Langutelo Ra Bibele

Ku Rhandzana Hi Xikongomelo Xo Tekana

Julie na Lee a va rhandzana naswona a va tiyimisele ku tshama va tengile.a Kambe siku rin’wana nimadyambu loko va titshamele voxe, ku navela ka vona ko hlanganyela timhaka ta masangu ku sungule ku kula. Lexi tsakisaka va hatle va tiehleketa va nga si wela exidyohweni.

VUGANDZERI bya ntiyiso byi katsa swilo swo tala handle ko ya eminhlanganweni ya vukhongeri vhiki na vhiki. I ndlela leyi munhu a hanyaka ha yona leyi kongomisaka mahanyelo yakwe. Yesu Kreste u vule leswaku lava “endlaka ku rhandza” ka Xikwembu hi vona ntsena lava nga ta amukeleka eka xona. (Matewu 7:21) Leswaku hi tsakisa Xikwembu, hi fanele hi tikarhatela leswaku ku rhandzana ka hina ku tshama ku va loku xiximekaka naswona hi tivekela pakani yo tekana.

U nga swi endlisa ku yini leswaku ku rhandzana ka n’wina ku tshama ku ri loku tengeke eka Xikwembu, ngopfu-ngopfu tanihi leswi vanhu lava rhandzanaka va nga ehansi ka ntlhontlho lowukulu wa ku tikhoma hi ndlela leyi nga tengangiki? Xo sungula, tsundzuka leswaku milawu ya Xikwembu yi endleriwe ku hi pfuna. Xa vumbirhi, yi tekele enhlokweni ndlela leyi vanhu lava nga hetisekangiki va tikhomaka ha yona. Xa vunharhu, tivekeleni ka ha ri emahlweni swipimelo malunghana ni ndlela leyi mi nga ta endla swilo ha yona loko ma ha rhandzana. Naswona xa vumune, nghenisani Xikwembu eka rirhandzu ra n’wina. Kambisisa tinhla leti ha yin’we-yin’we.

Milawu Leyi Endleriweke Ku Hi Pfuna

Esaya 48:17, 18 yi ri: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona. Kunene loko a wu yingise swileriso swa mina! Kutani ku rhula ka wena a ku ta fana ni nambu, ni ku lulama ka wena a ku ta fana ni magandlati ya lwandle.”

I ntiyiso leswaku swileriso ni milawu leyi nga eRitweni ra Xikwembu leri huhuteriweke, ku nga Bibele yo Kwetsima, yi endleriwe ku hi pfuna. (2 Timotiya 3:16, 17) Milawu yoleyo i vumbhoni bya leswaku Muvumbi wa hina wa khathala swinene hi hina nileswaku u lava leswaku hi tshama hi tsakile naswona swi hi fambela kahle etimhakeni hinkwato ta vutomi. (Pisalema 19:7-10) Xana u titwa hi ndlela yoleyo? Loko swi ri tano, u kombisa leswaku u tlharihile hakunene.

Amukela Leswi U Nga Xiswona

Ku fana ni munghana lonkulu, Yehovha wa tshembeka eka hina; u hi byela leswi hi nga xiswona. Hi xikombiso, Rito rakwe ri hi lemukisa leswaku “mbilu yi kanganyisa ngopfu ku tlula hinkwaswo naswona yi ni khombo. I mani la nga yi tivaka?” (Yeremiya 17:9) Bibele yi tlhela yi ku: “Loyi a tshembaka mbilu yakwe i xihunguki, kambe loyi a fambaka hi vutlhari u ta pona.”—Swivuriso 28:26.

Varhandzani va nga swi kombisa njhani leswaku va tshemba timbilu ta vona? Ndlela yin’wana i ku va va pfumelela ku va eswiyin’weni leswi va nga ha ringekaka ku kombisana rirhandzu ku tlula mpimo, ku fana ni varhandzani lava ku vulavuriweke ha vona laha henhla. Ndlela yin’wana i ku honisa ndzayo leyinene ya vatswari lava chavaka Xikwembu. Vatswari volavo va swi tiva leswaku ku navela ku hlanganyela timhaka ta masangu, ngopfu-ngopfu emalembeni ya vuntshwa, swi nga fanisiwa ni movha lowu nga ni njhini leyi nga ni matimba ngopfu lowu lavaku ku chayeriwa hi vukheta.

