko xirho xa ndyangu xi khomiwa hi vuvabyi lebyi nga tshungulekiki? Bibele yi vula leswaku Yehovha wa va pfuna lava vabyaka. (Pisalema 41:1-3) Xana Yehovha a nga swi tirhisa njhani swirho swa ndyangu leswaku swi pfuna muvabyi?

Eka tluka 24, Hajime, wanuna un’wana wa le Japani, u hlamusela ndlela leyi yena ni vana vakwe va vanhwanyana va khomisaneke ha yona leswaku va pfuna nsati wakwe Noriko endzhaku ka loko ku kumiwe leswaku u ni vuvabyi lebyi nga ni khombo.

Loko mi feriwa hi n’wana. Ku feriwa hi n’wana i rin’wana ra makhombo yo vava swinene leri ndyangu wu nga weriwaka hi rona. Yehovha u tshembisa leswaku u ta sula mihloti ematihlweni ya hina leyi vangiwaka hi ku feriwa hi n’wana. (Nhlavutelo 21:1-4) Hambi ku ri sweswi u chavelela vanhu lava feriweke.—Pisalema 147:3.

Eka tluka 25, Fernando na Dilma va le United States, va hlamusela ndlela leyi Bibele yi va pfuneke ha yona leswaku va swi kota ku tiyisela loko va feriwe hi ricece ra vona.

Bibele yi nga pfuna mindyangu leyi nga ni swiphiqo hilaha mintokoto leyi nga eka matluka lama landzelaka yi nga swi kombisa hakona.

[Nhlamuselo ya le hansi]

[Bokisi/Swifaniso leswi nga eka tluka 23]

Ku Langutana Ni Swiphiqo Swa Timali

Hi ku vula ka Issachar Nichols, wa le United States

“Xidzedze xa Katrina xi khukhule yindlu ya hina ku sala masungulo ya yona ntsena. Ku hele n’hweti ni hafu xikolo lexi a ndzi dyondzisa eka xona xi ri endzeni ka mati.”

HI XIMUMU xa 2005, mina ni nsati wa mina Michelle swin’we na Sydney, xinhwanyetana xa hina lexi nga ni malembe mambirhi, a hi tshama eBay St. Louis, exifundzheni xa Mississippi, le U.S.A. Leswi hi nga Timbhoni ta Yehovha, mina na Michelle a hi tivekele pakani yo hlanganyela hi xitalo entirhweni wo chumayela. A ndzi dyondzisa dyondzo ya tikhompyuta naswona xikolo lexi a ndzi dyondzisa eka xona a xi ri ekusuhi ni le New Orleans, exifundzheni xa Louisiana. A ndzi tivekele xiyimiso xo tirha masiku manharhu hi vhiki naswona nkarhi lowun’wana a ndzi dyondzisa vanhu van’wana Bibele. A hi yi tsakela ndlela leyi mintirho ya hina a hi yi hlele ha yona. Hiloko ku va ni mahungu ya leswaku Xidzedze xa Katrina a xi ta hlasela ndhawu leyi a hi tshama eka yona. Hi tilunghiselele ku suka endhawini yoleyo hi ku hatlisa.

Loko xidzedze xexo xi hundzile, yindlu ya hina ya le Bay St. Louis swin’we ni xikolo lexi a ndzi dyondzisa eka xona eNew Orleans a swi onhakile. Mali leyi hi yi kumeke eka ndzindza-khombo ni leyi hi nyikiweke yona hi mfumo yi hi pfune leswaku hi kuma yindlu yin’wana, kambe swi ndzi tikerile ku kuma ntirho wa nkarhi hinkwawo. Ku engetela kwalaho, nsati wa mina u ngheniwe hi xitsongwatsongwana lexi a xi kumeke eka mati wolawo ya thyaka. U sungule ku tsana naswona endzhakunyana u khomiwe hi malariya. Hi nkarhi wolowo, mali ya ndzindza-khombo leyi a hi yi hakela yi engeteriwile naswona swakudya ni swilo swin’wana a swi durha.

Leswi a hi langutane ni swiyimo leswintshwa, hi dyondze ku tirhisa mali hi vukheta hambiloko hi xava swilo swa nkoka. Ndzi tibyele leswaku ndzi ta teka ntirho wun’wana ni wun’wana lowu ndzi nga ta wu kuma.

Swi hi twise ku vava ngopfu ku lahlekeriwa hi nhundzu ya hina. Kambe lexi hi tsakiseke swinene hileswi hi poneke eka mhangu yoleyo. Eka mhangu leyi, hi dyondze leswaku rifuwo a hi ra nkoka ngopfu. Entiyisweni, leswi swi hi tsundzuxe marito ya Yesu lama nge: “Hambiloko munhu a ri ni swo tala, vutomi byakwe a byi humi eka swilo leswi a nga na swona.”—Luka 12:15.

