Nseketelo Lowu Lavekaka

“NDZI boheke ku lwisana ni nchavo wa rifu ni minkarhi ya gome,” ku hlamusela Virginia, un’wana wa Timbhoni ta Yehovha le Argentina. U endliwe vuhandzuri lebyikulu bya ku susiwa mavele ni ku susiwa swisakana swa mandza ha swimbirhi loko a ri karhi a lwisana ni khensa ya mavele.a

Entiyisweni, ku chava rifu hikwalaho ka khensa ya mavele i nchumu wa misava hinkwayo. Nchavo lowu wa ku fa mbeleko ni ku lahlekeriwa hi vuswikoti byo an’wisa, swi nga onha vutomi bya wansati swinene hi tlhelo ra mintlhaveko. Mintlhaveko leyikulu ya ku tihambanisa xikan’we-kan’we yi nga n’wi vangela ku khomiwa hi gome ni ku titwa a nga ha pfuni nchumu. Xana a nga sirheleriwa njhani leswaku a nga vaviseki hi ndlela yoleyo emintlhavekweni?

Xilaveko Xa Nseketelo

Joan wa le United States wa hlamula: “U lava nseketelo!” Mhani na kokwa wa yena a va ri na khensa ya mavele, naswona sweswi yena u lwa nyimpi leyi leyi fanaka leyi va yi lweke. Lowu i nkarhi wa leswaku swirho swa ndyangu ni vanghana lava tshembekaka va nyikela nseketelo ni mpfuno lowu chavelelaka. Nuna wa Joan, Terry, u ve muyimeri wakwe wa matimba ni la pfunaka. Terry wa hlamusela: “Xiyimo xa mina, hi laha ndzi xi vonaka ha kona, a ku ri ku va ni nkucetelo wa xiviri. A ndzi fanele ku pfuna Joan leswaku a endla swiboho mayelana ni vutshunguri lebyi nga ta n’wi endla a titwa a titshemba naswona a va ni matimba yo lwa a nga tlhentlhi. Nchumu lowu a hi fanele ku dyondza ku langutana na wona a ku ri leswi a chava vuhandzuri bya khensa, naswona ndzi ringete leswaku swivutiso ni ku chava kakwe swi boxiwa eka mimbulavurisano ya hina na madokodela.” Terry u engeterile: “Lowu i nchumu lowu hi nga wu endlelaka mindyangu ya hina ni Vakreste-kulorhi lava va nga seketeriwiki emindyangwini ya vona. Hi nga hundzuka mahlo, tindleve ni marito ya vona eka vativi va ta mirhi.”

Ku laveka nyingiso wo hlawuleka eka lava va nga voxe kumbe lava nga tinoni. Diana, wa le Australia, wa hi byela: “Nuna wa mina u fe endzhaku ko endliwa vuhandzuri bya khensa ntlhanu wa malembe lama hundzeke, kambe vana va mina va pfunete ku herisa ku hulukela. A va ri ni tintswalo kambe va nga ri na mintlhaveko. Sweswo swi ndzi tiyise nhlana. Xin’wana ni xin’wana xi endliwe hi xihatla naswona hi ndlela yo rhula.”

Khensa ya mavele yi khumba mintlhaveko ya ndyangu hinkwawo. Kutani hinkwavo va lava nkhathalelo ni nseketelo wa rirhandzu wa van’wana (ngopfu-ngopfu lowu humaka eka vamakwavo va moya emavandlheni ya Vukreste, loko va ri Timbhoni ta Yehovha).

Rebecca, wa le United States, loyi mana wakwe a lwisaneke ni khensa ya mavele wa hlamusela: “Vandlha i xiphemu xa ndyangu wa wena, naswona swiendlo swa vona swi khumba mintlhaveko ya wena swinene. Hambi leswi vo tala va nga pfumelelanangiki ni vutshunguri lebyi nga tolovelekangiki lebyi manana a byi hlawuleke, hi tlhelo ra mintlhaveko va hi seketerile va hi bela tinqingho ni ku hi endzela. Van’wana a va ta, va hoxa xandla eku endleni ka swakudya swakwe swo hlawuleka. Vakulu va lunghiselele fambiselo ra mpfumawulo hi riqingho leswaku hi nga hupiwi hi minhlangano. Vandlha ri kale ri rhumela khadi ri ri ni nyiko ya mali.”