Hikwalaho, vantshwa lava “fambaka hi vutlhari” bya Xikwembu va wu tekela enhlokweni nkongomiso wa vatswari va vona. Va yi yingisa ndzayo ya vatswari va vona lava va va rhandzaka swinene hambileswi swilemukiso swa vona swi nga ha endlekaka va nga swi tsakeli. Kambe munhu loyi a ku rhandzaka swinene i Tata wa wena wa le matilweni, Yehovha Xikwembu, loyi a ku tsundzuxaka leswaku u “susa mbitsi embilwini ya wena, naswona u bakanya khombo enyameni ya wena.” (Eklesiasta 11:9, 10) U nga swi endla njhani sweswo? Hi ku va u nga pfumeleli ku hluriwa hi ku navela ko biha.

Tivekeleni Swipimelo Leswi Nga Ta Mi Kongomisa

“Eka lava va kanelaka swin’we ku ni vutlhari.” (Swivuriso 13:10) Loko vanhu lava tlhariheke va ha ku sungula ku rhandzana, va ta tirhisa marito wolawo hi ku pfumelelana ku kombisana rirhandzu hi tindlela leti amukelekaka eMatsalweni ni ku tiyimisela ku nga swi tluli swipimelo sweswo leswi va tivekeleke swona. Ku kombisana rirhandzu hi tindlela leti hoxeke kumbe ku titshemba ngopfu swi fana ni ku chayela hi ndlela leyi nga ni khombo. Swi ta va swi nga ha pfuni nchumu ku lava ku yingisa milawu ya magondzo loko se u endle mhangu!

Bibele yi ri: “U tlharihile la voneke khombo kutani a tumbela, kambe la nga riki na ntokoto u ye emahlweni kutani u fanele a xupuriwa.”(Swivuriso 22:3) Varhandzani va nga papalata ku wela ekhombyeni hi ku titshamela ni mintlawa yin’wana ya varhandzani kumbe va va ni nxangwana. Vuyelo bya vuphukuphuku bya varhandzani ku nga ha va ku kingindziwa hi ripfalo, ku nga ha tixiximi ni ku va khomisa tingana hinkwavo lava va va rhandzaka ku katsa ni swirho swa ndyangu. Kutani tlhariha; pfumela ku tirhisa milawu ya Matsalwa naswona u tiyimisela ku yi namarhela!

Endla Leswaku Yehovha A Va ‘Muluko Wa Vunharhu’

Vukati byi fana ni ntambhu ya miluko yinharhu naswona Xikwembu i muluko wa nkoka. Eklesiasta 4:12 yi ri: “Ntambhu ya miluko yinharhu a yi nge tsemeki hi le xikarhi hi ku hatlisa.” Mhaka leyi yi nga tirha ni le ka vanhu lava rhandzanaka. Lava lavaka ku katekisiwa hi Xikwembu eka rirhandzu ra vona va fanele va va ni vuxaka lebyikulu na xona. Pisalema 1:1-3 yi ri: “Wa tsaka munhu la nga fambangiki hi xitsundzuxo xa lavo homboloka . . . Kambe u tsakela nawu wa Yehovha, naswona nawu wakwe u wu hlaya hi rito ra le hansi vusiku ni nhlikanhi . . . , hinkwaswo leswi a swi endlaka swi ta humelela.”

Leswaku swilo swi hi fambela kahle evuton’wini, ku katsa ni le timhakeni to rhandzana ni le vukatini, hi fanele hi endla swilo hi ndlela leyi Yehovha a lavaka hi swi endla ha yona. Phela, hi yena Muvumbi wa hina naswona ku rhandzana ni vukati i tinyiko ta risima leti humaka eka yena. Hikwalaho ka sweswo, hi fanele hi ti xixima swinene.—Yakobo 1:17.

[Nhlamuselo ya le hansi]

XANA U TSHAME U TIVUTISA?

● Xana hi swi tivisa ku yini leswaku Xikwembu xi hi navelela leswinene?—Esaya 48:17, 18.

● Hi yihi mhaka leyi nga ntiyiso malunghana ni ndlela leyi hi nga xiswona leyi hi faneleke hi yi pfumela?—Yeremiya 17:9.

● I yini leswi hi faneleke hi swi endla leswaku swi ta hi fambela kahle loko hi rhandzana ni loko se hi tekanile?—Pisalema 1:1-3.

[Xifaniso lexi nga eka tluka 13]

Loko vanhu lava tlhariheke va ha ku sungula ku rhandzana, va pfumelelana ku kombisana rirhandzu hi tindlela leti amukelekaka eMatsalweni ni ku tiyimisela ku nga swi tluli swipimelo leswi va tivekeleke swona