Hi tlhele hi xiya leswaku ku nga khathariseki ndlela leyi a hi twa ku vava ha yona loko hi tsundzuka swilo leswi hi lahlekeleke, kambe a ku ri ni vanhu vo tala lava a va lahlekeriwe hi swilo swo tala ku tlula hina—van’wana va lahlekeriwe hi vutomi bya vona. Xexo i xin’wana xa swivangelo leswi endleke leswaku endzhakunyana ka mhangu leyi, ndzi nghenela ntirho wo phalala ni ku chavelela van’wana lava lahlekeriweke hi nhundzu ya vona.

Eka maxangu lawa hinkwawo, tsalwa ra Pisalema 102:17 ri hi chavelerile swinene. Ri vula leswaku Yehovha Xikwembu “u ta hundzulukela exikhongelweni xa lava va tekeriweke hinkwaswo, naswona a nge xi languteli ehansi xikhongelo xa vona.” Hakunene u hi seketerile tanihi ndyangu!

[Bokisi leri nga eka tluka 23]

Endzhaku ka loko Xidzedze xa Katrina ni xa Rita swi hlasele Ribuwa ra Nsonga-nkulu wa le United States hi 2005, Timbhoni ta Yehovha ti hatlise ti simeka tindhawu ta 13 to phalala vanhu, ti aka miako leyikulu ya kaye yo hlayisa swilo swo phalala ha swona ni miako ya mune yo veka tihunyi ni petirolo. Timbhoni ta kwalomu ka 17 000 leti nga vatirhi va ku tirhandzela leti humaka eUnited States ni le matikweni man’wana ya 13 ti ye ti ya phalala vanhu lava hlaseriweke hi swidzedze sweswo. Ti lunghise tiyindlu ta magidi.

[Bokisi/Swifaniso leswi nga eka tluka 24]

Loko Xirho Xa Ndyangu Xi Vabya

Hi ku vula ka Hajime Ito, wa le Japani

“A hi tsakela ku sweka swin’we tanihi ndyangu loko Noriko a nga si vabya. Sweswi a nga ha swi koti ku dya kumbe ku nwa hi nomu hambi ku ri ku vulavula. U tshama a ri exitulwini xa mavhilwa naswona u hefemula hi tiphayiphi.”

HI May 2006, nsati wa mina, Noriko, u sungule ku va ni xiphiqo xa ku vulavula. Hi ximumu xa lembe rero u sungule ku va ni xiphiqo xa ku dya ni ku nwa. Hi September ku kumiwe leswaku u ni vuvabyi bya ku tsana ni ku fa ka misiha lebyi vuriwaka amyotrophic lateral sclerosis (ALS) lebyi hakatsongo-tsongo byi endlaka leswaku byongo ni longo swi nga ha tirhi. Hi tin’hweti ta mune ntsena vutomi bya hina byi cince hi ku helela. Naswona leswikulu a swa ha ta.

Hi ku famba ka nkarhi, voko ra Noriko ri khwanyanile ivi ni ririmi rakwe ri nga ha tirhi. U endliwe vuhandzuri ekhwirini ni le nkolweni leswaku ku pfuriwa timbhovo to hoxa tiphayiphi leti a a ta dyisiwa ha tona ni ku hefemula ha tona naswona sweswo swi endle leswaku a nga ha swi koti ku vulavula. Hakunene a swi n’wi tikela swinene Noriko ku va exiyin’weni xexo hikuva a a ri munhu wa migingiriko swinene. Hi Timbhoni ta Yehovha naswona Noriko ni vana va hina a va heta nkarhi wa vona wo tala entirhweni wo chumayela. Sweswi Noriko u hefemula hi tiphayiphi naswona u heta nkarhi wo tala a etlele emubedweni.

Hambiswiritano, Noriko a nga tshikanga ku hambeta a tirhela Yehovha. Hi xikombiso, u va kona eminhlanganweni ya Vukreste naswona u tshama exitulwini xakwe xa mavhilwa lexi nga ni muchini ni tiphayiphi to hefemula ha tona. A nga ha twi kahle kutani n’wana wa hina u n’wi tsalela tinhla hi nkarhi wa minhlangano leswaku a vuyeriwa eka leswi ku dyondziwaka ha swona. Hambileswi Noriko a tshikeke ku va muchumayeri wa nkarhi hinkwawo, wa ha tsalela vanhu mapapila a va dyondzisa hi rungula ra Bibele leri chavelelaka hi ku tirhisa muchini wun’wana wo hlawuleka lowu tlhomiwaka eka khompyuta leyi hi yi tirhisaka ekaya.—2 Petro 3:13; Nhlavutelo 21:1-4.

Hinkwerhu ha khomisana leswaku hi pfuna Noriko. Vana va hina va kume mintirho leyintshwa leyi endlaka leswaku va kota ku pfuna swinene ekaya. Hi vunharhu bya hina hi endla mintirho ya siku ni siku yo tala ya le kaya leyi Noriko a a hamba a yi endla a nga si vabya.