Joan u ri: “Hambi ku ri sweswi, loko ndzi anakanya hi rirhandzu leri vamakwerhu va moya va ri kombiseke, ndzi heleriwa hi marito! Vamakwerhu va xisati va rirhandzu va hete mavhiki ya nkombo, ntlhanu wa masiku hi vhiki, va cincana hi mina va ndzi yisa ni ku ndzi vuyisa exibedlhele, ndzi yela vutshunguri. Naswona maendzo wolawo a ma hlanganisa tikhilomitara ta 150! Hakunene ndzi khensa Yehovha hikwalaho ka mikateko leyo tala ya vumakwerhu lebyi bya Vukreste!”

Ndlela yin’wana leyi hinkwerhu hi nga khutazaka ni ku seketela ha yona i ku vula marito lama akaka. Hi fanele ku va ni vukheta leswaku hi nga va vangeli ntshikilelo handle ko swi xiya hi ku tshamela ku vulavula hi swilo leswi vavisaka. June wa le Afrika Dzonga wa hlamusela: “U nge languteli leswaku munhu loyi a nga si tshamaka a va na khensa a nga endli xihoxo loko a vulavula. Mina a ndzi vona swi antswa leswaku vanhu va nga vulavuli hi timhaka ta khensa handle ka loko va ta vulavula hi vuyelo lebyinene.” Noriko wa le Japani wa pfumela: “Loko vanhu va ndzi byela hi munhu loyi a nga hlakarhela, naswona a nga ha tlheli a vabya, a ndzi va ni ntshembo wa leswaku kumbexana na mina ndzi ta va tano.”

Tsundzuka leswaku vavasati van’wana va lava leswaku u nga tshameli ku vulavula hi rihanyo ra vona. Hambi swi ri tano, van’wana hikwalaho ka ndlela leyi va titwaka ha yona, va lava ku vulavula hi leswi va swi tokoteke hi khensa ya mavele, ngopfu-ngopfu ni vanghana va le kusuhi. Xana u nga swi tivisa ku yini leswaku hi wihi nchumu lowu u faneleke ku wu endla? Helen, wa le United States, u ringanyeta leswi: “Vutisa munhu yoloye loko a swi tsakela ku vulavula ha swona, ivi u tshika yena a vulavula.” Ina, “tshama u lunghekele ku yingisa. N’wi seketele hi tlhelo ra mintlhaveko leswaku a nga tikumi a dya mbitsi a ri yexe,” ku vula Ingelise wa le Denmark.

Ku Lwela Ku Va Ni Langutelo Lerinene

Vutshunguri bya khensa ya mavele byi nga siya muvabyi a hele matimba naswona a ri ni gome ku ringana mavhiki, tin’hweti, hambi ku ri malembe. Xin’wana xa leswi nonon’hwaka swinene eka wansati hi khensa ya mavele ku nga ha va ku langutana ni mhaka ya leswaku a nga ha swi koti ku endla leswi a a kota ku swi endla enkarhini lowu hundzeke. Ku pfumela leswaku swin’wana a swa ha fani ni khale swi ta vula leswaku u ta heta siku a ri karhi a tirha a pfa a wisa.

Loko u teriwa hi gome, ku fanele ku endliwa swin’wana hi xihatla leswaku u tshama u ri ni langutelo lerinene. Noriko u hlamusela ntokoto wa yena: “Vutshunguri bya tihomoni byi ndzi siye ndzi ri ni gome. Hikwalaho ka byona a ndzi nga swi koti ku endla leswi a ndzi lava ku swi endla, naswona ndzi sungula ku titwa ndzi nga ha pfuni nchumu eka Yehovha ni le vandlheni ra Vukreste. Loko ndzi ya ndzi anakanya hi ndlela leyi hoxeke, a ndzi tsundzuka ndlela leyi van’wana lava dlayiweke hi khensa va xanisekeke ha yona ro hetelela. Ndzi karhatiwe hi ku chava lerova ndzi tivutisa leswaku: ‘Xana ndzi ta swi kota ku tiyisela hi laha va tiyiseleke ha kona?’” nchavo a wu ya wu ndzi khubumeta.

Noriko u ya emahlweni: “Enkarhini wolowo ndzi endle matshalatshala ya ku lulamisa mianakanyo ya mina hi ku tirhisa tibuku ta Timbhoni ta Yehovha leswaku ndzi anakanya hi ndlela leyi Yehovha a langutaka vukona bya hina ha yona. Ndzi kume leswaku ku tinyiketela eka Xikwembu a swi nga kombisiwi hi mpimo wa ntirho lowu hi wu endlaka kambe swi kombisiwa hi nsusumeto lowu wu endliwaka ha wona. Tanihi leswi a ndzi lava leswaku Yehovha a amukela xiyimo xa mbilu ni mianakanyo ya mina, ndzi bohe leswaku ndzi fanele ku n’wi tirhela hi ntsako naswona hi moya hinkwawo hambi loko ndzi ta kota ku endla switsongo ntsena evutirhelini bya Vukreste.”