Minkarhi yin’wana loko ndzi languta Noriko nimixo, u tikomba a karhele. Ndzi vulavula hi mbilu ndzi ku, ‘Ndzi navela onge ndzi nga n’wi byela leswaku a wisa namuntlha.’ Kambe Noriko u lava ku byela van’wana rungula ra Bibele. Loko ndzi n’wi layitela khompyuta, wa tsaka. Loko a tsalela vanhu mapapila, u titwa a antswa swinene. Se ndza swi twisisa leswaku i swa nkoka ku va “nkarhi hinkwawo [hi] va ni swo tala swo swi endla entirhweni wa Hosi.”—1 Vakorinto 15:58.

Ntokoto wa Jason Stuart, loyi na yena a a khomiwe hi vuvabyi bya ALS, lowu tsariweke eka Xalamuka! ya January 2006, wu n’wi pfune swinene Noriko leswaku a nga heli matimba. Entiyisweni, loko vatirhi va le xibedlhele va vutise Noriko leswaku ha yini a ri ni langutelo lerinene, u va byele hi xihloko xexo xa Xalamuka! naswona hi va nyike tikopi ta magazini wolowo. Nsati wa mina wa khutazeka swinene loko a chumayela van’wana hi ripfumelo rakwe.

Ndzi ni malembe ya 30 ndzi tekane na Noriko, kambe eka malembe manharhu lama hundzeke ndzi sungule ku tlangela swilo swo tala hi yena leswi khale a ndzi swi tekela ehansi. Ndzi tsake ngopfu hileswi ndzi tekaneke na yena.

[Bokisi/Swifaniso leswi nga eka tluka 25]

Loko Mi Feriwa Hi N’wana

Hi ku vula ka Fernando na Dilma Freitas, va le United States

“Ku feriwa hi n’wana a swi hlamuseleki. Ku hava nchumu wo vava hi ndlela yoleyo.”

N’WANA wa hina loyi a hi n’wi thye vito ra Precious, u fe hi April 16, 2006. A a ri ni masiku ya khume ntsena. Loko nsati wa mina a ri ni tin’hweti tinharhu a tikile, madokodela ma kume leswaku n’wana wa hina loyi a nga si velekiwaka u ni xiphiqo lexikulu xa mbilu. Loko a ri kusuhi ni ku velekiwa, swi ve erivaleni leswaku loko o velekiwa a ri karhi a hanya, u ta fa swi nga si ya kwihi. A swi hi tikela swinene ku amukela leswaku n’wana wa hina u ta fa. A hi ri ni vana vanharhu lava a va tihanyele kahle. A hi nga tshembi leswaku n’wana wa hina u ta fa.

Endzhaku ka loko Precious a velekiwile, dokodela un’wana la nga ni ntokoto eka mavabyi ya xitekela u kume leswaku n’wana wa hina u ni vuvabyi lebyi vangiwaka hi ku andza ka tisele ta fambiselo ra xitekela lebyi vuriwaka Trisomy 18. Vuvabyi lebyi a byi andzanga hikuva byi khoma n’wana un’we eka va 5 000. A swi ri erivaleni leswaku a a nga ta hanya nkarhi wo leha. Hi ve ni gome swinene hikuva a xi nga ri kona lexi a hi ta xi endla. Nchumu wun’we ntsena lowu a hi ta wu endla a ku ri ku tshama na yena masikunyana wolawo ya vutomi byakwe. Kutani hi endle tano.

Hi tsake swinene hileswi hi koteke ku tshama na Precious ku ringana masiku ya khume. Hi nkarhi wolowo mina ni nsati wa mina swin’we ni swinhwanyetana swa hina swinharhu hi ake vuxaka lebyikulu na yena. A hi n’wi khoma, hi n’wi vulavurisa, hi n’wi angarha, hi n’wi ntswontswa hi tlhela hi n’wi teka swifaniso swo tala. Hi kale hi vulavula hileswaku i mani loyi a fanaka na yena swinene endyangwini wa hina. Dokodela yoloye la kumeke vuvabyi lebyi Precious a a ri na byona, a a hi endzela siku ni siku exibedlhele. A a rila na hina a tlhela a hi chavelela. U kale a mpfampfarhuta xifaniso xa Precious loko a ri karhi a vulavula na hina leswaku a ta n’wi tsundzuka ha xona. U hi nyike kopi ya xona.

Leswi hi nga Timbhoni ta Yehovha, hi kholwa hi ku helela leswi Bibele yi swi dyondzisaka leswaku Xikwembu xi ta tlhela xi endla leswaku misava yi va paradeyisi naswona xi navela ku pfuxa vanhu lava feke, ku katsa ni tincece to fana na Precious. (Yobo 14:14, 15; Yohane 5:28, 29) Hi ri langutele hi mahlo-ngati siku leri hi nga ta tlhela hi n’wi khoma ni ku n’wi angarha ha rona. Nkarhi ni nkarhi loko hi twa rito leri nge “paradeyisi,” swa hi tsakisa! Swa hi chavelela sweswi ku tiva leswaku Precious u le mianakanyweni ya Xikwembu nileswaku a nga ha twi ku vava.—Eklesiasta 9:5, 10.