Ku lwisana ni khensa ya mavele nkarhi wo leha naswona u nga tivi leswaku yi ta hela rini, hakanyingi swi nga kukula langutelo lerinene. Diana u hlamusela leswaku leswi n’wi pfuneke ngopfu i ku tata mianakanyo ni mbilu ya yena hi swilo hinkwaswo leswinene leswi Yehovha Xikwembu a n’wi nyikeke swona, ku nga: “Ndyangu wa mina, vanghana, vuyimbeleri lebyo nandziha, ku hlalela lwandle lera matimba ni ku hlalela ku pela ka dyambu loko saseka.” U tlhela a khutaza hi ndlela leyi hlawulekeke a ku: “Byela van’wana hi ta Mfumo wa Xikwembu. Naswona u hlakulela hi xiviri ku navela swiyimo leswi nga ta tata misava ehansi ka Mfumo, laha ku nga ta va ku nga ha ri na vuvabyi!”—Matewu 6:9, 10.

Nakambe Virginia wa tiyisiwa enyimpini yakwe yo lwisana ni gome hi ku anakanyisisa hi xikongomelo xa yena evuton’wini: “Ndzi lava ku hanya hikuva ndzi ni ntirho wa risima lowu ndzi faneleke ku wu endla.” Mayelana ni minkarhi leyi swiyimo swi nonon’hwaka kutani ku ta nchavo, u ri: “Ndzi tshemba Yehovha hi laha ku heleleke, hi ku tiva leswaku a nge ndzi tshiki. Kutani ndzi anakanya hi ndzimana ya Bibele leyi kumekaka eka Pisalema 116:9, leyi ndzi tiyisekisaka leswaku ‘nḍi ta famba e mahlweni ka Yehova emisav̌eni ya lav̌a hanyaka.’”

Vavasati lava hinkwavo va veke ntshembo wa vona eka Xikwembu xa Bibele, Yehovha. Buku ya Bibele ya 2 Vakorinto ndzima 1, tindzimana 3 na 4, ti ri Yehovha i “Xikwembu lexi ku chavelela hinkwako ku humaka eka xona.” Xana Yehovha wa ri tshambuluta voko rakwe leswaku a seketela lava lavaka nchavelelo?

Mieko wa le Japani wa hlamula: “Ndza tiyiseka leswaku hi ku tshama entirhweni wakwe, ndzi kuma nchavelelo ni mpfuno wa matimba wa Yehovha.” Yoshiko na yena wa hi byela: “Hambi leswi vanhu va nga ku twisisiki ku xaniseka ka mina, Yehovha u tiva hinkwaswo, naswona ndza tiyiseka leswaku u ta ndzi pfuna hi ku ya hi swilaveko swa mina.”

Joan u ri: “Xikhongelo xi ni matimba ya ku ku pfuna ku hlula gome ivi xi ku tlherisela exiyin’weni lexi tolovelekeke. Loko ndzi anakanya hi ku horisa lokukulu loku Yesu a ku endleke loko a ri emisaveni ni ku horisiwa ka hi laha ku nga heriki loku a nga ta ku endla emisaveni leyintshwa, hakunene marito lawa ma ndzi chavelela!”—Matewu 4:23, 24; 11:5; 15:30, 31.

Xana wa swi kota ku anakanya hi misava leyi khensa yi nga ta va yi nga ha ri kona, entiyisweni ku nga ha ri na vuvabyi hi laha ku heleleke? Lexi i xitshembiso lexi endliweke hi Xikwembu xa nchavelelo hinkwawo, Yehovha. Esaya 33:24 yi vulavula hi nkarhi lowu ku nga ta va ku nga ri na munhu emisaveni la nga ta ku ndza vabya. Ntshembo wolowo wu ta hetisisiwa ku nga ri khale loko Mfumo wa Xikwembu emavokweni ya N’wana wa xona, Kreste Yesu, wu fuma emisaveni hi laha ku heleleke, wu susa swivangelo hinkwaswo swa vuvabyi, mahlomulo ni rifu! Ha yini u nga tihlayeli hi ntshembo lowu lowunene lowu nga eka Nhlavutelo 21:3 ku ya ka 5? Tiya matimba u kota ku langutana ni vumundzuku hi nseketelo lowu nyikaka nchavelelo wa xiviri.

[Tinhlamuselo ta le hansi]